Read zemba Lukas 4 Bible Online

Lukas 4 - zemba bible

Lukas 4

¹Jesus wa dha koJordan ae yula Ombepo Ondhilikwa. Ombepo hai mu twala mokuti,

²hoka omudiapoli hwee mu lola omatango omilongo vine. Omatango ngoka ke na hiaa lya. Iya omatango ngoka hiaa piti po, wa li aa t̯a ondjala.

³Omudiapoli we mu heela ha tyaa: “Andaa oove OmunwaKalunga, heela ewe hendi, li tjituke omungome.”

⁴Jesus we mu yaka ha tyaa: “Kwa sonekwa amaku tiwaa: ‘Hakomungome awiika omuntu ma ulu okukala nomwenyo.’ ”

⁵Iya omudiapoli we mu twala kondundu onde, he mu yulikile ovilongo avihe vyomouye mepathaelo limo,

⁶ha tyaa: “Etumino hendi alihe netumbalo lyalyo me ku pa lyo, mena lyokutya ame mbe li pewa, me li yandja kungoka ngume hala.

⁷Ove andaa mo ntumbaleke, avihe hembi mavi ningi ovyoye.”

⁸Jesus we mu yaka ha tyaa: “Kwa sonekwa okutyaa: ‘Muhona Kalunga koye u tha oku mu tumbaleka, oye vala aika wa thele okuundapela.’ ”

⁹Iya omudiapoli wa twala Jesus koJerusalem, he mu londeke kohulo yotempeli, he mu heele ha tyaa: “Andaa oove OmunwaKalunga, lombokela pohi,

¹⁰mena lyokutya kwa sonekwa okutyaa: ‘Ye ma heele ovaengeli ve, ve ku amene,

¹¹wo ve ku tjinde momawoko awo, opo hó tono ompadhi yoye kewe.’ ”

¹²Jesus we mu yaka ha tyaa: “Kwa tiwaa: ‘Hó lolo Muhona Kalunga koye.’ ”

¹³Iya omudiapoli hiaa mana omatyoletho aehe, wa dha po puye nkele.

¹⁴Jesus wa tjuna koGalilea, ha endethwa kodhonkono dhOmbepo yaKalunga. Iya omipopyo ouhunga naJesus vya ya noulongo auhe wopoulaanganda.

¹⁵Ye we ve longela modhosinagoga dhawo, avehe have mu tumbaleke.

¹⁶Jesus we ya koNasaret, moka mwaa kulila, ha i mosinagoga metango lyEsabati ngahi a ninganinga ae. Wa kulama a tange,

¹⁷ha pewa edhingwambo lyomuprofeti Jesaja. Hiaa dhingulula edhingwambo he lipumu pompuka mpapa sonekwa okutyaa:

¹⁸“Ombepo yaMuhona i li kombanda yandje, mena lyokutya ye wa ntjolowola ndji ka teethele ovathona ondaka ombwa. Wa ntuma ndji teethele ovakambulwa ekutululo novapot̯i epathumuko, ndji yandje kovatatethwa ekutululo,

¹⁹ndji ivithe okutya otembu ye thiki, Muhona hima hupitha ovantu ve.”

²⁰Iya hiaa t̯iti embo, we li pa omupopili, ye ha kala pohi. Ovantu avehe mbava li mosinagoga ve mu tongolola.

²¹Jesus wa uta oku ve heela ha tyaa: “Ndino hendi esoneko hendi lya hwithilwa po, ngahi mwa tee.”

²²Avehe ve mu hipulula nawa, have kuminwa odhondaka ndhoka dhonkenda ndhaa dha motjinyo tje, hava tyaa: “Nan̯i hengu hamunkwaJosef?”

²³Jesus we ve heela ha tyaa: “Ndji tji i nawa okutya mamu hala okuntjeela eeli hendi ndimali tyaa: ‘Tjimbanda lihakula omwene.’ Ovipuka mbitwa tyaa mbyaa ningwa moKapernaum, vi ninga wo muno moyen̯i.”

²⁴Ye we ve yaka ha tyaa: “Me mu heele otjatjili, kaku na tja omuprofeti ngwaa tumbala mondolopa yawo.

²⁵“Me mu heele otjatjili okutya moIsrael mwa li ovahepe ovengi potembu yaElia, hikwa li ondjala onene motjilongo atjihe, mena lyokutya kai lokele oule wodhombula ndatu nomiedhi epandu.

²⁶Elia ka tuminwe kovahepe wokoIsrael, iya wa tumwa komuhepe wokoSarepta, okalongo komoSidon.

²⁷MoIsrael mwa li ovavedhi wovilundu ovengi potembu yomuprofeti Elisa, iya kaku velulilwe noumo, oNaeman Omusiria vala aika a velulwa.”

²⁸Ovantu avehe mbava li mosinagoga hiva tee otjipuka hehi, va li ava yumana unene.

²⁹Va kulama, have mu lamba mo mondolopa, have mu twala kontyo yondundu ndjoka ondolopa yawo huya tungilwa, ve ke mu yundulile pohi.

³⁰Iya Jesus wa dha mo mokati kawo, ha i.

³¹Jesus wa ya koKapernaum, kotjitungwalongo tjaGalilea, ha utu okulonga ovantu mEsabati.

³²Wo ve kuminwa elongo lye, mena lyokutya odhondaka dhe dha li nodhonkono.

³³Mosinagoga mwa li omulumentu ngwaa li nombepo ombi yondemoni. Ye wa wololoka ha tyaa:

³⁴“Utatyei, Jesus Omunasareta, mo tu halele tji? We ya oku tu han̯auna? Ndji ku i, oove Omudhilikwa waKalunga.”

³⁵Jesus wa anda ombepo ha tyaa: “Tutuvala, pita mo muye.” Iya ondemoni ye mu sata po mokati kovantu, yo hai dhi mo muye, ahamai mu ihameke.

³⁶Ovantu avehe ve kumwa unene, hava i mokulipula hava tyaa: “Elongo patji hendi? U heela odhombepo odhombi netumino nodhonkono, dho hadhi dhi mo.”

³⁷Etumbuko lyaJesus lya handjana noulongo wopoulaanganda.

³⁸Jesus wa dha mosinagoga, ha i koyooSimon. Inaivi yaSimon wa li aa kambulwa unene kelema, wo have mu dhimbula kuJesus.

³⁹Jesus wa hweena kuye, ha anda elema, lyo hali dhi mo. Inaivi wa kulama po dhivadhiva, he ve twiile po ovikulya.

⁴⁰Iya etango hilya hiti, ovantu avehe mboka mbava li novavedhi womauvela ngae lili nangae lili, ve ve eta kuJesus. Ye wa tendeka omawoko e komuvedhi auhe, wo avehe he ve velula.

⁴¹Odhondemoni wo dha dha mo movengi, hadhi wololoka hadhi tyaa: “Oove OmunwaKalunga!” Iya Jesus we dhi anda, ye ke dhi yethele dhi popye, mena lyokutya dha li adhi mu i okutya ye oye e li Messias.

⁴²Iya hikwa tji, Jesus wa pita mo, ha i kompuka hoka huhaku na tja ovantu, owingi wovantu we mu taendha. Hive thiki puye, ve mu tjaela, opo há dhi po puwo.

⁴³Iya we ve heela ha tyaa: “Mba thele wo okuteethela ovitungwalongo vimo ondaka ombwa yotjilongo tjaKalunga, mena lyokutya hehi otjo mba tuminwa.”

⁴⁴Iya Jesus wa li ama teethele modhosinagoga dhomoJudea.