Read zemba Johannes 6 Bible Online

Johannes 6 - zemba bible

Johannes 6

¹Kon̯ima yovipuka hembi Jesus wa ya tjikoohehinya tjelunga lyaGalilea ne ndii tiwa elunga lyaTiberias.

²Owingi wovantu we mu landula, mena lyokutya wo va mona ovilingatangan̯eko mbyoka mbyaa ninga, hiaa velula ovavedhi.

³Jesus wa londa kondundu, ha kala pohi hoka pamo novalongwa ve.

⁴Iya Opaasa, otjipito tjOvajuda, tja li popedhi.

⁵Jesus hiaa yele omeho, wa mona owingi wovantu mbumau ya kuye, wa pula Filippus ha tyaa: “Matu ka landa pi ovikulya mbimavi hulu ovantu hemba?”

⁶Hehi we tji popya a lole Filippus, mena lyokutya ye omwene wa li ae tji i soka hima hala okuninga.

⁷Filippus we mu yaka ha tyaa: “Omingome vyodhondenari omathele avali kaavi ve hulu, opo auhe ngaile a pewe tuu okanyembu okanunu vala.”

⁸Umo owomovalongwa ve, Andreas, omunitjaSimon Petrus, we mu heela ha tyaa:

⁹“Hempa pe na omudhantu nguu na omingome vitano nodhohi mbali, atjaa hembi mavi popile tji kovantu ovengi mbave lithike hempa?”

¹⁰Jesus we ve heela ha tyaa: “Kalethen̯i pohi ovantu.” Pompuka mpoka pa li ehodhi en̯ingi. Ovantu avehe va kala pohi. Ovalumentu mboka va li omayovi atano.

¹¹Jesus wa itha po omingome, ha kumbu, he vi yandja kovantu mboka mbava li ava kala pohi, otjo a ninga wo nodhohi. Avehe hava mono ovikulya mbyaa hulu.

¹²Ovantu avehe hive kuta, Jesus wa heela ovalongwa ve ha tyaa: “Ongedhen̯i ovinyembu avihe mbyoka mbyaa hupu po, hávi yonaka.”

¹³Iya va ongedha ovinyembu avihe mbyoka mbyaa hupithwa po kovantu hive kuta, have yulitha odhombwe omulongo nambali.

¹⁴Ovantu mboka mbava mona otjilingakumithi hehi Jesus hiaa ninga, hava tyaa: “Nguka oye e li ye nawanawa omuprofeti ngoka ngwaa li ae na okuya mouye.”

¹⁵Jesus wa li ae tji i okutya ovantu mava hala okuya, ve mu kambule, wo ve mu ninge ohamba kodhonkono, Jesus ha tjuna uke kondundu aika.

¹⁶Iya okawiiwii hika wile pohi, ovalongwa ve va ya kontyo yelunga.

¹⁷Wo va londa mowato, hava utu okuyauka elunga, hava i koKapernaum. Iya katee kwa dhiwele, Jesus wa li aheye ya kuwo.

¹⁸Ombepo onene ya uta okupepa, hai imuna elunga.

¹⁹Wo hiva liya otjikambo hitji lithike podhokilometa ntano ne epandu, va mona Jesus ama ende kombanda yomeva aa vyuuka kowato, wo va li ava tila.

²⁰Iya Jesus we ve heela ha tyaa: “Hámu tila, aame!”

²¹Iya ovalongwa mokuhala oku mu tambula mowato, owato we thika dhivadhiva keheke hoka huva vadhwa amava hala okuya.

²²Ngamuhuka owingi wovantu wa li tjikoohehinya tjelunga. Va mona okutya kwa li vala owato umo, wo va li ave tji i okutya Jesus ka ile mo mowato pamo novalongwa ve, iya ovalongwa va ya aveika.

²³Omawato omakwawo ngaa dha koTiberias, e ya kontyo popedhi noluvedhe ndoka ovantu huva lilile omingome, Muhona hiaa kumbile.

²⁴Owingi wovantu hiwa mono okutya Jesus ke ko hoka, novalongwa ve kave ko, wa ya momawato, have ya koKapernaum okutaendha Jesus.

²⁵Ovantu hiva vadha Jesus tjikoohehinya tjelunga, ve mu pula hava tyaa: “Rabbi, we ya po nalun̯i hempa?”

