Read zemba Lukas 3 Bible Online

Lukas 3 - zemba bible

Lukas 3

¹Iya ombula ontyamulongo nontyatano yetumino lyomukesari Tiberius, Pontius Pilatus hiaa li omutumini waJudea, Herodes omutumini moGalilea nomunitje Filippus omutumini wovilongo vyaIturea naTrakonitis, Lisanias omutumini moAbilene,

²Hannas naKaifas hiva li ovayambethi ovanene, odhondaka dhaKalunga dhe ya kuJohannes, munkwaSakaria, mokuti.

³Iya ye wa ya moulaanganda auhe womoJordan, ha teetha okutya ovantu ngave liteyulule, wo va tjatjwe, opo odhonkali dhawo dhi ithwe po,

⁴ngahi tja sonekwa membo lyomuprofeti Jesaja, haku tiwaa: “Ondaka yomuwololoki mokuti mai tyaa: ‘Undapelen̯i Muhona ondjila, mu vyuukililithilen̯i ovilila.

⁵Omilola ngavi thithilwe, odhondundu nomaluvanda ngaa kulumunwe, hitja penga ngatji vyuululwe, odhondjila odhombi ngadhi kombwe.

⁶Ovantu avehe mava ka mona ehupitho lyaKalunga.’ ”

⁷Johannes wa heela owingi wovantu mbave ya va tjatjwe kuye, ha tyaa: “Luyumuko n̯e lwodhonyoka, aan̯i ngwee mu londola okutya ka inkolen̯i oluyuma lwaKalunga ndumalu ya?

⁸Iya undapen̯i ovipuka mbimavi yulike okutya mwe liteyulula. Hámu utu okulipopila okutyaa: ‘Tu na tate Abraham.’ Iya me mu heele okutya Kalunga ma ulu okutjitukitha omawe henga, he e ningi oluyumuko lwaAbraham.

⁹Onkava ya tuwa ae pethina lyomuti. Omuti auhe mbuhau ma ovinyango oviwa, mau kewa po, hau yumbwa momulilo.”

¹⁰Owingi wovantu we mu pula hau tyaa: “Iya ngatu ninge vi?”

¹¹Johannes we ve yaka ha tyaa: “Nguu na ovikutu vivali, ngave liyandjele nanguhe na tja, nguu na ovikulya naye tuu, ngatjo a ninga.”

¹²Ovathendelethi nawo ve ya kuye va tjatjwe, have mu pula hava tyaa: “Mulongethi, ngatu ninge vi?”

¹³Ye we ve heela ha tyaa: “Hámu thutitha okupitilila mbimwa heelwa.”

¹⁴Ovakwavita ve mu pula hava tyaa: “Iya nt̯e ngatu ninge vi wo?” Ye we ve heela ha tyaa: “Hámu tumin̯in̯a ovantu, n̯e hámu ve nyeka, yaukilwen̯i kodhondjambi dhen̯i ovene.”

¹⁵Iya ovantu hiva li amava kevelele, avehe va sokolola momitima vyawo hava tya, Johannes mpaeli oye e li Messias.

¹⁶Johannes we ve heela avehe ha tyaa: “Ame me mu tjatja nomeva, iya ngume ya omunene kwaame. Ame híme tji ulu nangahi tji li okukutulula omivya vyodhongaku dhe. Ye me mu tjatja nOmbepo Ondhilikwa nomulilo.

¹⁷Ye u na otjiyeletho mokuwoko kwe, ma kombo otjiwaa tje, ovilya me vi ungula motjindhi tje, iya olungu me lu hike po nomulilo mbuhau dhimi.”

¹⁸Johannes wa ilikin̯a omailikin̯o omengi nokuteethela ovantu ondaka ombwa.

¹⁹Iya Herodes, omutumini wotjityane tjotjilongo, hiaa tangunithwa kuJohannes mena lyaHerodias, omukadhintu womunitje, nomena lyouvi auhe mbwaa ninga,

²⁰kovipuka hembi avihe Herodes wa wedha ko uke okuyedhilila Johannes mokaliwoso.

²¹Iya napano ovantu avehe hiva tjatjwa, Jesus naye wo wa tjatjwa. Hiaa li ama kumbu,

²²eulu lye liyapuka, Ombepo Ondhilikwa ya lauka ngonguti, hai mu wilile. Meulu mwa dha ondaka hai tyaa: “Oove Omunwandje omuhivilikwa, ngumba hopa.”

²³Iya Jesus hiaa utu otjilinga tje, wa li nodhombula omilongo vitatu. Wa kala ngahi tja popiwa okutya ma ka kala munkwaJosef, yaEli,

²⁴yaMatati, yaLevi, yaMelki, yaJannai, yaJosef,

²⁵yaMatatias, yaAmos, yaNahum, yaEsli, yaNaggai,

²⁶yaMaat, yaMatatias, yaSemei, yaJosek, yaJoda,

²⁷yaJohanan, yaResa, yaSerubabel, yaSalatiel, yaNeri,

²⁸yaMelki, yaAddi, yaKosam, yaElmadam, yaEri,

²⁹yaJosua, yaElieser, yaJorim, yaMatati, yaLevi,

³⁰yaSimeon, yaJuda, yaJosef, yaJonam, yaEliakim,

³¹yaMelea, yaMenna, yaMatata, yaNatan, yaDavid,

³²yaIsai, yaObed, yaBoas, yaSala, yaNaason,

³³yaAminadab, yaAdmin, yaArni, yaHesron, yaFares, yaJuda,

³⁴yaJakob, yaIsak, yaAbraham, yaTara, yaNahor,

³⁵yaSeruk, yaRagau, yaPelek, yaEber, yaSala,

³⁶yaKainan, yaArfasad, yaSem, yaNoa, yaLamek,

³⁷yaMetusala, yaHenok, yaJaret, yaMahalalel, yaKainan,

³⁸yaEnos, yaSet, yaAdam, yaKalunga.