Read zemba Lukas 19 Bible Online

Lukas 19 - zemba bible

Lukas 19

²Mwa li omulumentu nguu tiwa oSakeus. Wa li omunene wovathendelethi, ye wa li omuhona.

³Sakeus wa kala aa hala okumona Jesus, ye e mu iwe okutya aan̯i, atjaa mena lyowingi wovantu ke tjiivilwe oku mu mona, mena lyokutya wa li omuthupi momuthika.

⁴Ye wa ka dhamukila komeho yawo, ha londo komukuyu, opo e tjiiwe oku mu mona, mena lyokutya Jesus wa li ame ya okupita mpoka.

⁵Jesus hiee ya mpoka, wa vandamena komukuyu, he mu heele ha tyaa: “Sakeus, heluka dhiva, mena lyokutya me tha oku ka yuhala monganda yoye ndino hendi.”

⁶Ye wa heluka dhivadhiva, ha yakula Jesus nehuluko.

⁷Iya ovantu avehe mboka hive tji mono, va n̯umutula hava tyaa: “Wa ka yuhala koyomulumentu omulundhi.”

⁸Iya Sakeus wa kulama, ha heele Muhona ha tyaa: “Muhona, emona lyandje me li yandja pokati, limo me li yandja kovathona. Andaa ndji na ngoka ngumba kengelela ovipuka vye, me mu tjun̯ine tune.”

⁹Jesus we mu heela ha tyaa: “Iya ndino hendi onganda hendji ya mono ehupitho, mena lyokutya naove wo umunwaAbraham.

¹⁰Iya Omuna wOmuntu we ya okutaendha nokuhupitha mbava keka.”

¹¹Iya wo hiva li amava teelele ovipuka hembi, wa wedha ko uke eeli limo. Iya mena lyokutya wa li popedhi naJerusalem, ovantu va soka okutya otjilongo tjaKalunga matji ya dhiva.

¹²Jesus we ve heela ha tyaa: “Pa li omulumentu umo omuhona ngwaa ile kotjilongo tjokokule, a ka vyaalekwe ouhamba, ye a tjune.

¹³Wa ithana ovapika ve omulongo, he ve pa odhombongo dhotjingoldo[9] omulongo, ha tyaa: ‘Dhi ndingosen̯i katee me tjuna.’

¹⁴Iya ovantu womotjilongo tje va kala ave mu yele, have mu landulitha odhontumwa, hava tyaa: ‘Omulumentu ngoka kaatu mu hala, e tu tumine.’

¹⁵“Omuhona hiaa vyaalekwa ouhamba wa tjuna, ha ithana ovapika mbaa pele odhombongo, opo a tyee soka hiva nganyana mondingoso.

¹⁶Owolutenga we ya ha tyaa: ‘Taa, ombongo yoye ya nganyana odhombongo omulongo.’

¹⁷Omuhona we mu heela ha tyaa: ‘Iiya, oove omupika omuwa, mena lyokutya wa takametha movipuka ovinunu mo pewa okutumina ovitungwalongo omulongo.’

¹⁸Omutyavali we ya, ha tyaa: ‘Taa, ombongo yoye ya nganyana odhombongo ntano.’

¹⁹Iya nahengu wo omuhona we mu yaka ha tyaa: ‘Naove wo mo pewa okutumina ovitungwalongo vitano.’

²⁰“Nomukwawo we ya uke ha tyaa: ‘Taa, ombongo yoye hooyondji, mbe i kutila pokandjenga.

²¹Ame mbe ku tila, mena lyokutya ove umulumentu wotjipo. U itha po hího ungulile, u teya hího kunine.’

²²Omuhona we mu yaka ha tyaa: ‘Me ku koyo nodhondaka ndhaa dhi motjinyo tjoye, mupika ove omuvi! U ndji i okutya aame omulumentu wotjipo, ngundji itha po soka híhe ungulile, nokuteya soka híhe kunine.

²³Iya omena lyatji hího yandjele ombongo yandje kovandingosi, hime tjuna ndji i vadhe aya nganyana?’

