Read zemba Lukas 1 Bible Online

Lukas 1 - zemba bible

Lukas 1

¹Ovasoneki ovengi va uta okutunga otjihipululo tjovipuka mbyoka mbyaa ningwa mokati ketu,

²ngahi twe vi thiilwa kodhombangi dholutenga nokovalongethi wodhondaka dhaKalunga.

³Teofilus omutumbalekwa, himba thongonona ovipuka avihe okudha keutilo, mba mono okutya tji li nawa naame wo ndji ku sonekele vyo mokuliyondja kwavyo,

⁴opo u iwe nawa otjatjili mumbyoka mbiwa heelwa.

⁵Potembu yaHerodes, ohamba yaJudea, kwa li aku na omuyambethi nguu tiwa oSakaria, owomotjilombo tjovayambethi tjaAbia nomukadhintu we womovana vaAron nguu tiwa oElisabet.

⁶Wo aveevali va li ov avyuuki kotjipala tjaKalunga, kava li ave na otjipo mokweenda movitumino avihe nomomaheelo aMuhona.

⁷Iya wo va li ahave na ondele, mena lyokutya Elisabet wa li ompange, wo aveevali va li ava kulupa.

⁸Etango limo Sakaria hiaa li ama undapa ovilinga vyouyambethi kotjipala tjaKalunga molenda yotjilombo tje,

⁹wa holowolwa patjiholowoletho ngahi va ninga monteto youyambethi, a ka twiimin̯e motempeli yaMuhona.

¹⁰Engundwa lyovantu lya li pondje, amali kumbu powola yetwiimin̯o.

¹¹Omweengeli waMuhona we mu hololokela aa kulama kokulyo kwotjiyambelo tjokutwiimin̯ina.

¹²Sakaria wa tila hiee mu mono, nowoma we ya muye.

¹³Iya omweengeli we mu heela ha tyaa: “Sakaria, hó tila, mena lyokutya okukumba kwoye kwa teeka, omukadhintu woye Elisabet me ku yumukile omudhantu, mo ke mu luka Johannes.

¹⁴Ove mo kala au na ehuluko nondolo, novengi mave ke hulukilwa eyumuko lye,

¹⁵mena lyokutya ma ka kala omunene kotjipala tjaMuhona. Ovinyu novipyalukithi kee vi nu. Me yulithwa Ombepo Ondhilikwa, tainkolo ama dhi medhimo lyaina.

¹⁶Ovaisraeli ovengi me ke ve tjun̯a kuMuhona, Kalunga kawo.

¹⁷Oye ma tenge kuMuhona ae na ombepo nodhonkono dhaElia, omienyo vyooihe me vi tjun̯a kovana, mbahava itavele me ve tjun̯a kodhondunge dhovavyuuki, opo a longekedhele ovantu okuya kuMuhona.”

¹⁸Sakaria wa yaka omweengeli ha tyaa: “Hika me tji iwa vi? Ame mba kulupa, nomukadhintu wandje wa kulupa.”

¹⁹Omweengeli we mu yaka ha tyaa: “Aame Gabriel ngundji kulama kotjipala tjaKalunga. Mba tumwa, ndji ku popithe, ndji ku teethele ondaka hendji ombwa.

²⁰Iya taa tuutuu, mo pata ondaka, koo popi tee etango ndyoka ovipuka hembi mavi ningwa, mena lyokutya wa tombo odhondaka dhandje ndhimadhi ka hwithilwa po potembu yadho.”

²¹Ovantu va li ko okukevelela Sakaria, have kumwa, mena lyokutya wa kala mo olule unene motempeli.

²²Iya hiaa dhi mo, kaa li ama popi. Ovantu hava koneke okutya wa mono emoneko motempeli. Sakaria we ve kon̯ona, iya ye wa kala aa pata ondaka.

²³Omatango e okuundapa ovilinga vyouyambethi hiaa pu ko, wa tjuna konganda ye.

