Read zemba Lukas 2 Bible Online

Lukas 2 - zemba bible

Lukas 2

¹Potembu ndjinya pa ningilwe otjitumino hitja dhile komukesari Augustus okutya ouye auhe ngau lisonekethe, u hawe.

²Elisoneketho hendi lya li olyolutenga ndyaa ningilwe, tainkolo Kireneus hiaa li omutumini wotjilongo tjaSiria.

³Ovantu avehe va ya, auhe e ke lisonekethe kondolopa yokoyawo.

⁴NaJosef wa kulama moGalilea mondolopa yaNasaret, ha i koJudea kondolopa yaDavid ndjii tiwa oBetlehem, mena lyokutya ye wa li owawo yaDavid.

⁵We ke lisoneketha pamo naMaria ngwaa nepelelwe olukupo, ngoka ngwaa li omut̯imba.

⁶Tainkolo hiva li hoka, otembu yaMaria yokuyumuka ye thika.

⁷Ye we livelipa omuna omudhantu. We mu dhingila movitopa, he mu laleke po momutemba wokulila ovipako, mena lyokutya mondjuwo yovayenda kava mwene mo oluvedhe.

⁸Kompuka hoka kwa li ovanahambo mbava li amava yungu odhondhu dhawo out̯iku mokuti.

⁹Omweengeli waMuhona we ya kuwo, elaimo lyaMuhona hali ve laimine, wo hava tila unene.

¹⁰Iya omweengeli waMuhona we ve heela ha tyaa: “Hámu tila, ame me mu teethele ondaka ombwa yehuluko enene ndyoka ndimali ningi olyovantu avehe.

¹¹Ndino hendi mwa yumukilwa Omuhupithi mondolopa yaDavid, oye e li Messias, Muhona.

¹²Iya etangan̯eko humamu mu tangan̯ekele hoolyondi: Mamu ka mona okapepe haka dhingilwa movitopa, ko haka lalekwa po momutemba wokulila ovipako.”

¹³Iya dhivadhiva pomweengeli ngoka pa li engundwa lyovaengeli womeulu, hava hivilike Kalunga hava tyaa:

¹⁴“Etumbalo olyaKalunga Owokombandambanda, nouwa kombanda yohi movantu mbaa hopa.”

¹⁵Iya ovaengeli hiva dhi po puwo, hiva tjuna meulu, ovanahambo ve liheela hava tyaa: “Tu enden̯i iya koBetlehem, tu ka tale hitja ningwa ko, Muhona hiee tu holololele.”

¹⁶Ovanahambo va ya amava kanyauka, hava mono Maria naJosef nokapepe haka lalekwa po momutemba wokulila ovipako.

¹⁷Iya ovanahambo hive ke mono, va hipululila Josef naMaria odhondaka ndhoka omweengeli ndhaa popya ouhunga nokapepe heha.

¹⁸Iya ovantu avehe mboka mbave tji tyaa, ve kuminwa ovipuka mbyoka mbiva hipululilwa kovanahambo.

¹⁹Iya Maria ovipuka hembi avihe we vi ungula momutima we.

²⁰Ovanahambo va tjuna amava hivilike nokutumbaleka Kalunga mena lyovipuka mbyoka mbiva tee nambiva mono, ngahi ve vi heelwa.

²¹Iya hipa piti omatango epandutatu, okapepe hoka ka pitithwa etanda, haka lukwa Jesus, ena ndyoka ndika lukwa komweengeli, tainkolo ahakeye ya medhimo lyaina.

²²Omatango okulikohola kwawo, ngoveta yaMoses himai popi, hiaa hulu, ondele ve mu twala koJerusalem, kotjipala tjaMuhona,

²³ngahi tja sonekwa moveta yaMuhona okutyaa: “Okadhantona akehe hamake livelipwa, ngaka dhilikilwe Muhona.”

²⁴Va ya, ve ke yandjele omayambo odhonguti mbali ne omadhilona odhonguti avali ngoveta yaMuhona himai popi.

²⁵Iya moJerusalem mwa li omuntu nguu tiwa oSimeon, wa li omuvyuuki nomutilikalunga, ngoka ngwaa kevelela ehupitho lyaIsrael. Ombepo Ondhilikwa ya li muye.

