Read zemba Markus 6 Bible Online

Markus 6 - zemba bible

Markus 6

¹Jesus wa dha po mpoka, ha i kondolopa yokoyawo, ovalongwa ve have mu landula.

²Metango lyEsabati Jesus wa uta okulonga ovantu mosinagoga. Ovantu ovengi hive mu teelele, have kumwa, have lipula hava tyaa: “Omuntu hengu ovipuka hembi avihe we vi vadha pi? Ounongo hembu mbwee na wo, u li vi? Ovilingankono mbyoka mbyaa undapa, vi lithike pi?”

³Ve mu penya hava tyaa: “Nan̯i hamuhongi wovipilangi? Nan̯i handele yaMaria? Ovanitje haoJakob naJoses naJudas naSimon? Odhompandje hápo tu kala nawo mpa?” Ovantu kave mu itavelele.

⁴Jesus we ve heela ha tyaa: “Omuprofeti ka tombwa pamo mpape lili, omondolopa yawo vala nokovawo nomonganda yawo.”

⁵Okutya Jesus ka ningilile ko otjilingankono notjimo, ovavedhi vamovamo vala mbaa tendeka omawoko e, he ve velula.

⁶Ye we kuminwa mena lyokuhaitavela kwawo. Iya okudha mpoka Jesus wa ka endaenda moulongo noulongo, otjo ma longo ovantu.

⁷Wa ithana ovalongwa omulongo navavali, ha utu oku ve tuma koovavali noovavali. We ve pa odhonkono dhokutumina odhombepo odhombi.

⁸Iya we ve ilikin̯a ha tyaa: “Hámu i natja mondjila, kakele vala kotjisawa, hamungome, handjato yokweenda nayo, hadhombongo motjipapo.

⁹Iya dhalen̯i odhongaku, n̯e hámu kala novikutu vivali.”

¹⁰Ye we ve heela uke ha tyaa: “Amwe ya monganda, mumwe thikile, ngamo mu kala moka katee mamu dhi mo.

¹¹Andaa pe na mpoka mpahamamu tambulwa ne mpahamamu teelelwa, dhen̯i po, n̯e mu lipupule ombuma kodhompadhi[2] dhen̯i, opo tji ve ningile oumbangi woku ve pa ombedhi.”

¹²Wo va ya, hava ka teetha okutya ovantu ngave liteyulule.

¹³Va ta mo odhondemoni odhingi, hava tohola ovavedhi ovengi nomadhi, wo have ve velula.

¹⁴Ohamba Herodes wa tyaa ovipuka hembi avihe, mena lyokutya ena lyaJesus lya teekele apehe. Ovantu vamo va tyaa: “OJohannes Omutjatji oye a imunwa kout̯e, iya odhonkono hendhi odho madhi undapa muye.”

¹⁵Ovakwawo hava tya oElia, tainkolo uke vamo mava tya yuumo owomovaprofeti valukulu.

¹⁶Herodes hiee tji tee, ha tyaa: “OJohannes ngoka ngumba tetetha omutwe, oye a imunwa kout̯e.”

¹⁷Iya Herodes ye omwene oye a tumine ovantu va ka kambule Johannes, a kutwe, a yedhililwe mokaliwoso mena lyaHerodias, omukadhintu womunitje Filippus. Iya Herodes wa kupile Herodias.

¹⁸Iya Johannes we mu heela ha tyaa: “Tji huna okukupa omukadhintu womunitjoye.”

¹⁹Herodias wa li ondjedhi yaJohannes, wa li ama hala oku mu dhipaa, atjaa ke tji ulile.

²⁰Herodes wa li aa tila Johannes, mena lyokutya wa li ae mu i okutya omulumentu omuvyuuki ye omudhilikwa, iya we mu amena. Wa li ae hole oku mu teelela, nandaku tiwa moku mu teelela u mu kulungitha omutima.

²¹Iya kwe ke ya etango ewa, Herodes hiaa ningila otjipito odhosekulu dhe nodhondjai dhovita novanenentu moGalilea metango lyokuyumukwa kwe.

²²Omuna omukadhona waHerodias hiaa piti montanga, wa dhanena po Herodes novayenda ve, he ve hulukithwa. Ohamba wa heela omukadhona ha tyaa: “Nkumba ndje atjihe himo hala, me ku pa tjo.”

²³Ye we mu udhikila, ha ana ha tyaa: “Atjihe soka himo nkumbu, me ku pa tjo, nando nkumbu ombinga imo yotjilongo tjandje.”

²⁴Omukadhona wa ya kwiina, ha tyaa: “Nge kumbe tji?” Ina we mu heela ha tyaa: “Kumba omutwe waJohannes Omutjatji.”

²⁵Omukadhona wa tjuna dhivadhiva kohamba ama kanyauka, ha tyaa: “Me hala, u mpe napano hinyahi omutwe waJohannes Omutjatji melonga hendi.”

²⁶Iya ohamba ya pongele unene, iya mena lyokwaana kwayo nolyovayenda vayo kai ulile uke oku mu anya.