²⁴Kon̯ima yomatango ngoka, omukadhintu we Elisabet wa ila omut̯imba, we liholeka omiedhi vitano, ha tyaa:

²⁵“Muhona hehi otjo a ndingila momatango henga. Wa nt̯ila onkenda, ha ndjitha omutomba mokati kovantu.”

²⁶Elisabet hiaa ile omut̯imba womiedhi epandu, Kalunga wa tuma omweengeli Gabriel a ende kondolopa yaGalilea ndjii tiwa oNasaret.

²⁷Gabriel wa tumwa, a ende komuthukona wongendjo nguu tiwa oMaria, ngwaa nepelwe olukupo kuJosef, owomoluyumuko lwohamba David.

²⁸Omweengeli hiee ya puMaria, we mu heela ha tyaa: “Okupopithwa, nguwa t̯ilwa onkenda! Muhona nga kale naove, ye nge ku pe elao.”

²⁹Maria wa li ae ihamenwa kodhondaka ndhoka, ye ha sokolola epopitho ndyoka okutya mali tya vi.

³⁰Omweengeli we mu heela ha tyaa: “Maria, hó tila. Ove wa t̯ilwa onkenda kuKalunga.

³¹Taa tuutuu ove mo ka ila omut̯imba, ho ka yumuka omudhantu, ke mu luke Jesus.

³²Ma ka kala omunene, ha ka ithanwa Omunwa Owokombandambanda. Muhona Kalunga me ke mu pa otjipundi tjouhamba waihe David.

³³Ma ka ninga ohamba yeanda lyaJakob tee apehe, nouhamba we kaauya hulu.”

³⁴Maria wa pula omweengeli ha tyaa: “Hehi matji ka ningwa vi, ame andji li omuthukona wongendjo?”

³⁵Omweengeli we mu yaka ha tyaa: “Ombepo Ondhilikwa mai ku wilile, nodhonkono dhahengu Owokombandambanda madhi ku tjikile, iya mena lyanyahoka omuyumukwa ngu omudhilikwa ma ka ithanwa OmunwaKalunga.

³⁶Taa tuutuu, Elisabet owen̯i, ngoka nguu tiwa ompange, wa ila omut̯imba wokadhantu moukulupe we. Omwedhi hembu we omutyapandu,

³⁷mena lyokutya Kalunga kaa anyenwa kutja.”

³⁸Maria wa yaka ha tyaa: “Ame ndjimuntu waMuhona, nge ningwe ngahi wa hee.” Omweengeli wa dha po puye, ha i.

³⁹Maria pomatango ngenya wa kulama, ha i ama kanyauka kondolopa imo yomotjilongo tjomaluvanda tjaJudea.

⁴⁰Iya wa thika monganda yaSakaria, ha popitha Elisabet.

⁴¹Elisabet hiaa tee ondaka yaMaria, ompepe medhimo hai nyunguta. Elisabet we yulithwa Ombepo Ondhilikwa,

⁴²ha popi peulu ha tyaa: “Ove wa pewa elao mokati kovakadhintu, nanguma yumukwa kwoove ma ka pewa elao!

⁴³Tja ndhile pi, ina yaMuhona wandje okuya kwaame?

⁴⁴Mena lyokutya ondaka yoye hiye thiki momatwi andje, edhimo lyandje lya nyunguta kehuluko.

⁴⁵Omunalao onguma itavele okutya Muhona hiee mu heele, matji ningwa.”

⁴⁶Maria wa popya ha tyaa: “Omwenyo wandje mau hivilike Muhona,

⁴⁷nombepo yandje mai hulukilwa Kalunga, Omuhupithi wandje,

⁴⁸mena lyokutya wa tala outhupi womuntu we. Okudha hempa omakula aehe maa ntyaa ndjimunalao,

⁴⁹mena lyokutya Omunadhonkono wa ndingila ovipuka ovinene. Ena lye olyo li li edhilikwa,

⁵⁰net̯ilonkenda lye mali kala koluyumuko noluyumuko kumboka mbave mu tila.

⁵¹Ye wa undapa ovilingankono nokuwoko kwe, wa han̯auna po mbava li nomalipulo okulinoma momitima vyawo.

