Read zemba Lukas 8 Bible Online

Lukas 8 - zemba bible

Lukas 8

¹Okudha mpoka Jesus wa endaenda modhondolopa nomoulongo, otjo ma teetha ondaka ombwa yotjilongo tjaKalunga. Ye wa li pamo novalongwa ve omulongo navavali,

²novakadhintu wo vamo mboka mbava vadhwa ava velulwa odhombepo odhombi nomauvela ngahi tji li: Maria nguu tiwa oMagdalena, muye mumwa ithilwe odhondemoni epanduvali,

³Johanna, omukadhintu waKusa, osekulu yaHerodes, Susanna novakwawo ovengi mboka mbava yandja emona lyawo okupopila Jesus novalongwa ve.

⁴Ovantu va uta okuya kuJesus okudha modhondolopa nodhondolopa. Owingi wovantu hiwe mu onganena, Jesus we ve heela eeli hendi ha tyaa:

⁵“Kwa li omuntu umo ngwaa ka kunine. Hiaa li ama kunu dhimo dha wila pontyo yondjila, dho hadhi lyatwa kovantu, ovidhila havi dhi tjokola po.

⁶Dhimo dha wila pontantalahi. Iya hidha mene, dha vavala, mena lyokutya kapa li otjituto.

⁷Dhimo dha wila modhohongo, hadhi menene mumo nodhohongo, odhohongo hadhi thin̯a ovilya.

⁸Iya dhimo dha wila pohi ombwa, dha mena, ovilya havi kwata ethele.” Jesus hiaa mana okupopya ovipuka hembi, wa popya peulu ha tyaa: “Nguu na omatwi okutyaa, nga tyee!”

⁹Ovalongwa ve ve mu pula eeli hendi okutya mali tya vi.

¹⁰Jesus we ve yaka ha tyaa: “N̯e mwa pewa okwiiwa oviholekwa vyotjilongo tjaKalunga, iya mbenya va heelwa momaeli, mena lyokutya nandava tala, kave ku mono, nandava teelele, kava tee, wo kave yuvite.”

¹¹Jesus wa popya ha tyaa: “Eeli hendi mali tyaa: Ombuto oyo i li odhondaka dhaKalunga.

¹²Odhombuma ndhoka ndhaa wila pontyo yondjila, ovantu mboka mbava tyaa odhondaka dhaKalunga, atjaa tainkolo mave dhi teelele, dhivadhiva omudiapoli he ya, ha itha mo odhondaka ndhoka ndhii li momitima vyawo, opo háva itavele, wo ahamava hupithwa.

¹³Ndhoka ndhaa wila pontantalahi, dhi ngala ovantu mboka mbamava tee odhondaka dhaKalunga, have dhi tambula nehuluko, atjaa wo ahamadhi ve hiti, mava itavele vala pokaluvedhe, iya moluvedhe lwomatyoletho mave dhi yetha.

¹⁴Ndhoka ndhaa wila modhohongo, dhi ngala ovantu mboka mbamava tee odhondaka dhaKalunga, atjaa hava thin̯wa koviho nokomauhona nokomahuluko onkalamwenyo hendji, iya kave na hiva eta po.

¹⁵Ndhoka ndhaa kunwa pohi ombwa, dhi ngala ovantu mboka mbamava tee odhondaka dhaKalunga, wo have dhi takametha nomitima omiwa mbihavi na ovithithi, mava eta ouwa mokutakametha kwawo.

¹⁶“Kaku na tja ngoka nguu ten̯a olamba, ye he i t̯imike notjihayo ne he i twaa kohi yomutala. Iya me i twaa kotjituliko, ovantu mbamave ya mo opo va mone otjiten̯i.

¹⁷“Iya kaku na tja hitja holekwa hihamatji ka hololoka, ko kaku na tja soka hitja t̯imikwa hihamatji ke ya poluhandja.

¹⁸“Iya lungamen̯i okutya mamu teelele vi. Iya nguu na tja, ma pewa, iya nguhe na tja, nahime lipula okutya u na tjo, me tji nyekwa.”

¹⁹Ina yaJesus novanitje ovalumentu ve ya kuye, iya kava li amave tjiiwa okuthika puye mena lyowingi wovantu.

²⁰Jesus wa heelwa haku tiwaa: “Nyoko novanitjoye ve li pondje, mava hala ve ku mone.”

²¹Jesus we ve yaka ha tyaa: “Meme novanitjandje owomboka mbava tyaa odhondaka dhaKalunga, have dhi hwithile po.”

²²Etango limo Jesus wa londa mowato novalongwa ve, we ve heela ha tyaa: “Tu yaukilen̯i tjikoohehinya tjelunga.” Iya va londa mowato, tjau, hava i.

²³Iya tainkolo va li amava yauka, Jesus wa uta okulala. Ombepo onene yomakuthikuthi ya tukuka melunga. Owato we yulile omeva, nawo va li moudheu.

²⁴Ovalongwa va ya, have mu imuna po, hava tyaa: “Muhona, Muhona, matu i nomeva!” Jesus wa imuka po, ha anda ombepo nomakuthikuthi. Ombepo nomakuthikuthi vya nyima, havi tya thiluu.

²⁵Iya Jesus we ve heela ha tyaa: “Eitavelo lyen̯i li li pi?” Wo va tilile have kumwa, have lipula hava tyaa: “Omuntu hengu aan̯i, nguma heele ombepo nomeva, havi mu tee?”

²⁶Va yaukila kotjilongo tjOvagerasa[1] hitji li odhompalakana noGalilea.

²⁷Jesus hiaa dhi mo mowato, omulumentu umo womondolopa ndjoka ngwaa li nodhondemoni wa wanena naye. Wa vadhwa aa ninga oluvedhe olule aha dhala omidhalo, ye ka kala monganda, u kala modhombila dhomaleva.

