Read zemba Johannes 18 Bible Online

Johannes 18 - zemba bible

Johannes 18

¹Jesus hiaa popi ovipuka hembi, wa pita mo pamo novalongwa ve, ha yauka ondondhi yaKedron, hoka hukwa li otjuundo, moka mwaa ya novalongwa ve.

²Judas, ngoka ngwee mu weleleka, wa li wo ae i oluvedhe ndoka, mena lyokutya Jesus novalongwa ve nahi va onganena ko otwingi.

³Iya Judas wa ya kotjuundo hoka nengundwa lyovakwavita navamo owomovayungi wotempeli, mbava tumwa okudha kovayambethi ovanene nokOvafarisai. Ve ya ko novithithi vyomulilo nodholamba novilwitho.

⁴Iya Jesus atjihe wa li ae tji i himatji ke mu vadha, wa ya nokuwo, he ve pula ha tyaa: “Mamu taendha an̯i?”

⁵Wo ve mu yaka hava tyaa: “OJesus Omunasareta.” Jesus we ve heela ha tyaa: “Aame hengu.” Judas wo, omuweleleki we, wa li aa kulama pamo nawo.

⁶Iya Jesus hiee ve heele ha tyaa: “Aame hengu,” va tjuna otjan̯imwan̯imwa, have lisata pohi.

⁷Jesus we ve pula uke ha tyaa: “Mamu taendha an̯i?” Ve mu yaka hava tyaa: “OJesus Omunasareta.”

⁸Jesus we ve heela ha tyaa: “Ame mbe mu heele okutya aame hengu, iya andaa aame mamu taendha, ovalumentu hemba ve yethen̯i va ende.”

⁹Ye wa popya nyahoka, opo odhondaka ndhoka ndhaa popile dhi hwithilwe po ndhimadhi tyaa: “Ame hí kekethele po noumo mumboka mbawa mpa.”

¹⁰Simon Petrus ngwaa li nomukonda, we u pweya mo, ha tono omupika womuyambethi omunene, he mu kopola okutwi kwokokulyo. Ena lyomupika ngoka u tiwa oMalkus.

¹¹Jesus wa heela Petrus ha tyaa: “Tjun̯a mo omukonda woye motjilalo. Hé nu otjinwino[11] himba pewa kuTate?”

¹²Iya ovakwavita nomuviyuli wawo novayungi wotempeli va kambula Jesus, have mu kutu.

¹³Olutenga ve mu twala kuHannas, mena lyokutya oye a li iheivi yaKaifas, ngoka ngwaa li omuyambethi omunene ombula ndjoka.

¹⁴Kaifas oye e li ye ngoka ngwaa heelele Ovajuda omaeli okutya hahe omuntu umo oye a t̯e poluvedhe lwovantu avehe.

¹⁵Simon Petrus nomulongwa omukwawo va landula Jesus. Omulongwa ngoka omukwawo ngwaa li ae iwe komuyambethi omunene, wa ya pamo naJesus mokati konganda yomuyambethi omunene.

¹⁶Iya Petrus wa kulama pondje pomuvelo. Omulongwa omukwawo ngoka ngwaa li ae iwe komuyambethi omunene, wa pita mo, ha popitha omukadhona omuyungi wopotjivelo, ha eta Petrus mokati.

¹⁷Omukadhona ngoka omuyungi wopotjivelo wa pula Petrus ha tyaa: “Ove haove wo umo owomovalongwa womulumentu ngu?” Petrus we mu yaka ha tyaa: “Aai, ame haame.”

¹⁸Ovapika novayungi va li ava kulama pomulilo mbuva ten̯a, amava ungulukwa, mena lyokutya kwa li outalala. Petrus naye wo wa li aa kulama pamo nawo pomulilo ama ungulukwa.

¹⁹Omuyambethi omunene wa pula Jesus ouhunga novalongwa ve nelongo lye.

²⁰Jesus we mu yaka ha tyaa: “Ame ndji popya apehe movipathi vyovantu avehe. Mba longa apehe modhosinagoga nomotempeli, moka mumu ongana Ovajuda avehe. Ame hí popile notjimo meholamo.

