Read zemba Johannes 16 Bible Online

Johannes 16 - zemba bible

Johannes 16

¹“Ovipuka hembi mbe mu heela vyo, opo hámu yetha eitavelo.

²Ovanene wOvajuda mave ke mu lamba mo modhosinagoga dhawo. Iya owola mai ke ya, katango auhe ngume mu dhipaa, ma ka soka okutya aa ningi nyahoka, ma undapele Kalunga.

³Ovipuka hembi mave ke mu ningila vyo, mena lyokutya kave ndji i, naTate kave mu i.

⁴Iya avihe hembi mbe mu heele vyo, owola yatjo aye thiki, mu thipaluke okutya mbe mu heela tjo. “Ovipuka hembi hí mu heelele vyo peutilo, mena lyokutya mba li pun̯e.

⁵Iya napano me i kungwaa ntumine, kape na tja noumo mun̯e nguma mpula ha tyaa: ‘Mo i pi?’

⁶Iya mena lyokutya mbe mu heele ovipuka hembi, omitima vyen̯i vya etetha onkenda.

⁷Iya ame me mu heele otjatjili okutya onawa hime i mena lyen̯i, mena lyokutya andaa híme i, iya Omupopili kee ya kun̯e. Iya andaa me i, okutya me ke mu tuma kun̯e.

⁸Omupopili hime ke ya, ma ka yulikila ovantu wouye ouhunga noulundhi nouhunga nouvyuuki nekoyo lyaKalunga.

⁹Ye me ke ve yulikila oulundhi wovantu, mena lyokutya kava itavelele mwaame.

¹⁰Ye me ke ve yulikila ouvyuuki, mena lyokutya me i kuTate, n̯e kaamu ka mbona uke.

¹¹Ye me ke ve yulikila ekoyo lyaKalunga, mena lyokutya omutumini wouye hembu wa koywa.

¹²“Ndji na uke ovipuka ovingi oku mu heela, atjaa kaamu vi ulu oku vi tyaa napano.

¹³Ombepo yatjatjili himai ya, mai ke mu longa otjatjili atjihe. Yo kaai ka popya muyo oyene, iya mai ke mu heela soka hiya tyaa, mai ke mu hipululila ovipuka mbyoka mbimavi ke ya.

¹⁴Yo mai ka ntumbaleka, mena lyokutya mai ke mu hipululila himai ka tambula kwaame.

¹⁵Ovipuka avihe vyaTate ovyandje, otjo me tile Ombepo mai ke mu hipululila himai ka tambula kwaame.

¹⁶“Andaa pa piti okaluvedhe okanunu, kaamu ka mbona uke, iya andaa pa piti uke okaluvedhe okanunu, mamu ka mbona.”

¹⁷Iya vamo owomovalongwa ve ve lipula hava tyaa: “Matji tya vi, hime tu heele hima tyaa: ‘Andaa pa piti okaluvedhe okanunu, kaamu ka mbona uke, iya andaa pa piti uke okaluvedhe okanunu, mamu ka mbona’? He tu heele uke ha tyaa: ‘Hehi matji ningwa, mena lyokutya me i kuTate.’ ”

¹⁸Iya wo ve lipula hava tyaa: “Ma hala okutya vi hima tyaa: ‘Okaluvedhe okanunu’? Katu yuvite okutya ma hala okutya vi.”

¹⁹Jesus wa iwa okutya mava hala oku mu pula. We ve heela ha tyaa: “Mamu lipula tji? Ame mbe mu heela okutyaa: ‘Andaa pa piti okaluvedhe okanunu, kaamu ka mbona uke, iya andaa pa piti uke okaluvedhe okanunu, mamu ka mbona.’

²⁰Ame me mu heele otjatjili okutya mamu ka lila, hamu ka etetha onkenda, iya ouye mau ke hulukwa. Mamu ka kala notjinkendeleka, iya otjinkendeleka tjen̯i matji ka tjituka ehuluko.

²¹Omukadhintu andaa me lipa omwenyo, u etetha onkenda, mena lyokutya owola ye ye thiki. Iya ondele andaa wa yumukwa, ka thipaluka oviihamo vye mena lyehuluko, mena lyokutya omuntu we ya mouye.

²²Iya napano nan̯e mwa etetha onkenda, atjaa me ke mu mona uke, nomitima vyen̯i mavi ke hulukwa, ehuluko ndyoka kape na tja ngume ke mu nyeka lyo.

²³“Etango ndyoka, kamu na himamu ka mpula. Ame me mu heele otjatjili okutya atjihe soka himamu kumbu kuTate amamu tumbula ena lyandje, me ke mu pa tjo.

²⁴Katee napano kamu na himuya kumba amamu tumbula ena lyandje, kumben̯i, mamu pewa, ehuluko lyen̯i opo li hwithilwe po.

²⁵“Ame mbe mu heele ovipuka hembi momaeli. Owola mai ke ya, katango háme ka popya uke momaeli, iya me ke mu heela odhondaka ndhaa thituluka ouhunga naTate.

²⁶Etango ndyoka mamu ka kumba Tate amamu tumbula ena lyandje, haame uke me ke mu kumbila kuTate.

²⁷Iya Tate omwene u mu hole, mena lyokutya mu ntjole, mwa itavela okutya mba dha kuKalunga.

²⁸Ame mba dha kuTate, he ya mouye, iya me thii po uke ouye, he i kuTate.”

²⁹Ovalongwa ve, ve mu heela hava tyaa: “Napano mo popi odhondaka ndhaa thituluka, koo popi uke momaeli.

³⁰Napano tu tji i okutya ovipuka avihe u vi i, koo hepa omuntu ngume ku pula omapulo. Hehi tje tu itaveletha okutya ove wa dha kuKalunga.”

³¹Jesus we ve yaka ha tyaa: “Napano mwa itavele?

³²Taa tuutuu, owola mai ya, yo ye ya ae, mamu ka handjana po, auhe ma ka ya koyawo. N̯e mamu ka nt̯iaa po aika. Iya hí li po aika, mena lyokutya Tate u li pamo naame.

³³Ovipuka hembi mbe mu heele vyo, opo mu kale nouwa mwaame. N̯e mu na omaudheu mouye, atjaa hámu tila, ame mba ula ouye odhonkono!”