²⁶Jesus we ve yaka ha tyaa: “Ame me mu heele otjatjili okutya n̯e kaamu ntaendha mena lyahimwa mono ovilingatangan̯eko mbyoka mbimba ningi, iya omena lyokutya mwa li omingome hembinya hamu kuta.

²⁷Hámu taendha ovikulya mbyoka mbimavi hulu, taendhen̯i ovikulya mbimavi kala po katee momwenyo waapehe, Omuna wOmuntu mbime ke mu pa, iya oye e li ye ngoka Ihe Kalunga ngwee mu twaa otjilimbo tje.”

²⁸Iya wo ve mu pula hava tyaa: “Ngatu ninge tji, opo tu undape ovilinga vyaKalunga?”

²⁹Jesus we ve yaka ha tyaa: “Ovilinga mbyoka Kalunga mbyaa hala, mu vi undape, hoovyombi okutya mu itavele mungoka ngwaa tumwa kuye.”

³⁰Wo ve mu pula hava tyaa: “Otjilingatangan̯eko otjin̯i himo ningi, tu tji mone nt̯e tu ku itavele? Mo ningi tji?

³¹Ootateombwale va lile omanna mokuti, omisonekwa ngahi mavi popi himavi tyaa: ‘Ye we ve pa omungome womeulu, va lye.’ ”

³²Jesus we ve heela ha tyaa: “Ame me mu heele otjatjili okutya Moses haye e mu pele omungome womeulu, Tate oye e mu pa omungome watjatjili mbumau dhi meulu.

³³Iya ngoka nguma dhi meulu, oye e li omungome waKalunga, ma yandja omwenyo kouye.”

³⁴Wo ve mu kumba hava tyaa: “Taa, iya tu pa omungome mboka apehe.”

³⁵Jesus we ve heela ha tyaa: “Aame omungome womwenyo. Ngume ya kwaame kaa t̯a ondjala nokanunu, nangoka nguma itavele mwaame kaa t̯a uke onyota.

³⁶Iya ame mbe mu heela okutya mwa mbona, atjaa kamu itavelele.

³⁷Ovantu avehe mboka Tate mbaa mpa, mave ya kwaame. Ame híme ta po noumo ngoka ngume ya kwaame,

³⁸mena lyokutya ame mba dha meulu, hí dhile okuhwithila po ehalo lyandje omwene, mbe ya okuhwithila po ehalo lyahengu ngwaa ntuma.

³⁹Ehalo lyahengu ngwaa ntuma hoolyondi okutya ahame keketha noumo owomovantu mboka avehe Tate mbaa mpa, iya ndji ke ve imune kout̯e avehe metango lyathiinina.

⁴⁰Iya ehalo lyaTate hoolyondi okutya auhe ngoka nguma mono Omuna, ha itavele muye, ma kala nomwenyo waapehe, ame me ke mu imuna metango lyathiinina.”

⁴¹Ovajuda va uta okun̯umutula, Jesus hiaa tyaa: “Aame omungome mboka mbwaa dha meulu.”

⁴²Wo ve lipula hava tyaa: “Nguka haJesus nan̯i, omunwaJosef? Ina naihe tu ve i. Ovi iya napano, hima tya wa dha meulu?”

⁴³Jesus we ve yaka ha tyaa: “Hámu n̯umutula.

⁴⁴Kaku na tja omuntu noumo nguma ulu okuya kwaame, kakele kaTate ngwaa ntuma ae mu eta kwaame, ame me ke mu imuna kout̯e etango lyathiinina.

⁴⁵Ovaprofeti va soneka hava tyaa: ‘Ovantu avehe mava ka kala ava longethwa kuKalunga.’ Auhe ngoka nguma tee hitja dhi kuTate, ye he lilongo tjo, oye me ya kwaame.

⁴⁶Hehi kaatji tya ngaile pe na omuntu ngwaa mona Tate, aai, Omuna ngoka ngwaa dha kuKalunga, oye aika a mona Tate.

⁴⁷Ame me mu heele otjatjili okutya ngwaa itavele, u na omwenyo waapehe.

⁴⁸Aame omungome womwenyo.