²⁸Hiaa mono Jesus, wa yadhuluka, he liyeme po podhompadhi dhe, wa popya peulu ha tyaa: “Mo ntjalele tji, Jesus OmunwaKalunga Owokombandambanda? Me ku kumbu, hó ntatetha,”

²⁹mena lyokutya Jesus wa li ama hala okuheela ombepo ombi, i dhe mo momuntu hengu, mena lyokutya ya ninga omatango omengi amai mu pumbaula, atjaa wa kutilwe nomalyenge povit̯iho nopodhongunyu, ye ha lalelwa. Odhonkuto we dhi kopola, ha dhamaukithwa mokuti kondemoni.

³⁰Jesus we mu pula ha tyaa: “Ena lyoye, oove an̯i?” Ye we mu yaka ha tyaa: “Aame Wingi,” mena lyokutya muye mwa li odhondemoni odhingi.

³¹Odhondemoni dha kumba Jesus, ahame dhi yundulile menkomototo.

³²Kwa li otjuunda otjinene tjovingulu mbyaa yala kondundu, dho dhe mu kumba dhi yethelwe okuhita movingulu. Jesus we dhi yetha.

³³Odhondemoni dha dha mo momuntu ngoka, hadhi i movingulu. Otjuunda atjihe tjovingulu tja thothonoka okudha kekomo, hatji liyumbu melunga, hatji i nomeva.

³⁴Ovat̯ita wovingulu hive tji mono, va ka inkola, hava ka hipulula otjipuka hehi mondolopa nomodhohambo.

³⁵Ovantu va ya oku ka tala soka hitja ningwa ko. Hive ya kuJesus, va vadha omulumentu ngoka mumwa dha odhondemoni, aa kala pohi podhompadhi dhaJesus, wa dhala nawa, nodhondunge dhe ya mo. Ovantu va li ava tila.

³⁶Mboka mbava mona omulumentu ngwaa li nodhondemoni hiaa ningilwa, ve tji hipululila ovantu.

³⁷Iya ovantu avehe mbava dhile kotjilongo tjOvagerasa va kumba Jesus, a dhe mo motjilongo tjawo, mena lyokutya va kambulwa kontilo onene. Ye wa londa mowato, ha tjuna.

³⁸Omulumentu ngoka ngwaa ithwa odhondemoni, we mu kumba, a kale puye. Jesus we mu lekela ha tyaa:

³⁹“Tjuna konganda, u ke ve hipululile soka Kalunga hiee ku ningile.” Ye wa tjuna, ha ka teethela ondolopa aihe ovilinga ovinene Jesus mbyee mu ningila.

⁴⁰Jesus hiaa tjuna, owingi wovantu we mu lyepetha, mena lyokutya avehe va vadhwa amave mu kevelele.

⁴¹Iya pe ya omulumentu umo nguu tiwa oJairus, omunene wosinagoga. We ya po he lit̯imike podhompadhi dhaJesus, he mu kumbu e ye konganda ye,

⁴²mena lyokutya ye wa li nomukadhona we, ongunga wodhombula omulongo nambali, ngwaa li popavi. Iya Jesus hiaa li ama i hwinya, owingi wovantu we mu thin̯a.

⁴³Iya kwa li omukadhintu ngwaa velele olulala odhombula omulongo nambali. Ovipuka vye avihe mbyaa li navyo wa manena movimbanda, atjaa kakwa li ngoka ngwaa li ama ulu oku mu velula.

⁴⁴Ye we ya kon̯ima yaJesus, ha t̯in̯i kotjilyo tjomudhalo we. Dhivadhiva olulala lwe halu ka.

⁴⁵Jesus we ve pula ha tyaa: “Aan̯i ngwaa nt̯in̯i?” Ovantu avehe hiva anya, Petrus novakwawo hava tyaa: “Muhona, owingi wovantu owo mau ku thin̯a otjo mau ku t̯in̯i.”

⁴⁶Iya Jesus ha tyaa: “Pe na ngwaa nt̯in̯i, mena lyokutya mba mono okutya mwaame mwa dhi odhonkono.”

⁴⁷Omukadhintu hiaa mono okutya kaa ulu uke okuholama, wa hololoka ama teketa. We lit̯imika podhompadhi dhaJesus, ha hipulula movipathi vyovantu avehe soka hiee mu t̯in̯ine nahiaa veluka dhiva.

⁴⁸Jesus we mu heela ha tyaa: “Mukadhona wandje, eitavelo lyoye lye ku velula. Enda nouwa.”

⁴⁹Tainkolo Jesus a li ama popi, koyomunene wosinagoga kwa dha ontumwa hai tyaa: “Hó ulithwa uke omulongethi, omunoye ke ko.”

⁵⁰Jesus hiee tji tee, we mu heele ha tyaa: “Hó tila, itavela vala, ma veluka.”

⁵¹Hiaa thiki monganda, ka yethelele mo ovantu kakele vala kooPetrus naJohannes naJakob naina naihe yondele.

⁵²Avehe va li amava lili otjo mava yaya. Jesus ha tyaa: “Hámu lili. Omukadhona ka t̯ile, wa lala vala.”

⁵³Wo ve mu yola, mena lyokutya va li ave i okutya wa t̯i.

⁵⁴Jesus we mu kambula mokuwoko, ha popi peulu ha tyaa: “Mukwe, imuka po!”

⁵⁵Omwenyo we ya mo, ha kulama po dhiva. Jesus we ve heela ha tyaa: “Mu pen̯i ovikulya.”

⁵⁶Ovanene wondele ve kumwa unene. Jesus we ve tjaela okutya soka hitja ningwa po, háve tji heele omuntu noumo.