⁵²Ovatumini we ve yundula pomalukalo, ha nenepetha ovathupi.

⁵³Ovat̯andjala we ve kutitha novipuka oviwa, ovahona we ve taata po vala.

⁵⁴Wa tambula Israel, omuntu we, opo a thipaluke et̯ilonkenda lye

⁵⁵kuAbraham nokoluyumuko lwe katee apehe ngahi a heela ootate.”

⁵⁶Maria we mu valulila po omiedhi vitatu, tjau ha tjuna koyawo.

⁵⁷Otembu yaElisabet yokuyumuka hiye thiki, wa yumuka omudhantu.

⁵⁸Ovalaanganda ve novawo hiva tee, Muhona hiee mu yulikile et̯ilonkenda lye enene, ve hulukwa pamo naye.

⁵⁹Etango etyapandutatu ve ya, va ka pitithe ondele etanda. Va halele oku mu luka ena lyaihe Sakaria.

⁶⁰Ina wa yaka ha tyaa: “Aai, nga lukwe Johannes.”

⁶¹Wo hava tyaa: “Meanda lyen̯i kamu na tja umo nguu na ena hendi.”

⁶²Va kon̯ona ihe Sakaria, have mu pula okutya ondele ma hala oku mu luka an̯i.

⁶³Ye wa kumba okapelende, ha soneke mo hinyahi: “Ena lye oJohannes.” Avehe va li ave kumwa.

⁶⁴Poluvedhe lwatjo vala mpoka elaka lyaSakaria lya patuluka, ha utu okupopya, ye ha hivilike Kalunga.

⁶⁵Avehe owomoulaanganda va vadhwa kowoma, otjilongo atjihe tjomaluvanda tjaJudea tja hipululilwa avihe hembi mbyaa ningwa.

⁶⁶Avehe mbave tji tyaa, ve lipula tjo momitima vyawo hava tyaa: “Iya ondele hengu ma ka ninga omuntu patji?” Iinga, okuwoko kwaMuhona kwa li pamo naye.

⁶⁷Ihe Sakaria we yulithwa Ombepo Ondhilikwa, wa popya ha tyaa:

⁶⁸“Muhona, Kalunga kaIsrael, nga tumbalekwe, mena lyokutya we ya okukutulula nokuhupitha otjiwan̯a tje.

⁶⁹Ye we tu pa Omuhupithi ombandhi ngwaa dha meanda lyomuntu we David,

⁷⁰ngahi a popya okupitila movinyo vyovaprofeti ovadhilikwa potembu youye walukulu

⁷¹okutya we tu hupitha kodhondjedhi dhetu nomomawoko ovantu avehe mboka mbave tu yele,

⁷²opo a yulikile ootateombwale onkenda nokuthipaluka ewaneneno lye edhilikwa,

⁷³eano ndyoka ndyaa anenene tate Abraham,

⁷⁴e tu hupithe momawoko odhondjedhi dhetu, ye e tu pe oluvedhe, atwa hupithwa tu mu undapele ahatu na owoma.

⁷⁵Tu mu undapele mouvyuuki nomoudhilikwa kotjipala tje omatango etu aehe.

⁷⁶Ndele yandje, mo ka ithanwa omuprofeti wangoka Owokombandambanda, mena lyokutya ove mo ka tenga oku mu undapela odhondjila dhe, tainkolo Muhona aheye ya,

⁷⁷u longe ovantu ve okwiiwa ehupitho okupitila meithepo lyodhonkali dhawo,

⁷⁸mena lyokutya Kalunga ketu u na onkenda nolweembya. Oye me tu tumine otjiten̯i tjehupitho,

⁷⁹himatji tungatele ovantu mboka mbave li met̯iku nomotjidhidhimbe tjet̯o, tji vyuukithe odhompadhi dhetu mondjila youwa.”

⁸⁰Ondele wa kula, ha kolo pambepo, wa kala mokuti katee etango ndyoka ndyee liholololela Ovaisraeli.