Read zemba Johannes 12 Bible Online

Johannes 12 - zemba bible

Johannes 12

¹Omatango epandu, tainkolo Opaasa háiye thika, Jesus wa ya koBetania, hoka huku kala Lasarus, omulumentu ngoka Jesus ngwaa imuna kout̯e.

²Wo ve mu twiila po ovikulya. Marta oye a li ama yandjele ovantu, iya Lasarus wa li umo owomovantu mboka mbava li amava li pamo naJesus.

³Iya Maria wa itha po otjivavelo tjomadhi onarde[8] yokalu, he e tile kodhompadhi dhaJesus, ye he dhi theta nodhondjutji dhe. Iya ondjuwo aihe ye yulile ethi lyomadhi ngoka.

⁴Iya Judas Iskariot, umo owomovalongwa vaJesus, ngoka ngwaa li ame ke mu weleleka, wa popya ha tyaa:

⁵“Omena lyatji otjivavelo hehi hihatji landethelwe po odhondenari omathele atatu, dhi yandjwe kovathona?”

⁶Hehi ke tji popile, mena lyokutya wa li ae na otjiho novathona, iya omena lyokutya wa li otjimpulu. Ye wa li wo aa tjinda okapapo kodhombongo, nahi u itha mo hitji tuwa mo.

⁷Iya Jesus we mu heela ha tyaa: “Mu yethen̯i, hehi we tji ungulile etango lyepako lyandje.

⁸Ovathona mu na wo apehe, iya ame híme kala nan̯e apehe.”

⁹Engundwa enene lyOvajuda lya tyaa okutya Jesus u li moBetania, hako ve ya. Wo kava ile ko mena lyaJesus aika, va li amava hala okumona wo Lasarus, ngoka Jesus ngwaa imuna kout̯e.

¹⁰Ovayambethi ovanene va taendha ondunge va dhipae wo Lasarus,

¹¹mena lyotjihipululo tje, Ovajuda ovengi va yetha ovaviyuli vawo, hava itavele muJesus.

¹²Iya ngamuhuka owingi wovantu mboka mbwee ya kotjipito tjOpaasa, wa tyaa okutya Jesus me ya koJerusalem.

¹³Iya va itha omavale kovivale, hava i oku ke mu wan̯a. Wo va wololoka hava tyaa: “Hosianna! Nga tumbalekwe hengu ngume ya mena lyaMuhona, ohamba yaIsrael!”

¹⁴Jesus wa mona ombulona, he i kavile, omisonekwa ngahi mavi hee himavi tyaa:

¹⁵“TjaSion, hó tila. Taa tuutuu, Ohamba yoye mai ya, aya kavile kombulona.”

¹⁶Olutenga ovalongwa ve kava li ave yuvite ovipuka mbyoka. Iya Jesus hiaa tumbalekethwa, va thipaluka okutya omisonekwa hembi mavi popi otjipuka hehi, novipuka mbyoka ovantu mbive mu ningila.

¹⁷Ovantu mboka mbava li pamo naJesus, hiaa ithana Lasarus a dhe mo mombila, he mu imuna kout̯e, va hipulula soka hitja ningwa po.

¹⁸Iya owingi wovantu hiwa tee wo okutya Jesus wa ninga otjilingakumithi hehi, ve ya wo oku mu wan̯a.

¹⁹Iya Ovafarisai ve liheela hava tyaa: “Mu lwete okutya kamu na himamu ulu uke. Taa tuutuu, ouye auhe mau mu landula.”

²⁰Mokati kamboka mbave dhile kotjipito tjOpaasa okukumba, mwa li Ovagreka vamo.

²¹Ve ya kuFilippus ngoka ngwaa dha koBetsaida moGalilea, have mu kumbu hava tyaa: “Taa, matu hala okumona Jesus.”

²²Filippus wa ya, he tji heele Andreas. Andreas naFilippus va ya, have tji heele Jesus.

²³Jesus we ve yaka ha tyaa: “Owola ye thiki, Omuna wOmuntu a tumbalekethwe.

²⁴Ame me mu heele otjatjili: Ombuma yotjilya andaa kaai wile meheke i t̯ile mo, mai kala vala imo, iya andaa kai t̯ile, mai kwata odhombuma odhingi.

²⁵Ngoka nguu hole omwenyo we, me u keketha, iya nguu yele omwenyo we mouye hembu, me ke u hupithila momwenyo waapehe.