²⁶Iya wa heelwa kOmbepo Ondhilikwa okutya kaa t̯i, tainkolo aheya mona Messias yaMuhona.

²⁷Simeon wa etwa motempeli kOmbepo Ondhilikwa. Iya ovanene va eta Jesus va ninge ngoveta yaMoses himai popi.

²⁸Simeon we mu tjiika momawoko e, ha hivilike Kalunga ha tyaa:

²⁹“Muhona, napano iya mo lekele omuntu woye, a ende nouwa ngahi wa popile,

³⁰mena lyokutya ame mba mono nomeho andje ehupitho lyoye,

³¹ndiwa longekedhele movipathi vyovantu avehe,

³²notjiten̯i okuholololela ovapaani ehalo lyoye nokweeta etumbalo kotjiwan̯a tjoye Israel.”

³³Iya ina naihe ve kuminwa odhondaka ndhoka ndhaa popiwa kuSimeon.

³⁴Simeon we ve pa elao, ha heele ina Maria ha tyaa: “Taa tuutuu, hengu wa tuwa po okuputaletha nokwiimuna po ovengi womoIsrael, netangan̯eko hendi mali ka kondjethwa,

³⁵omalipulo ovengi a holololwe. Naove wo omwene omukonda mau ku twele momutima.”

³⁶Iya motempeli mwa li Anna, omuprofeti omuna waFanuel, womeanda lyaAsser. Wa li omunene. Hiaa kupwa, wa vadhwa ae li omuthukona wongendjo, ha kala nomulumentu we odhombula epanduvali.

³⁷Iya potembu ndjoka wa li omuhepe wodhombula omilongo epandutatu nane. Ye ka dhile mo nokoholo motempeli, iya wa undapela Kalunga out̯iku nomutenya ama kumbu, ye he litjaele ovikulya.

³⁸Iya powola yatjo tuu ndjoka, we ya po, ha hivilike Kalunga, ha hipulula okapepe kovantu avehe mboka mbava kevelela eyowoko lyaJerusalem.

³⁹Ovanene vaJesus hiva hwithile po ovipuka avihe vyoveta yaMuhona, va tjuna koGalilea, kondolopa yawo koNasaret.

⁴⁰Ondele wa kula, ha kolo pambepo, he yula ounongo, net̯ilonkenda lyaKalunga lya kala kombanda ye.

⁴¹Ovanene vaJesus nahi va ya koJerusalem ombula aihe kotjipito tjOpaasa.

⁴²Iya hiaa ningi odhombula omulongo nambali, va ya ko uke ngahi va ninga monkalo yawo yotjipito.

⁴³Omatango otjipito hiaa pu ko, va tjuna konganda, Jesus he thiwa moJerusalem, iya ovanene ve kava li ave tji i.

⁴⁴Iya va li amava tya pamo u li motjeendo tjovantu. Va enda otjikambo tjetango limo, have mu taendha mowoyawo nomovakwawo.

⁴⁵Iya hihave mu mwene mo, va tjuna koJerusalem oku ke mu taendha.

⁴⁶Iya hipa piti omatango atatu, ve mu vadha motempeli aa kala pohi mokati kovalongethi, ame ve teelele noku ve pula.

⁴⁷Iya mboka mbave mu teelela, ve kuminwa ounongo we nokuyaka kwe.

⁴⁸Ovanene ve hive mu mono, ve kumwa. Ina we mu pula ha tyaa: “Munwandje, otjitji hiwe tu ningile nyahika? Taa tuutuu, nt̯e naiho twe ku taendha, hatu etetha onkenda.”

⁴⁹Ye we ve yaka ha tyaa: “Mamu ntaendhele tji? Kamu tji i nan̯i okutya ame ndji tha okukala movipuka vyaTate?”

⁵⁰Iya wo va li ahave yuvite odhondaka ndhoka ndhee ve heela.

⁵¹Jesus wa itavela ovanene ve, ha tjuna nawo koNasaret. Ina wa ungula odhondaka ndhoka adhihe momutima we.

⁵²Jesus wa kula molutu nomodhondunge nomounongo, ha hopwa kuKalunga nokovantu.