Read zemba Lukas 10 Bible Online

Lukas 10 - zemba bible

Lukas 10

¹Kon̯ima yovipuka mbyoka Muhona wa holowola uke ovalongwa omilongo epanduvali navavali,[5] he ve tumu vavali navavali, va tenge komeho kondolopa aihe nopoluvedhe mpoka omwene mpaa li ama hala okuya.

²Ye we ve heela ha tyaa: “Ovilya ovingi, atjaa ovaundapi ovanunu. Iya kumben̯i omwene wovilya a tume ovaundapi keteyo lye.

³Enden̯i! Me mu tumu ngodhondjona mokati komaungu.

⁴Hámu tjindi okapapo kodhombongo, handjato, hadhongaku. Hámu popi nomuntu mondjila nokanunu.

⁵Iya amwa i monganda, olutenga tyen̯ii: ‘Ouwa ngau kale monganda hendji.’

⁶Iya andaa mu na omuntu nguu na ouwa, ndino ouwa wen̯i mau tjikile omuntu ngoka, iya andaa kamu na tja, ouwa wen̯i mau mu tjunine n̯e ovene.

⁷Monganda moka ngamo mu kala, mu lye, n̯e mu nwe soka himave mu pa, mena lyokutya omuundapi wa thele okupewa ondjambi ye. Hámu dhamauka nodhonganda.

⁸Amwa i mondolopa, wo have mu tambula, lyen̯i soka himave mu pa.

⁹Velulen̯i ovavedhi motjilongo moka, n̯e mu heele ovantu mu tyee: ‘Otjilongo tjaKalunga tje ya popedhi nan̯e.’

¹⁰Iya mondolopa aihe mumamu ya, ahave mu tambulile, enden̯i momivanda vyayo, mu tyee:

¹¹‘Nan̯i nombuma yomondolopa yen̯i ndjaa kakatele kodhompadhi dhetu, matu mu pupulile yo, iya kalen̯i amu tji i okutya otjilongo tjaKalunga tje ya popedhi.’

¹²Ame me mu heele okutya Sodom matji ka kala hahe okupon̯a ondolopa ndjoka metango lyekoyo.

¹³“Utatyei, ove Korasin! Utatyei, ove Betsaida! Iya ngaile moTiro nomoSidon omo mwa ningilwa ovilingankono mbyoka mbyaa ningilwa moyen̯i, mbenya ngaile ve liteyulula ae lukulu, hava kala pohi modhosaku nomomuto.[6]

¹⁴Iya Tiro naSidon mavi ka kala hahe oku mu pon̯a metango ndyoka lyekoyo.

¹⁵Naove, Kapernaum, mo tya pamo mo ka yelelwa meulu? Mo ka thothononenwa motjovat̯e.”

¹⁶Jesus wa heela ovalongwa ve ha tyaa: “Ngoka ngume mu tee, naame ma ntee; ngume mu tombo, naame ma ntombo; nguma ntombo, ma tombo ngoka ngwaa ntuma.”

¹⁷Ovalongwa mbenya omilongo epanduvali navavali va tjuna nehuluko, hava tyaa: “Muhona, nyoo odhondemoni dhe tu tee mena lyoye.”

¹⁸Jesus we ve heela ha tyaa: “Mba mono Satana ngwaa u meulu ngolukeno.

¹⁹N̯e me mu pa odhonkono okulyata odhonyoka nodhonge nokutumina odhonkono adhihe dhaSatana, ko kaku na tja soka himatji mu ihameke.

²⁰Iya hámu hulukilwa odhombepo himadhi mu tee, iya hulukilwen̯i mena lyokutya omana en̯i a sonekwa membo lyomeulu.”

²¹Potembu ndjoka Jesus we hulukithwa unene kOmbepo Ondhilikwa ha tyaa: “Taa, Muhona weulu nowohi, me ku hivilike, mena lyokutya ovipuka hembi we vi holeka ovanongo novanadhondunge, ho vi holololele mboka mbava ngala odhondele. Iinga, Taa, hehi otjo tje ku thevelwa.

