Read zemba Lukas 24 Bible Online

Lukas 24 - zemba bible

Lukas 24

¹Iya omuhuka omunene wetango lyolutenga lyotjivike ovakadhintu va ya kombila, ave na ovidhimba mbyaa longekedhwa.

²Iya va vadha ewe alya alangatethwa po pombila.

³Iya hiva hiti mo, kava vadhele mo otjivimbi tjaMuhona Jesus.

⁴Tainkolo va li ave limbililwa, puwo pa kulama ovalumentu vavali mbava li ava dhala omidhalo mbimavi laima.

⁵Iya ovakadhintu va li ava tila, have lit̯imike ovipala vyawo pohi. Ovalumentu ve ve heela hava tyaa: “Omena lyatji mamu taendha omunamwenyo movat̯e?

⁶Ke mo hemu, wa imunwa kout̯e. Thipaluken̯i odhondaka ndhoka ndhee mu heela, tainkolo a li moGalilea,

⁷hiaa tile: ‘Omuna wOmuntu ma ka yandjwa momawoko ovalundhi, ha ka papelwa komutjaakano, iya etango etyatatu ma ka imunwa kout̯e.’ ”

⁸Iya ovakadhintu va thipaluka odhondaka dhe.

⁹Iya hiva dhi po pombila, ovipuka hembi avihe have ke vi hipululila ovalongwa hembenya omulongo naumo novakwawo avehe.

¹⁰Mboka mbave tji hipululila ovayapostoli hoowomba: OMaria Magdalena naJohanna naMaria, ina yaJakob, novakadhintu ovakwawo mbava li pamo nawo.

¹¹Iya ovayapostoli odhondaka dhovakadhintu kave dhi itavelele, dha li vala ngodhongano.

¹²Iya Petrus wa kulama, ha ka dhamukila kombila. Hiaa vandamene mo, wa mona mo otjitopa tjoliina atjiika. Iya wa tjuna konganda, ae kuminwa soka hitja ningwa.

¹³Iya etango lyatjo tuu ndyoka vavali owomovalongwa va li mondjila amava i kokalongo haka tiwa Emmaus, odhokilometa omulongo nambali okudha koJerusalem.

¹⁴Hava tompola ovipuka mbyoka avihe mbyaa ningwa ko.

¹⁵Tainkolo va li amava tompola ovipuka hembi, Jesus omwene we ya kuwo, ha ende pamo nawo.

¹⁶Iya ve mu mona, atjaa kave mu dhimbukile.

¹⁷Jesus we ve pula ha tyaa: “Mamu ende amamu tompola tji?” Wo va kulama nomienyo mbyaa etetha onkenda.

¹⁸Umo owomuwo nguu tiwa oKleopas we mu pula ha tyaa: “Oove vala aika omuyenda moJerusalem nguho i ovipuka mbyaa ningwa mo pomatango nga?”

¹⁹Jesus we ve pula ha tyaa: “Ovipuka ovitji?” Va yaka hava tyaa: “Ovipuka mbyaa ningilwa Jesus Omunasareta. Omulumentu hengu wa li omuprofeti omunankono movilinga nomodhondaka kotjipala tjaKalunga nokovantu avehe.

²⁰Iya ovayambethi ovanene novatumini vetu ve mu yandja, a koyelwe et̯o, ve mu papela komutjaakano.

²¹Iya nt̯e twe liun̯ikile okutya hengu oye ma ka yowola Israel. Ndino ae etango etyatatu, ovipuka mbyoka avihe hivya ningwa.

²²Iya ovakadhintu vamo owomunt̯e ve tu kumitha, hiva i omuhuka omunene kombila,

²³kava mwene ko otjivimbi. Va tjuna, hava tya va mono emoneko lyovaengeli, mbave ve heela okutya Jesus u na omwenyo.

²⁴Vamo owomunt̯e va ile kombila, have i vadha ngahi va hipululilwa kovakadhintu, atjaa ye omwene kave mu mwene.”

²⁵Jesus we ve heela ha tyaa: “Utatyei, ovahima novat̯e woutheno komienyo okwiitavela mbyoka mbyaa popiwa kovaprofeti.