²⁷Ohamba ya tuma dhivadhiva omukwavita omuyungi wombala, hai mu heele okutya nge mu etele omutwe waJohannes. Omuyungi wombala wa ya ha tete Johannes omutwe mokaliwoso.

²⁸Ye we u eta melonga, he u pa omukadhona. Omukadhona he u pa ina.

²⁹Ovalongwa vaJohannes hive tji tee, ve ya, hava itha po otjivimbi tje, have mu paka.

³⁰Ovayapostoli va onganena puJesus, have mu hipululile ovipuka mbyoka avihe mbiva ninga, nambiva longa ovantu.

³¹Jesus wa heela ovalongwa ve ha tyaa: “Indjen̯i tu ke likalele atwiika, opo mu ka thuve po kanunu.” Iya mena lyokutya kwa li ovantu ovengi oombamave ya na mbamava i, okutya kava li ave na oluvedhe lwokulya.

³²Iya wo va ya nowato aveika kompuka hukwe likalela.

³³Iya ovantu ovengi ve ve mona himava i, have ve dhimbuka, hava ka dhamuka pohi okudha movilongo avihe, hawo va tenga okuthika ko hoka Jesus novalongwa ve huva vadhwa ava vyuuka.

³⁴Iya Jesus hiee thiki kontyo, wa mona engundwa enene lyovantu. Ye wa li ae ve etethele mo onkenda, mena lyokutya va li amava ngala odhondhu ndhihadhi na omut̯ita. Ye wa uta oku ve longa ovipuka ovingi.

³⁵Iya hikwa toko, ovalongwa ve ve ya kuye hava tyaa: “Pompuka hempa opokuti kwanyahinya, netango lya toko.

³⁶Lekela ovantu, va ende kodhohambo dhopopedhi nokoulongo, opo ve ke lilandele ovikulya.”

³⁷Jesus we ve yaka ha tyaa: “Ve pen̯i ovikulya.” Wo ve mu pula hava tyaa: “Ngatu ende tu ke ve landele omingome nodhondenari omathele avali, tu ye tu ve pe?”

³⁸Jesus we ve pula ha tyaa: “Iya mu na po omingome vingapi? Enden̯i mu ke vi tale.” Hive vi mono hava tyaa: “Ivitano nodhohi mbali.”

³⁹Iya Jesus wa heela ovalongwa ve, va heele ovantu avehe, va kale pohi mehodhi etalala, wo ve ve yapaule movinkopo.

⁴⁰Ovantu va kala pohi movinkopo; vimo vya li novantu ethele, vimo omilongo vitano.

⁴¹Jesus wa itha po omingome mbyoka vitano nodhohi ndhoka mbali, ha tala peulu, ha pandula. Ye wa nyembula omingome, he vi pa ovalongwa ve, ve vi yandjele ovantu. Otjo e ve yandjela uke odhohi ndhoka mbali.

⁴²Wo avehe va lya, have kuta.

⁴³Ovalongwa va ongedha ovinyembu vyomingome novyodhohi, have yulitha odhombwe omulongo nambali.

⁴⁴Ovantu mboka mbava lile omingome, va li ovalumentu omayovi atano.

⁴⁵Iya Jesus wa ulumithile dhivadhiva ovalongwa ve, va ka londe mowato, va tenge tjikoohehinya tjelunga koBetsaida, tainkolo ye ma lekele owingi wovantu.

⁴⁶Kon̯ima yoku ve lekela, wa londa kondundu oku ka kumba.

⁴⁷Okawiiwii hika wile pohi, owato wa li mokati kelunga, ye wa li aika kombanda.

⁴⁸Ye wa mona okutya wo va li amava liya noudheu, mena lyokutya ombepo yomakuthikuthi ya li amai ve tono movipala. Momahuka Jesus we ya kuwo ama ende kombanda yomeva. Wa li ama hala oku ve pon̯oka.

⁴⁹Iya wo hive mu mono ama ende kombanda yomeva, va li amava tya pamo otjilulu, hava kuu.

⁵⁰Wo avehe va tilile, hive mu mono. Iya Jesus we ve popitha dhivadhiva ha tyaa: “Koleken̯i, hámu tila, aame!”

⁵¹Iya ye wa ya kuwo mowato, ombepo yomakuthikuthi hai nyimi. Ovalongwa va kuminwe unene.

⁵²Iya wo otjipuka tjomingome kave tji konekele nawa, okutya omitima vyawo vya li avya kukuta.

⁵³Jesus novalongwa ve hiva yauka, ve ya koGenesaret, hava hweenetha owato kontyo.

⁵⁴Iya hiva dhi mo mowato, ovantu ve mu dhimbuka dhiva.

⁵⁵Wo va handjana notjit̯indwalongo atjihe, hava ka eta ovavedhi, have ve tjindi kovintali, have ve twala kompuka hoka huva tee okutya Jesus oko e li.

⁵⁶Iya apehe mpoka mpaa ya, moulongo ne movitungwalongo ne modhohambo, ovantu va eta ovavedhi vawo pomaonganeno. Wo ve mu kumba, e ve itavele nandaku tiwa okut̯in̯a vala kovilyo vyomudhalo we. Avehe mboka mbave u t̯in̯a va veluka.