²²“Ovipuka avihe mbe vi pewa kuTate. Kaku na tja nguu i Omuna kakele vala kaTate, ko kaku na tja nguu i Tate kakele vala kOmuna, nangoka Omuna nguma hala oku mu holololela ye.”

²³Iya Jesus wa pilulukila kovalongwa ve, hawo a heela vala ha tyaa: “Omeho ngamaa mono ovipuka hembi mbimamu tala, e na elao.

²⁴Iya me mu heele okutya ovaprofeti ovengi nodhohamba va halele okumona ovipuka mbimu lwete, iya kave vi mwene, nokutyaa ovipuka mbimu tyaa, atjaa kave vi teele.”

²⁵Iya omulongiveta umo wa kulama, ha lolo Jesus ha tyaa: “Mulongethi, nge ninge tji, opo ndji mone omwenyo waapehe?”

²⁶Jesus we mu pula ha tyaa: “Moveta mwa sonekwa tji? U tanga mo vi?”

²⁷Omulumentu we mu yaka ha tyaa: “ ‘Kala au hole Muhona Kalunga koye komutima woye auhe nokomwenyo woye auhe nokodhonkono dhoye adhihe nokodhondunge dhoye adhihe, kala au hole omukwen̯i ngahi u lihole omwene.’ ”

²⁸Jesus we mu yaka ha tyaa: “Wa yaka nawa. Tji hwithila po ove u kale nomwenyo.”

²⁹Ngunya wa li ama hala okulitaletha ouvyuuki, ha pula Jesus ha tyaa: “Omukwetu aan̯i?”

³⁰Jesus we mu yaka ha tyaa: “Kwa li omulumentu umo ngwaa dhile moJerusalem, ha vyuuka koJeriko. Wa wila momawoko ovapundi, ve mu dhula, have mu tono, ha topoka oviwalo. Iya wo ve mu thiaa nokathamwenyo, hava i.

³¹Omuyambethi umo wa vadhwa ama ende mondjila ndjoka, hiee mu mono, he mu kondoloka.

³²Iya nOmulevi hiee ya pompuka mpoka, we mu mona, hiee mu mono, he mu kondoloka.

³³Omusamaria umo ngwaa vadhwa ama ende mondjila ndjoka, hiee ya po, we mu mona, he mu t̯ile onkenda.

³⁴Wa ya kuye, ha kutu oviwalo vye, ha tile po omadhi novinyu. We mu kavilitha konkutwa ye, he mu twala kondjuwo yovayenda, he mu hungu.

³⁵Iya ngamuhuka wa itha mo odhondenari mbali, he dhi yandja komwene wondjuwo yovayenda, ha tyaa: ‘Mu hunga, ahadhi hulile, me ya oku ku pa, hime tjuna.’

³⁶“Iya modhondunge dhoye, oun̯i muhemba vatatu ngwaa li omukwawo womulumentu ngoka ngwaa wila momawoko ovapundi?”

³⁷Omulongiveta wa yaka ha tyaa: “Ongwee mu t̯ile onkenda.” Jesus we mu yaka ha tyaa: “Naove enda, u ka ninge nyahoka.”

³⁸Iya hiva hweene ko uke, Jesus we ya mokalongo kamo mumwa li omukadhintu nguu tiwa oMarta, he mu yakula monganda ye.

³⁹Ye wa li nomunitje Maria, ngoka ngwaa li vala aa kala pohi podhompadhi dhaJesus nokuteelela odhondaka dhe.

⁴⁰Iya Marta wa li ae ihamenwa okutelekela ovayenda. We ya kuJesus ha tyaa: “Muhona, ku na ko natja nan̯i omunitjandje hihama nteleketha ko? Mu heela, a mpopile!”

⁴¹Muhona we mu yaka ha tyaa: “Marta, Marta, mo lipa otjiho nokulingwangwaneka movipuka ovingi.

⁴²Iya himatji halwa itjimo vala hitji na otjilinga. Maria we liholowolela otjipuka otjiwa, hihama nyekwa.”