²⁶Ovipuka havyo vi li vyo mbyoka okutya Messias wa thele okutatethwa, tainkolo héya ya metumbalo lye?”

²⁷Jesus wa uta muMoses nomovaprofeti avehe, he ve thitululile mbyoka avihe omisonekwa mbivya popya ouhunga naye.

²⁸Hiva hweene popedhi nokalongo hoka huva vadhwa amava i, Jesus wa ngala nguma pon̯oka po.

²⁹Iya ve mu tumin̯in̯a hava tyaa: “Kala punt̯e, mena lyokutya kwa toko, netango lya hiti.” Jesus wa ya monganda, a kale puwo.

³⁰Iya hiva li amava li pamo, wa itha po omungome ha pandula, he u nyembula, he ve pa wo.

³¹Iya omeho awo a pathumuka, have mu dhimbuka. Iya wa henuka po puwo.

³²Ve liheela hava tyaa: “Omitima vyetu kavi pupyalele hiaa popi nant̯e mondjila, he tu thitululile omisonekwa?”

³³Iya powola yatjo vala mpoka va kulama, hava tjuna koJerusalem. Hoka oko va vadha omulongo naumo mbava ongana pamo novakwawo vamo.

³⁴Wo ve ve heela hava tyaa: “Otjatjili, Muhona wa imunwa kout̯e, we liholololele Simon.”

³⁵Nahembenya vavali va hipululila ovakwawo ovipuka mbyaa ningwa mondjila, nahive mu dhimbuka hiee ve nyembulila omungome.

³⁶Tainkolo ovalongwa va li amave lihipululile ovipuka hembi, Jesus omwene wa kulama mokati kawo, he ve heele ha tyaa: “Ouwa ngau kale nan̯e.”

³⁷Wo va li ava uluma hava tila, mena lyokutya va soka okutya pamo va mono otjilulu.

³⁸Iya Jesus we ve heela ha tyaa: “Mwa tilile tji? Omena lyatji mu na omalimbililo momitima vyen̯i?

³⁹Talen̯i omawoko andje nodhompadhi dhandje, mu tangan̯eke okutya aame omwene hengu. Nt̯in̯a ndjen̯i, mu mone okutya otjilulu katji na tja odhontumba nomat̯ipa, ngahi mu ndwete hindji na vyo.”

⁴⁰Hiaa popi nyahi, we ve yulikila omawoko e nodhompadhi dhe.

⁴¹Iya hihaveye mu itavela uke mena lyehuluko nonkumwe, we ve pula ha tyaa: “Mu na po ovikulya?”

⁴²Ve mu pa okantumba kohi ndjaa yothwa.

⁴³Jesus we ke tambula, he ke li movipathi vyawo.

⁴⁴Iya we ve heela ha tyaa: “Odhondaka hendhi odho mbe mu heela, tainkolo mba li pun̯e, himba tile avihe mbyoka mbyaa ntjonekelwa moveta yaMoses, momisonekwa vyovaprofeti nOmapisalomi vya thele okuhwithilwa po.”

⁴⁵Iya wa pathumuna odhondunge dhawo okwiiwa omisonekwa,

⁴⁶he ve heele ha tyaa: “Kwa sonekwa okutya Messias wa thele okutatethwa, ha ka imunwa kout̯e etango etyatatu.

⁴⁷Iya eliteyululo neithepo lyodhonkali ngali teethelwe ovantu avehe mena lye, okuuta moJerusalem.

⁴⁸N̯e mudhombangi dhovipuka hembi.

⁴⁹Ame omwene me mu tumine soka hitja udhikwa kuTate. Iya n̯e mwa thele okukala motjitungwalongo hemu, katee mamu dhalekwa odhonkono ndhimadhi ka dha kombanda.”

⁵⁰Jesus we ve twala katee popedhi naBetania. Wa yela omawoko e, he ve pa elao.

⁵¹Iya tainkolo a li ame ve pa elao, we ve thiaa po, ha twalwa meulu.

⁵²Va twika odhongolo, have mu tumbaleke, hava tjuna koJerusalem nehuluko enene.

⁵³Wo apehe va kala motempeli otjo mava hivilike Kalunga.