Read zemba Johannes 14 Bible Online

Johannes 14 - zemba bible

Johannes 14

¹Jesus wa heela ovalongwa ve ha tyaa: “Omienyo vyen̯i hávi kala avya dhiwele. Itavelen̯i muKalunga, n̯e mu itavele wo mwaame.

²Monganda yaTate mu na omaluvedhe okukala omengi. Ngaile katja li nyahoka, ngai híme mu heele okutya me ke mu longekedhela oluvedhe.

³Iya andaa mba i, he ke mu longekedhela oluvedhe, me ka tjuna uke, ndji mu ile, opo mu ka kale hoka hundji li.

⁴Ondjila yahoka hume i, mu i i.”

⁵Tomas we mu heela ha tyaa: “Muhona, nt̯e katu ku i hoka humo i, ondjila matu i iwa vi?”

⁶Jesus we mu heela ha tyaa: “Aame ondjila notjatjili nomwenyo. Kape na tja ngume ya kuTate, ahama pitile mwaame.

⁷Ngaile mu ndji i, ngai naTate wo mu mu i, okudha napano mu mu i, n̯e mwe mu mona.”

⁸Filippus we mu heela ha tyaa: “Muhona, tu yulikila Iho, soka otjo matu hala vala.”

⁹Jesus we mu yaka ha tyaa: “Ame mba kala nan̯e oluvedhe olule, atjaa nan̯i ku ndji i, Filippus? Ngoka ngwaa mbona, wa mona Tate. Omena lyatji iya mo tyaa: ‘Tu yulikila Iho’?

¹⁰Ku itavelele nan̯i, Filippus, okutya ame ndji li muTate, naTate u li mwaame? Odhondaka ndhoka ndhimbe mu heele, híme dhi popi mwaame omwene, iya Tate nguu li mwaame, oye ma undapa ovilinga vye.

¹¹Ndjitavela ndjen̯i okutya ame ndji li muTate, naTate u li mwaame. Iya andaa kaamu hala okundjitavela, ndjitavela ndjen̯i vala mena lyovilinga mbindji undapa.

¹²Ame me mu heele otjatjili okutya ngoka ngwaa itavele mwaame, oye ma ka undapa uke ovilinga ovinene mbyaa pon̯a mbyoka, mena lyokutya ame me i kuTate.

¹³Iya kwalukele soka himamu kumbu mena lyandje, me tji ningi, Tate opo a tumbalekethwe mOmuna.

¹⁴Andaa mamu nkumbu tja mena lyandje, me tji ningi.

¹⁵“Andaa mu ntjole, mamu takametha ovitumino vyandje.

¹⁶Ame me ka kumba Tate, e ke mu tumine Omupopili umo, a kale pamo nan̯e apehe.

¹⁷Ombepo hendji yatjatjili ouye kaau ulu oku i tambula, mena lyokutya wo kau i lwete, wo kau i i. Iya n̯e mu i i, mena lyokutya mai kala pamo nan̯e, yo mai ka kala mun̯e.

¹⁸“Ame híme mu thii ngodhothiwa, iya me ka tjuna kun̯e.

¹⁹Andaa pa piti okaluvedhe okanunu, ouye kaau mbono uke, iya n̯e mamu ka mbona. Iya mena lyokutya ame ndji na omwenyo, nan̯e wo mamu ka kala nomwenyo.

²⁰Etango ndyoka mamu ka iwa okutya ame ndji li muTate, nan̯e mu li mwaame, naame ndji li mun̯e.

²¹“Ngoka nguma tambula ovitumino vyandje, ye he vi takametha, u ntjole. NaTate wo ma kala ae hole ngoka nguu ntjole, naame me ka kala andji mu hole, he liholololele ye.”

²²Judas, nguhe thi Judas Iskariot, ha tyaa: “Muhona, omena lyatji himo hala okuliholololela nt̯e, hihamo liholololele ouye?”

²³Jesus we mu yaka ha tyaa: “Iya kwalukele ngoka nguu ntjole, ma takametha odhondaka dhandje. Tate ma ka kala ae mu hole, iya nt̯e naTate matu ya kuye, hatu kala muye.

²⁴Ngoka nguhe ntjole, kaa takametha odhondaka dhandje. Iya odhondaka hendhi ndhimbe mu heele, hadhandje omwene, odhaTate ngoka ngwaa ntuma.

²⁵“Iya ovipuka hembi mbe mu heele vyo, tainkolo andji li pun̯e.

²⁶Iya Omupopili, Ombepo Ondhilikwa, ngoka Tate nguma ka tuma mena lyandje, oye me ke mu longa avihe, he ke mu thipalukitha ovipuka avihe mbyoka mbimbe mu heela.

²⁷“Ouwa me mu thiile wo. Ouwa wandje omwene me mu pa wo. Ame híme mu pa wo ngouye hiuu yandja. Omienyo vyen̯i hávi dhiwele, n̯e hámu tila.

²⁸Mwa tee himbe mu heele okutya me i, iya me ka tjuna kun̯e. Ngaile mu ntjole, ngai mamu hulukwa, hime i kuTate, mena lyokutya Tate omunene, wa mpon̯a.

²⁹Ame me mu heele tjo napano, tainkolo hátjiya ningwa, opo mu itavele, himatji ka ningwa.

³⁰Híme popi uke nan̯e olule, mena lyokutya omutumini wouye hembu me ya, atjaa ye ke na tja odhonkono okuntumina.

³¹Iya ouye opo u iwe okutya ame ndji hole Tate, me undapa ngahi a ntjeela. “Kulamen̯i, tu dhen̯i po hempa.