Read zemba Lukas 23 Bible Online

Lukas 23 - zemba bible

Lukas 23

¹Engundwa alihe lyovantu lya kulama, hali twala Jesus kuPilatus.

²Wo va uta oku mu pa onkali, hava tyaa: “Nguka twe mu mono ama pukitha otjiwan̯a tjetu, ma tjaele okuyandja elilimo komukesari, ye me litya oMessias, ohamba.”

³Pilatus we mu pula ha tyaa: “Oove ohamba yOvajuda?” Jesus wa yaka ha tyaa: “Iinga, otjo ngahi wa popi.”

⁴Iya Pilatus wa heela ovayambethi ovanene nowingi wovantu ha tyaa: “Ame hí lwete mo onkali momuntu hengu.”

⁵Iya wo va tetha vala ombata hava tyaa: “Ma hongaetha ovantu nelongo lye okudha koGalilea nomoJudea atjihe katee hempa.”

⁶Iya Pilatus hiee tji tee, wa pula omulumentu ngoka andaa Omugalilea.

⁷Hiaa tee okutya owomotjilongo tjaHerodes, we mu tuma kuHerodes, mena lyokutya naye wo wa li moJerusalem potembu hendjinya.

⁸Herodes hiaa mono Jesus, we hulukwa unene, mena lyokutya nalukulu nahi u hala oku mu mona, mena lyokutya we mu tyaa ae, u hala okumona otjilingatangan̯eko himatji ningwa kuJesus.

⁹We mu pulapula ovipuka ovingi, atjaa Jesus ke mu yakele.

¹⁰Ovayambethi novalongiveta va kulama, have mu pa onkali unene nodhonkono.

¹¹Iya Herodes novakwavita ve ve mu tomba, have mu penye. Ve mu dhaleka omudhalo omunene mbumau laima, have mu tjun̯a kuPilatus.

¹²Etango lyatjo ndyoka Herodes naPilatus otjo ve lihava oupanga, mena lyokutya lukulu pokati kawo pa li ovita.

¹³Pilatus wa ithanena pamo ovayambethi ovanene novanene wotjilongo novantu vamo,

¹⁴he ve heele ha tyaa: “Mwa eta omuntu hengu kwaame, mwa tya omutyolethi wovantu, napano mbe mu pula movipathi vyen̯i, iya muye hí mwene mo onkali nokanunu ndjimamu mu koyele.

¹⁵NaHerodes ke mu mwene onkali, iya we mu tjun̯a kunt̯e. Omulumentu hengu ke na tja hiaa ningi himatji mu dhipaetha.

¹⁶Me mu tonetha, ndji mu yethe.”

¹⁷[Pomatango otjipito tjOpaasa Pilatus ovantu u ve kutululila onkwatwa imo ndjimava hala.]

¹⁸Ovantu avehe va wololoka hava tyaa: “Nga dhipawe, ove u tu kutululile Barabas.”

¹⁹Barabas wa yedhililwa mokaliwoso mena lyotjipopya hiaa li natjo motjitungwalongo moka, nomena lyokudhipaa.

²⁰Pilatus wa li ama hala okukutulula Jesus, he ve ithana uke a popye nawo.

²¹Iya wo va wololoka vala hava tyaa: “Mu papela komutjaakano, mu papela komutjaakano!”

²²Iya Pilatus wa popya nawo otjikando otjityatatu ha tyaa: “Omena lyatji, ouvi mbwaa ningi owatji? Ame hí mwene mo onkali yokut̯a muye. Me mu tonetha, ndji mu yethe.”

²³Iya wo va hapa ko vala okuwololoka unene, have mu pula okutya Jesus nga papelwe komutjaakano. Okuwololoka kwawo kwa teeka.

²⁴Iya Pilatus wa tokola okuhwithila po himava hala.

²⁵Wa kutulula ngoka nguva li amava hala, ngwaa li mokaliwoso mena lyotjipopya nomena lyokudhipaa, iya ha yandja Jesus, a ningwe ngahi mava hala.

²⁶Ovakwavita va ya naJesus. Mondjila va kambula Simon Omukireni, ngwaa li ama dhi kotjana, have mu twike omutjaakano, e u tjinde, otjo ma landula muJesus.

²⁷Engundwa lyovantu lye mu landula. Mokati kawo mwa li wo ovakadhintu mboka mbave mu lila otjo mava yayana.

²⁸Jesus wa pilulukila kuwo, ha tyaa: “Vakadhona vaJerusalem, hámu ndili, lililen̯i, n̯e mu lile ovanwen̯i,

²⁹mena lyokutya omatango mae ya, katango ovantu mava ka tyaa: ‘Ovanalao odhompange, mbahave lipele omienyo nambahava yamethele.’

