Read zemba Johannes 1 Bible Online

Johannes 1 - zemba bible

Johannes 1

¹Peutilo pa li Ondaka. Ondaka ya li puKalunga, nOndaka ya li Kalunga.

²Ondaka hendji ya li peutilo puKalunga.

³Ovipuka avihe vya utwa okupitila mOndaka, kape na tja otjipuka tjimo tjomeuto hitja utwa ahai po.

⁴MOndaka mwa li omwenyo, nomwenyo wa ninga otjiten̯i tjovantu.

⁵Otjiten̯i matji tungatele met̯iku, net̯iku kali dhimine po otjiten̯i.

⁶Kalunga wa tuma omulumentu nguu tiwa oJohannes.

⁷Ye we ya a hipululile ovantu otjiten̯i, opo avehe va tyee elaka, wo va itavele.

⁸Ye haye a li otjiten̯i, we ya vala a hipulule otjiten̯i.

⁹Otjiten̯i tjatjatjili himatji tungatele omuntu auhe matji ya mouye.

¹⁰Ondaka ya li mouye, Kalunga we i utitha ouye, atjaa ouye kau i nongonokele.

¹¹Ye we ya kowoyawo, nowoyawo kave mu tambulile.

¹²Iya avehe mboka mbave mu tambula, hava itavele ena lye, we ve pa odhonkono va ninge odhondele dhaKalunga.

¹³Wo kava yumukilwe ngahi tji yumukwa ovantu, okutya tjo katja li mehalo lyomulumentu, iya va yumukwa muKalunga.

¹⁴Ondaka ya ninga omuntu ngwaa kala mokati ketu. Nt̯e twa tala etumbalo lye, etumbalo lyOngunga yaIhe. Ye wa li ae yula et̯ilonkenda notjatjili.

¹⁵Johannes we mu hipulula, ha popi peulu ha tyaa: “Hengu oye e li ye nawanawa ngoka ngumba popya he tyaa: ‘Ngoka ngume ya kon̯ima yandje omunene kwaame, mena lyokutya oko a li, tainkolo ame amba li ahe ko.’ ”

¹⁶Mowingi wet̯ilonkenda lye nt̯e atuhe twa pewa mo elao ndyaa wedhwa ket̯ilonkenda.

¹⁷Iya oveta Kalunga we i yandja ya pitila muMoses, et̯ilonkenda notjatjili vya etwa kuJesus Kristus.

¹⁸Kaku na tja noumo ngwaa mona Kalunga nokanunu, Ongunga aika nguu li mekolo lyaIhe, oye e mu hololola.

¹⁹Hembu owo u li oumbangi waJohannes, Ovajuda womoJerusalem hiva tuma ovayambethi nOvalevi[1] ve mu pule va tyee: “Oove an̯i?”

²⁰Johannes ka anyene oku ve yaka, wa hipulula ha tyaa: “Ame haame Messias.”

²¹Wo ve mu pula hava tyaa: “Iya oove an̯i? Oove Elia?” Ye ha tyaa: “Aai, haame!” Wo ve mu pula uke hava tyaa: “Oove omuprofeti ngunya?” Johannes ha tyaa: “Aai.”

²²Wo ve mu pula hava tyaa: “Iya oove an̯i, opo tu ka popye kumboka mbave tu tumu? Ove mo litya vi?”

²³Johannes wa yaka ha tyaa: “Aame ondaka yomuwololoki mokuti ndjimai tyaa: ‘Vyuukililithen̯i ondjila yaMuhona,’ omuprofeti Jesaja ngahi a popya.”

²⁴Odhontumwa ndhoka dha li owomOvafarisai.

²⁵Wo va pula Johannes hava tyaa: “Omena lyatji himo tjatja, andaa haove Messias ne Elia ne omuprofeti ngunya?”

²⁶Johannes we ve yaka ha tyaa: “Ame me tjatja nomeva, iya mokati ken̯i mwa kulama ngoka nguhamu i.

²⁷Ngoka ngume ya kon̯ima yandje, ame híme tji ulu nangahi tji li okukutulula omivya vyodhongaku dhe.”

²⁸Ovipuka hembi vya ningilwa moBetania tjikoohehinya tjomulonga waJordan, hoka Johannes hwaa li ama tjatjele ovantu.