²⁴“Iya omuhona wa heela mboka mbava li ava kulama ha tyaa: ‘Mu nyeken̯i ombongo ye, mu i pe ngoka nguu na omulongo.’

²⁵Wo hava tyaa: ‘Taa, hengu u na ae odhombongo omulongo.’

²⁶“Omuhona wa twikila ko uke ha tyaa: ‘Ame me mu heele okutya omuntu auhe nguu na tja, ma pewa otjingi unene, iya nguhe na tja, nahiee na tjo, me tji nyekwa.

²⁷Iya odhondjedhi dhandje hemba mbahamava hala ndji ve tumine, ve eten̯i huno mu ve dhipaele hempa momeho andje.’ ”

²⁸Jesus hiaa mana okupopya ovipuka hembi, wa ya nondjila ye ndjaa vyuuka koJerusalem.

²⁹Hiee ya popedhi poBetfage naBetania pondundu ndjii tiwa oyOmiholivi, wa tuma ovalongwa ve vavali,

³⁰ha tyaa: “Enden̯i kokalongo hake li komeho, amwe ya mo, mamu ka mona ombulona ndjaa kutwa, ndjihaiya kavilwa komuntu nokanunu, i kutululen̯i, n̯e mu i ete huno.

³¹Iya andaa pe na ngume mu pula ha tyaa: ‘Mamu i kutululile tji?’ Tyen̯ii: ‘Muhona me i hepa.’ ”

³²Ovalongwa mbava tumwa va ya, have tji mono ngahi va heelwa.

³³Iya tainkolo va li amava kutulula ombulona, ovene vayo ve ve pula hava tyaa: “Ombulona mamu i kutululile tji?”

³⁴Iya ve ve yaka hava tyaa: “Muhona me i hepa.”

³⁵Ve i eta kuJesus, hava twaa ko omidhalo vyawo komongo wombulona, Jesus hako ve mu kavilitha.

³⁶Jesus hiaa kavile, ovantu va yala omidhalo vyawo mondjila.

³⁷Iya hiaa thiki popedhi naJerusalem, mpoka ondjila mpai heluka okudha kOndundu yomiholivi, engundwa alihe lyovalongwa lya uta okutanga Kalunga nehuluko, hava wololoka peulu mena lyovilingankono avihe mbiva mona,

³⁸hava tyaa: “Ohamba ngume ya mena lyaMuhona nga tumbalekwe, ouwa ngau kale meulu, netumbalo kombandambanda.”

³⁹Ovafarisai vamo womowingi wovantu va heela Jesus hava tyaa: “Mulongethi, tjaela ovalongwa woye.”

⁴⁰Ye wa yaka ha tyaa: “Me mu heele okutya hemba andaa mava nyimi, omawe maa wololoka.”

⁴¹Jesus we ya popedhi notjitungwalongo, hiee tji mono, we tji lila,

⁴²ha tyaa: “Ove ngaile wa tangan̯eka ovipuka mbimavi thevelwa ouwa woye! Iya atjaa napano ove we vi holekwa.

⁴³Iya omatango mae ke ku vadha, katango odhondjedhi dhoye madhi ke ku vandela, hadhi ku twaa molunkombo, hadhi ku n̯in̯ikidha kodhontyo adhihe.

⁴⁴Mo ka kombwa po, ove nodhondele dhoye. Odhondjedhi dhoye kaadhi ka thiaa po nokanunu ewe limo ndyaa tendekwa kekwawo, mena lyokutya ove ku tangan̯ekele otembu yokutaendhwa kwoye kuKalunga.”

⁴⁵Jesus wa hita motempeli, ha utu okuta mo mboka mbava li amava landetha,

⁴⁶he ve heele ha tyaa: “Kwa sonekwa okutyaa: ‘Ondjuwo yandje ondjuwo yokukumbila.’ Iya n̯e mwe i ningi eleva lyovapundi.”

⁴⁷Ye wa li ae ve longa motempeli etango alihe, iya ovayambethi ovanene novalongiveta novanene wotjilongo ve mu taendha, ve mu dhipae,

⁴⁸atjaa kava mwene oluvedhe lwoku tji ninga, mena lyokutya ovantu avehe ve mu hopa, have mu teelele.