³⁰Ovantu mava ka uta okuheela odhondundu hava tyaa: ‘Tu wilen̯i,’ hava heele ovilukonko hava tyaa: ‘Tu tjikilen̯i.’

³¹Iya omuti omutalala andaa mau ningwa nyahika, omukukutu mau ningwa vi?”

³²Ovalumentu vamo vavali, mbava li odhomputji va twalwa pamo naJesus va ka dhipawe.

³³Iya hive thiki koluvedhe nduu tiwa Otjoolotwe, Jesus ve mu papela komutjaakano, pamo nodhomputji ndhoka, imo okokulyo nonkwawo okokumbinda kwe.

³⁴Iya Jesus ha tyaa: “Taa, ve ithila po, mena lyokutya kave tji i himava ningi.” Iya ve liyandjela omidhalo vye, amava undapetha otjiholowoletho.

³⁵Ovantu va kulama mpoka, have mu tala, iya ovatumini nawo wo ve mu penya, hava tyaa: “Nahi oye a hupitha ovantu, nge lihupithe ye omwene, andaa oye e li Messias, omuholowolwa waKalunga.”

³⁶Ovakwavita nawo wo ve ya, hava penye Jesus. Ve mu nwitha ovinyu mbyaa lula,

³⁷hava tyaa: “Ove andaa uhamba yOvajuda, lihupitha iya ove omwene.”

³⁸Kombanda yomutwe kwa li esoneko ndyaa sonekelwe hinyahi: “Hengu Ohamba yOvajuda.”

³⁹Umo owomodhomputji ndhaa papelwa komutjaakano, we mu penya ha tyaa: “Haove Messias? Lihupitha iya ove omwene, ove u tu hupithe.”

⁴⁰Iya omukwawo we mu anda, ha tyaa: “Ku tila Kalunga, hiuu li mekoyo ndii lithike polye?

⁴¹Nt̯e twa koyelwa mouvyuuki movipuka mbitwa ninga, iya hengu ka ningile ouvi watja nokanunu.”

⁴²Iya wa heela Jesus ha tyaa: “Jesus, nt̯ipaluka ndje, himo thiki motjilongo tjoye.”

⁴³Jesus we mu heela ha tyaa: “Otjatjili me ku heele okutya ndino hendi mo ka kala pamo naame mOparadisa.”

⁴⁴Iya owola omulongo nambali yokomutenya kwe ya et̯iku motjilongo atjihe, lyo hali kala ko katee owola ontyatatu yokomutenya,

⁴⁵mena lyokutya etango lya li alya dhiwele. Otjitopa hitji yuvikila motempeli tja tauka pokati.

⁴⁶Jesus wa wololoka peulu ha tyaa: “Taa, omwenyo wandje me u yandja momawoko oye.” Hiaa popi nyahi, tjau ha t̯i.

⁴⁷Iya omunene wovakwavita hiaa mono soka hitja ningwa, wa tumbaleka Kalunga, ha tyaa: “Omuntu hengu otjatjili wa li omuvyuuki.”

⁴⁸Ovantu avehe mboka mbava onganene ko okutala, hiva mono soka hitja ningwa, va tjuna kodhonganda ave ihamenwa.

⁴⁹Ovatjitwa avehe vaJesus novakadhintu hembenya mbave mu landula okudha koGalilea, va kulama kokule, hava tala ovipuka mbyoka.

⁵⁰Kwa li omulumentu nguu tiwa oJosef, owomOtjoongi tjOvanene. Omulumentu hengu wa li omuwa, omuvyuuki,

⁵¹owomoArimatia, ondolopa yOvajuda, nguu kevelela otjilongo tjaKalunga. Josef etokolo lyOtjoongi novilinga vyawo ke vi itavelele.

⁵²Wa ya kuPilatus, ha kumbu otjivimbi tjaJesus.

⁵³Hiee tji itha ko, we tji dhingila motjitopa tjoliina, he mu paka mombila ndjaa hokolelwe mewe, moka muhamuya pakwa omuntu noumo.

⁵⁴Etango ndyoka lya li olyokulilongekedha, Esabati lya li amali utu.

⁵⁵Ovakadhintu mbenya mbava dhile naJesus koGalilea, va landula Josef, hava tala ombila notjivimbi tjaJesus okutya ma pakwa vi.

⁵⁶Iya hiva tjuna kodhonganda, va ka longekedha ovidhimba nomadhi. Iya mEsabati va thuva, ngahi tja hewa moveta.