Read zemba Johannes 15 Bible Online

Johannes 15 - zemba bible

Johannes 15

¹“Aame omuvinyu watjatjili. Tate oye e li omwene wotjuundo tjomivinyu.

²Ye ma tete ko ontai aihe kwaame ndjihamai ma ovinyango, iya ontai aihe ndjimai ma, me i thevethwa, i me ovinyango ovingi.

³N̯e mwa thevethwa ae kodhondaka ndhoka ndhimbe mu heela.

⁴Kalen̯i mwaame, naame me kala mun̯e. Ngontai hihamai ulu okuma, andaa kai li komuti, nan̯e kaamu ulu okuma, andaa kaamu kala mwaame.

⁵“Aame omuvinyu, n̯e mudhontai. Nguma kala mwaame, naame me kala muye, ye ma ma otjingi, iya andaa kaamu kala mwaame, kamu na himamu ulu okuninga.

⁶Nguhama kala mwaame, ma yekelwahi ngontai, ha kukuta. Odhontai madhi ongedhwa, hadhi yumbwa momulilo, hadhi pi.

⁷Andaa mamu kala mwaame, nodhondaka dhandje hadhi kala mun̯e, atjihe soka himamu hala okukumba, mamu ke tji ningilwa.

⁸Andaa mamu ma ovinyango ovingi, Tate ma tumbalekethwa, n̯e mamu ile ovalongwa vandje.

⁹Tate ngahi e ntjole, naame otjo ndji mu hole; kalen̯i mohole yandje.

¹⁰Andaa mamu takametha ovitumino vyandje, mamu kala mohole yandje, ngaame himba takametha ovitumino vyaTate, me kala mohole ye.

¹¹“Hehi mbe mu heele tjo, opo ehuluko lyandje li kale mun̯e, nehuluko lyen̯i li kale alya hwithilwa po.

¹²Otjitumino tjandje hootjohi, okutya mu kale amu lihole ngaame hindji mu hole.

¹³Kape na omuntu nguu na ohole ndjaa pon̯a oyomuntu nguma yandjele omapanga e omwenyo we.

¹⁴N̯e mumapanga andje, andaa mamu ningi soka hime mu heele.

¹⁵Híme mu ithana uke ovapika, mena lyokutya omupika ke tji i soka omuhona we hima undapa. Iya ame me mu ithana omapanga andje, mena lyokutya ovipuka avihe mbimba tyaa kuTate, mbe mu heela vyo.

¹⁶Han̯e mwa ntjolowola, iya ame mbe mu holowola, mbe mu holowola mu ende ko, mu ka me ovinyango mbimavi kala ko, opo atjihe himamu kumbu Tate mena lyandje, e mu pe tjo.

¹⁷Soka hime mu heele hootjohi okutya kalen̯i amu lihole.

¹⁸“Ouye andaa u mu yele, kalen̯i amu tji i okutya aame wa kala au yele olutenga.

¹⁹Ngaile mwa li owomouye, ngai ouye u hole ovantu wawo. Iya ame mbe mu holowola mo mouye, mena lyokutya n̯e kamuwomouye, iya ouye u mu yele.

²⁰Thipaluken̯i soka himbe mu heela he tyaa: ‘Omupika ka pon̯ene omuhona we.’ Andaa ovantu va ntaata, nan̯e wo mave ke mu taata. Andaa va takametha odhondaka dhandje, nodhen̯i wo mave ke dhi takametha.

²¹Iya ovipuka hembi avihe ovyo mave ke mu ningila mena lyokutya n̯e muvalongwa vandje, mena lyokutya kave mu i ngoka ngwaa ntuma.

²²Ngaile ame hí dhile, he ve heele, ngai wo kave na tja onkali. Iya napano wo kave na uke notjimo okulipopila kodhonkali dhawo.

²³Ngoka nguu ndjele, u yele wo Tate.

²⁴Ngaile mba li ahe undapele mokati kawo ovilinga mbyoka mbihavi undapelwe komuntu umo, ngai wo kave na tja onkali. Iya napano ve tji mona, wo ve tu yele nt̯e naTate.

²⁵Iya ondaka hendji ndjaa sonekwa moveta yawo, i tha okuhwithilwa po ndjimai tyaa: ‘Wo ve ndjele vala, atjaa ame hí na himbe ve ninga.’

²⁶“Iya Omupopili hime ya, Ombepo yatjatjili ngoka nguma dhi kuTate, ame me ke mu tuma, ma ka dha kuTate, oye ma ka ntjipulula.

²⁷Nan̯e wo mamu ntjipulula, mena lyokutya mwa kala pamo naame okudha keutilo.