Read zemba Lukas 21 Bible Online

Lukas 21 - zemba bible

Lukas 21

¹Jesus hiaa yumbu omeho, wa mona ovahona himava twaa mo motjikasa mumu tuwa mbimavi yambwa.

²Iya wa mona wo omuhepe omuthona ngwaa twaa mo oumbongo uvali.

³Iya we ve heela ha tyaa: “Me mu heele otjatjili: Omuhepe hengu omuthona wa twaa mo otjin̯ingi okupon̯a ovantu avehe.

⁴Iya ovantu avehe va twaa mo mbyoka ovyomovihupe vyawo, iya ye mouthona we, wa twaa mo atjihe hiaa li natjo.”

⁵Ovantu vamo va popya ouhunga notempeli hiya undwa nomawe ngee thewa novipuka mbyaa yandjwa otjali kuKalunga. Jesus we ve heela ha tyaa:

⁶“Omatango ngamae ya, ovipuka hembi mbimamu tala, kaape ke thiwa ewe ndyaa tendekwa kekwawo, háli kumuninwe po.”

⁷Iya wo ve mu pula hava tyaa: “Mulongethi, ovipuka hembi mavi ka ningwa nalun̯i? Iya etangan̯eko mali ka kala olyatji okutya hembi mavi ka ningwa?”

⁸Jesus we ve heela ha tyaa: “Lungamen̯i, ahamamu pukithwa, iya ovantu ovengi mave ke ya nena lyandje, wo have lityaa: ‘Aame,’ vamo hava tyaa: ‘Otembu ye thiki.’ Iya hámu ve landula.

⁹Iya andaa mwa ka tyaa ovita nodhondjaya, hámu tila, mena lyokutya hembi vi tha okutenga, atjaa ehulilo kaliye ya.”

¹⁰Iya we ve heela ha tyaa: “Otjiwan̯a matji ka lwitha otjiwan̯a otjikwawo, notjilongo matji ka lwitha otjilongo otjikwawo.

¹¹Pomaluvedhe nomaluvedhe ohi mai ka teketa unene, maku ke ya ondjala nomitjithi vyovintimba. Keulu maku ka kala omatangan̯eko omanene ngamaa tilitha.

¹²Iya ovipuka mbyoka tainkolo háviya ningwa, mave ke mu kambula, have mu taata. Mave ke mu twala modhosinagoga, have ke mu yedhilila mouliwoso, have mu twala kovipala vyodhohamba novyovatumini mena lyandje.

¹³Hehi matji mu pa oluvedhe mu ninge odhombangi dhokuntjipulula kuwo.

¹⁴Iya omitima vyen̯i hávi kala notjiho okutya mamu ke lipopila vi.

¹⁵Iya ame me ke mu pa himamu ka popya, nounongo mboka mbuhamau ulu okutethwa ombata, odhondjedhi dhen̯i adhihe madhi ka anyenwa oku mu yaka ne oku mu tetha ombata.

¹⁶Mamu ka welelekwa kovanene ven̯i, kovakulwen̯i, kovanitjen̯i, koven̯i nokomapanga en̯i, mu ka kambulwe, navamo owomun̯e mave ke mu dhipaetha.

¹⁷Ovantu avehe mava ka kala ave mu yele mena lyandje.

¹⁸Komitwe vyen̯i kaaku ka keka ondjutji noimo.

¹⁹Amamu likambulithile, mamu ka nganyana omwenyo.

²⁰“Iya himamu ka mona Jerusalem atja kondolokwa kovilombo vyovakwavita, iya tji iwen̯i okutya ehan̯auno lyatjo lye thiki.

²¹Iya mboka mbave li moJudea ngava inkolele kodhondundu. Mboka mbave li moJerusalem, ngava dhe mo, namboka mbave li kotjila tjaJerusalem, háva hiti mo,

²²iya omatango ngoka ooluyuma okuhwithila po omisonekwa avihe.

²³Utatyei ovat̯imba novamwali pomatango ngoka! Oudheu ounene mau kala kombanda yohi, noluyuma kotjiwan̯a hehi.

²⁴Iya mava ka dhipawa nomukonda, wo hava ka kambulwa, hava ka twalwa moupika koviwan̯a avihe, noviwan̯a mavi ka lyata Jerusalem, katee omatango oviwan̯a mbyoka maa hulu.

²⁵“Omatangan̯eko maa ka moneka metango, momwedhi nomodhonyothi. Ovantu avehe kombanda yohi mava ka kala nomahundjuwoma, wo hava ka tilithwa kokupopya kwelunga nokomakuthikuthi alyo.

²⁶Ovantu mokukevelela ovipuka mbyoka mbimavi vadha ohi, mava ka t̯a omukanku kowoma, mena lyokutya odhonkono dhomeulu madhi ka teketethwa.

²⁷Iya mava ka mona Omuna wOmuntu ame ya mekaka, ae na odhonkono netumbalo enene.

²⁸Iya hembi himavi ka uta okuningwa talen̯i peulu, mu yele omitwe vyen̯i, mena lyokutya ehupitho lyen̯i lya hweene popedhi.”

²⁹Jesus we ve heela eeli hendi ha tyaa: “Talen̯i omukuyu nomiti avihe.

³⁰Iya ovitho avya eta oluhapo, mu tji i okutya ovintola vi li popedhi.

³¹Iya nan̯e wo amamu mono ovipuka hembi amavi ya, iwen̯i okutya otjilongo tjaKalunga tje ya popedhi.

³²“Me mu heele otjatjili, ekula hendi kaali hulu, tainkolo ovipuka hembi avihe háviya ningwa.

³³Eulu nohi mavi hulu, iya odhondaka dhandje kaadhi hulu.

³⁴“Iya liyungen̯i, omienyo vyen̯i hávi ulithwa komalyaalyo nokepyalu nokounkolwe nokotjiho tjovikulya, etango ndyoka ahamali mu vadha ontukuluka ngomoo.

³⁵Iya mali ka vadha ovantu avehe kombanda yohi aihe.

³⁶Iya apehe kalen̯i amwa pathumuka n̯e mu kumbe, opo mu mona odhonkono okuyepa ovipuka mbyoka avihe mbimavi ka ningwa, nokukulama ontali kotjipala tjOmuna wOmuntu.”

³⁷Jesus komutenya u longa ovantu motempeli, iya out̯iku u ya kondundu ndjii tiwa oyOmiholivi.

³⁸Ovantu avehe va li ava pita omuhuka, hava i kotempeli oku mu teelela.