²¹Omena lyatji himo mpula? Pula ovantu mboka mbava tyaa soka himbe ve heela. Iya himba popya ve tji i.”

²²Iya Jesus hiaa popi odhondaka ndhoka, omuntu umo owomovayungi mboka mbava li ava kulama mpoka, we mu tona epi, ha tyaa: “Otjo mo yaka momuyambethi omunene nyahoka?”

²³Jesus we mu yaka ha tyaa: “Andaa mba popi navi, heela auhe ngoka nguu li hempa okutya otjitji. Iya andaa himba popi tji li mouhunga, mo ntonene tji?”

²⁴Iya Hannas we mu tuma ae li modhonkuto, he mu tumu komuyambethi omunene Kaifas.

²⁵Petrus wa li aa kulama pomulilo, ama ungulukwa. Iya mboka mbava li pamo nawo ve mu pula hava tyaa: “Ove haove wo umo owomovalongwa ve?” Petrus we litendela ha tyaa: “Aai, ame haame.”

²⁶Umo owomovapika womuyambethi omunene, owawo womulumentu ngoka Petrus ngwaa kopolele okutwi, wa heela Petrus ha tyaa: “Hí ku mwene motjuundo pamo naye?”

²⁷Petrus we litendela uke, iya dhivadhiva onkondombolo hai popi.

²⁸Iya omuhuka omunene ovakwavita va itha mo Jesus moyaKaifas, have mu twala kombala yomutumini Omuroma. Iya Ovajuda mombala kava ile mo, mena lyokutya va li amava hala okukala ava kohoka, opo va ule okulya ondjona yOpaasa.

²⁹Iya Pilatus wa pita mo, ha i kuwo, he ve pula ha tyaa: “Omulumentu nguka mamu mu kondjethele tji?”

³⁰Wo ve mu yaka hava tyaa: “Omulumentu hengu ngaile ka ningile ovilinga ovivi, ngai nt̯e katu mu etele kwoove.”

³¹Iya Pilatus we ve heela ha tyaa: “Mu ithen̯i po ovene, mu ke mu koye moveta yen̯i.” Ovajuda ve mu yaka hava tyaa: “Nt̯e twa tjaelwa okudhipaa omuntu.”

³²Hehi tja ningwa, opo odhondaka ndhoka Jesus ndhaa popya dhi hwithilwe po, hiaa hololola okutya et̯o ndyoka ndima t̯i, li li vi.

³³Pilatus, wa tjuna uke mombala, ha ithana Jesus, ye he mu pula ha tyaa: “Oove ohamba yOvajuda?”

³⁴Jesus wa yaka ha tyaa: “Epulo hendi lya dhi mwoove omwene ne omovantu vamo mbava ntjipulula pwoove?”

³⁵Pilatus we mu yaka ha tyaa: “Ame ndjiMujuda? Ovantu wotjiwan̯a tjoye novayambethi vawo ovene owo ve ku eta kwaame. Wa ningi tji?”

³⁶Jesus wa yaka ha tyaa: “Ouhamba wandje hawomouye hembu. Ngaile ouhamba wandje wa li owomouye hembu, ngai ovantu vandje va nkondjele, ahame yandjwa momawoko Ovajuda. Iya ouhamba wandje hawahempa.”

³⁷Pilatus we mu pula ha tyaa: “Oove ohamba nan̯i?” Jesus we mu yaka ha tyaa: “U li mondjila himo tya ndjihamba. Otjo mba yumukilwa, tjo otjo mbe dhila mouye hembu, opo ndji popye otjatjili. Auhe nguu li motjatjili, ma nteelele.”

³⁸Pilatus we mu pula ha tyaa: “Otjatjili otjitji?” Pilatus hiaa popi nyahoka wa tjuna uke pondje kOvajuda ha tyaa: “Ame hí lwete mo onkali muye.

³⁹Iya pomatango otjipito tjOpaasa mu na onkalo yoku mu kutululila onkwatwa imo. Mamu hala ndji mu kutululile ohamba yOvajuda?”

⁴⁰Iya wo va wololoka uke unene hava tyaa: “Aai, haye ngoka! Nt̯e matu hala Barabas!” Iya Barabas wa li omputji.