Read zemba Lukas 18 Bible Online

Lukas 18 - zemba bible

Lukas 18

¹Iya Jesus wa heela ovalongwa ve eeli okutya ngava kumbe apehe, háva poyola.

²We ve heela ha tyaa: “Mondolopa imo mwa li omukoyi wodhondaka nguha tila Kalunga, ye nguha tumbaleke ovantu.

³Mondolopa moka mwa li wo omuhepe, we ya kuye, he mu heele ha tyaa: ‘Mpopila ndje, u nkoyele omukondjethi wandje.’

⁴Pa pita otembu onde omukoyi ahama hala, iya kon̯ima we lipopila momutima we ha tyaa: ‘Nandaku tiwa hí tila Kalunga, ame hí tumbaleke ovantu,

⁵me hala okukoyela omuhepe hengu, mena lyokutya wa ndjetela oudheu, opo há ndweyeke.’ ”

⁶Muhona we ve heela ha tyaa: “Teelelen̯i omukoyi hengu onkembi, hima hee.

⁷Iya Kalunga mpaeli kaa koyele mouvyuuki ovaholowolwa ve mbave mu ithana omutenya nout̯iku? Kalunga ma t̯i outheno oku ve popila ngaile?

⁸Me mu heele okutya Kalunga me ve ningile tjo dhiva. Iya Omuna wOmuntu hime ya, ma vadha ko tuu eitavelo kombanda yohi?”

⁹Iya eeli hendi Jesus we li hipululila wo ovantu vamo mbava tomba ovakwawo, wo mbave liun̯ika ovene okutya ovavyuuki.

¹⁰“Ovalumentu vavali va ya motempeli oku ka kumba, umo Omufarisai nomukwawo omuthendelethi.

¹¹“Iya Omufarisai wa kulama ontali, he lipelele, wa kumba ha tyaa: ‘Kalunga, me ku pandula, mena lyokutya ame hí ngala ovantu vamo mbava nyeka, mbava punda, mbave hole ovihulo ne ngomuthendelethi hengu.

¹²Ame ndji litjaela ovikulya tuvali motjivike, ndji yandja ovityamulongo movipuka avihe mbindji mona.’

¹³“Iya omuthendelethi wa kulama kokule, ye kaa li ama hala okuyela omeho keulu. We likambula pomutima ha tyaa: ‘Kalunga, nt̯ila ndje onkenda, ame ndjimulundhi.’

¹⁴Me mu heele okutya hengu wa tjuna koyawo, ae na ouvyuuki mbwaa pon̯a owOmufarisai. Iya auhe ngoka ngume linenepeke, ma nunupikwa, nangoka ngume linunupike, ma nenepekwa.”

¹⁵Iya ovantu va eta oupepe kuJesus e u t̯in̯e, atjaa ovalongwa hive tji mono, va tjaela mboka mbava li amava eta oupepe.

¹⁶Iya Jesus wa ithana oulele, u ye kuye, ha tyaa: “Yethen̯i oulele, u ye kwaame, hámu u tjaele, mena lyokutya otjilongo tjaKalunga otjovantu mbava ngala oulele hembu.

¹⁷Ame me mu heele otjatjili okutya nguhama tambula otjilongo tjaKalunga ngokalele, kaa i mo.”

¹⁸Omunene umo wOvajuda wa pula Jesus ha tyaa: “Mulongethi omuwa, mba thele okuninga tji, ndji mone omwenyo waapehe?”

¹⁹Jesus we mu yaka ha tyaa: “Omena lyatji mo ntya ndjimuwa? Kaku na tja uke omuntu omuwa, Kalunga oye e li vala aika omuwa.

²⁰Ovitumino u vi i: ‘Hó yono olukupo, hó dhipaa, hó vaka, hó kuminine, tumbaleka iho nanyoko.’ ”

²¹Omulumentu we mu yaka ha tyaa: “Ovipuka avihe hembi mbe vi takametha okudha koudhantu wandje.”

²²Jesus hiee tji tee, we mu heela ha tyaa: “Wa kambetha po otjipuka tjimo. Enda, u ka landethe po ovipuka vyoye avihe mbyuu na vyo, ove u vi yandje kovathona. Iya ove u kale nemona meulu, tjau ove u ye, u ndandule.”

²³Hiaa tee odhondaka ndhoka, wa li ae etetha onkenda, mena lyokutya wa li omuhona unene.

²⁴Jesus hiaa mono okutya omuhona u yuvite oudheu, we mu heela ha tyaa: “Oudheu vi kumbave na ouhona okuya motjilongo tjaKalunga!

²⁵Ongamelu okupitila meyulu lyonguya otjipu okupon̯a omuhona okuya motjilongo tjaKalunga.”

²⁶Ovalongwa hiva tee odhondaka ndhoka hava tyaa: “Iya nan̯i nguma ulu okuhupithwa aan̯i?”

²⁷Jesus we ve yaka ha tyaa: “Ovipuka mbii anyena ovantu, kaavi anyene Kalunga.”

²⁸Petrus we mu heela ha tyaa: “Taa tuutuu, nt̯e twa thiaa po ovipuka vyetu, hatu ku landula.”

²⁹Jesus we ve heela ha tyaa: “Ame me mu heele otjatjili okutya kape na tja ngwaa thiaa po onganda ne omukadhintu ne ovanitje novakulwe ovadhantu ne odhompandje ne ovanene ve ne ovana mena lyotjilongo tjaKalunga,

³⁰ye a kale ngaile ahama pewa ovipuka ovingi mouye hembu, nomwenyo waapehe mouye mbumau ya.”

³¹Jesus wa itha po ovalongwa ve omulongo navavali, he ve heele ha tyaa: “Taa tuutuu, matu i kombanda koJerusalem, ovipuka avihe mbyaa sonekwa kovaprofeti ouhunga nOmuna wOmuntu, mavi ka hwithilwa po.

³²Iya ye ma ka yandjwa kovapaani, mave ke mu penya, mave ke mu tatetha, mave ke mu tjakela omate,

³³mave ke mu tona nodhosokoti, mave ke mu dhipaa, netango etyatatu ma ka imunwa kout̯e.”

³⁴Ovipuka hembi ovalongwa va li ahave vi yuvite nokanunu, odhondaka ndhoka ve dhi holekwa, wo kava teele ovipuka mbyoka mbyaa li amavi popiwa.

³⁵Etango limo Jesus hiaa li popedhi naJeriko, pa li omupot̯i ngwaa li aa kala pohi pontyo yondjila, ama kopo.

³⁶Hiaa tee owingi wovantu mbumau ende po, wa pula ha tyaa: “Otjitji soka?”

³⁷Wo ve mu heela hava tyaa: “OJesus Omunasareta ma ende po.”

³⁸Wa wololoka ha tyaa: “Jesus, MunwaDavid, nt̯ila ndje onkenda!”

³⁹Owolutenga ve mu anda a nyime, iya ngunya ha wololoka uke unene ha tyaa: “MunwaDavid, nt̯ila ndje onkenda!”

⁴⁰Iya Jesus wa kulama, he ve heele, ve mu ete kuye. Hiee ya popedhi, Jesus we mu pula ha tyaa:

⁴¹“Mo hala ndji ku ningile tji?” Omupot̯i we mu heela ha tyaa: “Muhona, me hala ndji twikuluke.”

⁴²Jesus we mu heela ha tyaa: “Twikuluka, eitavelo lyoye lye ku velula.”

⁴³Wa twikuluka vala powola yatjo ndjoka, he mu landula, ye ha tumbaleke Kalunga. Iya ovantu avehe mbave tji mona, va tumbaleka Kalunga.