²⁹Ngamuhuka Johannes wa mona Jesus ame ya kuye. Johannes wa popya ha tyaa: “Taa tuutuu, Ondjona yaKalunga ndjimai itha po odhonkali dhouye!

³⁰Hengu oye e li ye nawanawa ngoka ngumba popile he tyaa: ‘Omulumentu ngume ya kon̯ima yandje omunene, mena lyokutya wa li ko, tainkolo ame amba li ahe ko.’

³¹Ame mba li ahe mu i, iya mbe ya okutjatja nomeva, opo a ivithilwe Ovaisraeli.”

³²Johannes we mu hipulula ha tyaa: “Mba mona Ombepo yaKalunga amai lauka meulu ngonguti, hai mu wilile.

³³Ame mba li ahe mu i, iya Kalunga, ngoka ngwaa ntuma okutjatja nomeva, wa ntjeela ha tyaa: ‘Ngoka ngumo mono ama wililwa kOmbepo, hai kala kombanda ye, oye e li ye ngoka nguma tjatja nOmbepo Ondhilikwa.’

³⁴Ame mbe tji mona, otjo me mu hipululile okutya ye OmunwaKalunga.”

³⁵Ngamuhuka Johannes wa li aa kulama uke navavali owomovalongwa ve.

³⁶Johannes hiaa mono Jesus ama ende po, ha tyaa: “Taa tuutuu, Ondjona yaKalunga.”

³⁷Ovalongwa ve vavali ve mu tyaa hima popi nyahoka, hava landula Jesus.

³⁸Jesus wa piluluka, hiee ve mono himave mu landula, he ve pula ha tyaa: “Mamu taendha tji?” Wo va yaka hava tyaa: “U kala pi, Rabbi?” Otjitya hehi matji tya Omulongethi.

³⁹Jesus we ve heela ha tyaa: “Indjen̯i, mu tale!” Wo hiva i naye, va mona mpaa kala, hava kala puye otjihupe tjetango ndyoka. Owola ya li ontyane.

⁴⁰Umo owomovalongwa hembenya vavali mbava tyaa Johannes, hava landula Jesus, wa li Andreas, omunitjaSimon Petrus.

⁴¹Andreas wa wanena dhiva nomukulwe Simon, he mu heele ha tyaa: “Nt̯e twa mono Messias.” Otjitya hehi matji tya Omuvavekwa.

⁴²Ye wa twala Simon kuJesus. Jesus we mu tala ha tyaa: “Oove Simon yaJohannes, iya mo ka ithanwa Kefas,” ndyoka ndimali tya Petrus.[2]

⁴³Ngamuhuka Jesus wa li ama hala okuya koGalilea, ha wanene naFilippus, ha tyaa: “Ndandula ndje.”

⁴⁴Filippus wa li Omubetsaida womondolopa ndjoka mumu kala Andreas naPetrus.

⁴⁵Filippus wa wanena naNatanael, ha tyaa: “Nt̯e twa mona omulumentu ngoka ngwaa sonekwa kuMoses membo lyoveta nokovaprofeti, Jesus, omunwaJosef, Omunasareta.”

⁴⁶Natanael we mu pula ha tyaa: “MoNasaret mamu ulu tuu okudha ouwa watja?” Filippus we mu heela ha tyaa: “Indjo, u tale!”

⁴⁷Jesus wa mona Natanael ame ya kuye. Iya Jesus wa popya ouhunga naye ha tyaa: “Taa tuutuu, Omwiisraeli watjatjili ngoka nguhe na tja ovithithi!”

⁴⁸Natanael we mu pula ha tyaa: “Wa ndjiwa vi?” Jesus we mu heela ha tyaa: “Mbe ku mona hiwa li momukuyu, tainkolo Filippus héye ku ithana.”

⁴⁹Natanael we mu yaka ha tyaa: “Rabbi, oove OmunwaKalunga! Oove ohamba yaIsrael!”

⁵⁰Jesus we mu yaka ha tyaa: “Ove ngundhe wa itavele vala himba tya mbe ku mona hiwa li momukuyu? Mo ka mona ovipuka ovinene mbyaa pon̯a hembi.”

⁵¹Jesus we ve heela ha tyaa: “Ame me mu heele otjatjili okutya mamu ka mona eulu ndyee liyapuka, novaengeli vaKalunga himava londo nahimava heluka okuya kOmuna wOmuntu.”