²⁶Kwalukele ngoka nguma ndjundapele, nga ndandule, ame hundji li, omuntu wandje oko ma ka kala wo. Tate ma ka tumbaleka kwalukele ngoka nguma ndjundapele.

²⁷“Napano omwenyo wandje we ihamenwa, me tya vi uke? Ndji tye: ‘Taa, ntjupitha ndje mowola ndji’? Iya mowola hendji otjo tja ndjeta.

²⁸Taa, tumbaleketha ena lyoye.” Iya meulu mwa dha ondaka hai tyaa: “Mbe li tumbaleketha, me li tumbaleketha uke.”

²⁹Owingi wovantu mboka mbwaa li awa kulama mpoka, hiwa tee ondaka hau tyaa: “Ombula ya titima.” Ovakwawo hava tyaa: “Omweengeli we mu popitha.”

³⁰Jesus we ve yaka ha tyaa: “Ondaka hendji kai popile mena lyandje, ya popi mena lyen̯i.

³¹Ouye hembu napano mau koywa. Omutumini wouye hembu napano ma ka yumbwa pondje.

³²Iya hime ka yelwa po pohi, ovantu avehe me ke ve nanena kwaame.”

³³Hehi we tji popya, opo a hololole okutya et̯o ndyoka ndima ka t̯a, li li vi.

³⁴Owingi we mu yaka hau tyaa: “Oveta ye tu heela okutya Messias ma ka kala ae na omwenyo apehe. Ove mo tya vi iya, himo tya Omuna wOmuntu hengu ma ka yelwa? Omuna wOmuntu aan̯i?”

³⁵Jesus we ve heela ha tyaa: “Ku na uke okaluvedhe okanunu otjiten̯i atji li mokati ken̯i. Enden̯i, tainkolo amu na otjiten̯i, opo hámu vadhwa ket̯iku. Iya ngoka nguma ende met̯iku, ke ku i hoka huma i.

³⁶Itavelen̯i otjiten̯i, tainkolo amu na tjo, opo mu ninge odhondele dhotjiten̯i.”[9] Jesus hiaa popi odhondaka ndhoka wa dha po, ye he ve holama.

³⁷Nandaku tiwa wa ninga ovilingatangan̯eko ovingi movipathi vyawo, kava itavelele muye,

³⁸odhondaka dhomuprofeti Jesaja opo dhi hwithilwe po, hima tyaa: “Muhona, aan̯i ngwaa itavela eteetho lyetu? Aan̯i ngoka Muhona ngwaa holololela odhonkono dhe?”

³⁹Iya wo kava ulile okwiitavela, mena lyokutya Jesaja u na uke mpaa popya ha tyaa:

⁴⁰“Kalunga wa twikitha omeho awo, ye wa kukutika omitima vyawo, omeho awo opo háe ku mono, nomitima vyawo opo hávi koneke, ahamave liteyulula, ndji ve velule.”

⁴¹Jesaja wa popya odhondaka hendhi, mena lyokutya wa mona etumbalo lyaJesus, he mu hipulula.

⁴²Iya ovengi owomovanene va itavela muJesus, iya mena lyOvafarisai kave tji hipululile movipathi vyovantu, opo háva lambwa mo mosinagoga[10].

⁴³Iya wo va li ave hole okupandulwa kovantu okupon̯a okupandulwa kuKalunga.

⁴⁴Iya Jesus wa popya peulu ha tyaa: “Ngwaa itavele mwaame, haame a itavele, iya ma itavele ngwaa ntuma.

⁴⁵Ngoka ngwaa mbono, wa mono ngoka ngwaa ntuma.

⁴⁶Ame mbe ya, ndji kale otjiten̯i tjouye, opo auhe ngoka ngwaa ndjitavele, ahama kala uke met̯iku.

⁴⁷Iya kwalukele ngoka nguma tee odhondaka dhandje, ye ahame dhi takametha, ame hime ke mu koya. Ame hí dhile okukoya ouye, iya okutya ndji hupithe ouye.

⁴⁸Nguhama ntambula, ye kaa tambula odhondaka dhandje, u na omukoyi ngume mu koyo. Odhondaka ndhoka ndhimba popya, odho madhi ke mu koya etango lyathiinina.

⁴⁹Iya ame hí popile mwaame omwene, iya Tate ngwaa ntuma, oye a ntjeela himba thele okupopya.

⁵⁰Ame ndji tji i okutya otjitumino tje matji eta omwenyo waapehe. Iya soka himba hee, otjo soka Tate hiaa ntjeela ndji tji popye.”