⁴⁹Owoihoombwale va lile omanna mokuti, iya va t̯a.

⁵⁰Kwalukele ngoka nguma li omungome mboka mbwaa dha meulu, ke na mpoka mpameya t̯i.

⁵¹Aame omungome womwenyo mboka mbwaa dha meulu. Kwalukele ngoka nguma li omungome hembu, ma kala ae na omwenyo katee apehe. Omungome mboka mbume mu pa, olutu lwandje, ndoka ndume yandja, lu ninge omwenyo wouye.”

⁵²Hehi tja eta olutangu olunene mokati kOvajuda. Wo ve lipula hava tyaa: “Omulumentu hengu ma ulu vi oku tu pa olutu lwe, tu lu lye?”

⁵³Jesus we ve yaka ha tyaa: “Ame me mu heele otjatjili okutya andaa kaamu li olutu lwOmuna wOmuntu n̯e kaamu nu ombindhi ye, kaamu kala amu na omwenyo.

⁵⁴Ngoka nguma li olutu lwandje, ye ha nu ombindhi yandje, u na omwenyo waapehe, naame me ke mu imuna kout̯e etango lyathiinina.

⁵⁵Iya olutu lwandje ovikulya vyatjatjili, nombindhi yandje okunwa kwatjatjili.

⁵⁶Nguma li olutu lwandje, ye ha nu ombindhi yandje, ma kala mwaame, naame me kala muye.

⁵⁷NgaTate ngwaa ntuma hiee na omwenyo, naame wo ndji na omwenyo mena lye, nanguma li olutu lwandje, ma kala nomwenyo mena lyandje.

⁵⁸Hembu omungome mbwaa dha meulu, mbuhau ngala mboka mbwaa lilwe kowoihoombwale, mbava t̯a. Nguma li omungome hembu, ma kala nomwenyo katee apehe.”

⁵⁹Odhondaka hendhi Jesus we dhi popila mosinagoga moKapernaum, hiaa li ama longo ovantu.

⁶⁰Ovengi owomovalongwa ve mboka mbava tyaa odhondaka hendhi, va popya hava tyaa: “Elongo hendi ekukutu unene. Aan̯i nguma ulu oku li teelela?”

⁶¹Jesus hiee tji nongonoka omwene okutya ovalongwa ve mava n̯umutula mena lyodhondaka ndhoka ndhaa popi, we ve heela ha tyaa: “Odhondaka ndhika dhe mu ningitha omutima omuvi?

⁶²Mamu tya vi, ndimwa ka mona Omuna wOmuntu ama londo, ha tjuna hoka hwaa li lukulu?

⁶³Ombepo oyo mai yandja omwenyo, soka hitji li momuntu kaatji popile tja. Odhondaka ndhimbe mu heele odho dhi li Ombepo ndjimai yandja omwenyo.

⁶⁴Iya mokati ken̯i mu na vamo mboka mbahava itavelele.” Iya okudha peutilo Jesus wa kala ae tji i okutya owaan̯i mboka mbahave mu itavelele, nangoka ngume ke mu weleleka.

⁶⁵Iya we ve heela ha tyaa: “Hehi otjo mbe mu heele okutya kaku na tja noumo nguma ulu okuya kwaame, kakele vala ae tji yandjelwa kuTate.”

⁶⁶Okudha mpoka ovengi owomovalongwa ve va tjuna mon̯ima, wo kava endele uke pamo naye.

⁶⁷Iya Jesus wa heela ovalongwa ve mboka omulongo navavali ha tyaa: “N̯e kaamu hala wo okuya?”

⁶⁸Simon Petrus we mu yaka ha tyaa: “Muhona, matu i kwaan̯i? Ove u na odhondaka dhomwenyo waapehe.

⁶⁹Nt̯e twa itavela, ye tu tji i okutya oove Omudhilikwa waKalunga.”

⁷⁰Jesus we ve yaka ha tyaa: “Hí mu holowolele omulongo navavali? Iya nandaku tiwa otjo nyahoka, umo owomun̯e omudiapoli.”

⁷¹Jesus wa li ama popi Judas munkwaSimon Iskariot. Iya Judas, nandaku tiwa wa li umo owomovalongwa omulongo navavali, oye a li ame ke mu weleleka.