Read zemba Lukas 14 Bible Online

Lukas 14 - zemba bible

Lukas 14

¹Iya Esabati limo Jesus hiaa i monganda yomunene umo owOvafarisai okulya, va li amave mu talele nawa.

²Iya pompuka mpoka Jesus mpaa li, pa li omulumentu ngwaa vela othulo.

³Jesus wa uta okupopya, ha pula ovalongiveta nOvafarisai ha tyaa: “Tja itavelwa tuu okuvelula omuntu metango lyEsabati ne katji itavelelwe?”

⁴Iya wo va nyima vala thiluu. Jesus wa itha po omulumentu ngoka, he mu velula, tjau ha tya, nga ende.

⁵We ve heela ha tyaa: “Aan̯i mun̯e nguu na omuna ne ongombe, hai wile mondjombo, kee i nana mo dhivadhiva nandaku tiwa ometango lyEsabati?”

⁶Wo kava ulile oku mu yaka motjipuka hehi.

⁷Jesus hiaa mono ovayenda hive liholowolele ovipundi vyokomeho, we ve heela eeli ha tyaa:

⁸“Andaa ku na ngwee ku kongo kotjipito tjolukupo, hó kala pohi kotjipundi tjokomeho, pamo pe na omuyenda umo ngoka ngwee ku pon̯a,

⁹omwene wotjipito hime ya, mpe ma tyaa: ‘Yandja otjipundi tjoye kuhengu.’ Iya mo dhi po nolukundo, ho ka kala pohi kotjipundi tjokon̯ima.

¹⁰Iya andaa wa kongwa ko, kala pohi kotjipundi tjokon̯ima, opo omwene wotjipito hime ya, ae ku mono, a tyee: ‘Epanga lyandje, hweena komeho.’ Iya mo tumbalekwa movipathi vyovantu avehe mbave li pamo naove pokulya.

¹¹Iya auhe ngoka ngume linenepeke, ma nunupikwa, nangume linunupike, ma nenepekwa.”

¹²Iya Jesus wa heela wo ngoka ngwee mu konga ha tyaa: “Andaa mo hala okukonga ovantu komalyaalyo, hó kongo omapanga oye ne ovakuloye ne ovanitjoye ne oven̯i ne ovalaanganda woye ovahona, opo háve ku kongo wo, wo ve ku thute nyahoka.

¹³Iya andaa u na otjipito tjomalyaalyo, konga ovathona novilema novapot̯i.

¹⁴Iya mo ningi omunalao, mena lyokutya mboka kave na himave ku thutu. Mo ka thutwa kuKalunga meimuko lyovavyuuki.”

¹⁵Iya umo owomovayenda mbava li amava li pamo naJesus hiaa tee ovipuka mbyoka mbyaa popiwa kuJesus, we mu heela ha tyaa: “Omunalao oye ngoka nguma ka lya omungome motjilongo tjaKalunga.”

¹⁶Iya Jesus we mu heela ha tyaa: “Omulumentu umo wa teleka omalyaalyo otjipito otjinene, ha kongo ovantu ovengi.

¹⁷Iya powola yotjipito wa tuma omupika we, a ka heele ovakongwa a tyee: ‘Indjen̯i, mena lyokutya ovipuka avihe vya longekedhwa, vya pu.’

¹⁸Wo avehe naa vala va uta okwaanya. Owolutenga we mu heela ha tyaa: ‘Ame mba landa otjana, me hala oku ke tji tala, alikana hí po.’

¹⁹Omukwawo we mu heela ha tyaa: ‘Ame mba landa odhonani dhodhokanga ntano, me hala oku ke dhi lola, alikana hí po.’

²⁰Nomukwawo uke we mu heela ha tyaa: ‘Ame opo mba kupu, híme ulu okuya.’

²¹“Omupika wa tjuna, ha ka hipululila omuhona we ovipuka hembi avihe. Iya omwene wonganda wa yumana, ha heele omupika we ha tyaa: ‘Kanyauka, enda komivanda nokodhondjila dhomondolopa, ka ete ovathona novilema novapot̯i novingolomena.’

²²Omupika we mu yaka ha tyaa: ‘Muhona, mba ningi ngahi wa ntjeele, iya atjaa nanapano pe na oluvedhe.’

²³Omuhona wa heela omupika we ha tyaa: ‘Enda kodhondjila nokomivanda, u ve tumin̯in̯e ve ye, onganda yandje opo i yule.

²⁴Me mu heele okutya kaku na tja omuntu noumo movalumentu hembenya mbava ithanenwe, nguma ka makela omalyaalyo motjipito tjandje.’ ”

²⁵Iya owingi wovantu wa enda pamo naJesus. Ye wa pilulukila kuwo ha tyaa:

²⁶“Andaa pe na omuntu ngume ya kwaame, ye ahama kala ae yele ina naihe[7] nomukadhintu we novana novakulwe novanitje ovadhantu novakadhona naye omwene wo, kaa ulu okwiila omulongwa wandje.

²⁷Iya nguhama tjindi omutjaakano we, ye ahama ndandula, kaa ulu okukala omulongwa wandje.

²⁸“Andaa umo owomun̯e ma hala okutunga ondjuwo ndjaa ya pokatangaulu, olutenga kaa kala pohi, ha hava okutya mai pula hitji lithike pi, ye a tale andaa u na odhombongo ndhaa hulu oku i tunga katee mai pu?

²⁹Mena lyokutya nda tungu ekulameno, ye ha anyenwa oku i mana, avehe mbave mu mona, mava utu oku mu yola

³⁰hava tyaa: ‘Omuntu hengu wa uta okutunga, iya wa anyenwa oku i mana.’

³¹“Ne andaa ku na ohamba ndjimai i kovita okulwitha ohamba imo, olutenga kaa kala pohi okusokolola, andaa ma ulu nomayovi e omulongo umo oku ka lwa nahengunya nguu na omayovi omilongo vivali?

³²Andaa kee tji ulu, ma tumu ko odhontumwa oku mu kumba ouwa, tainkolo ae li kokule.

³³Iya auhe owomun̯e nguhama yetha ovipuka vye avihe mbyee na vyo, kaa ulu okukala omulongwa wandje.

³⁴“Omungwa otjipuka otjiwa, iya andaa wa hahuka, mau tovalethwa natji?

³⁵Kaau thevelwa motjana ne mombumbi, mau yekelwahi vala kotjila. Ngoka nguu na omatwi okutyaa, nga tyee.”