Read zemba Johannes 8 Bible Online

Johannes 8 - zemba bible

Johannes 8

²Omuhuka omunene we ya uke motempeli. Ovantu avehe ve ya kuye. Iya ye wa kala pohi, he ve longo.

³Ovalongiveta nOvafarisai va eta mo omukadhintu ngwaa hupulwa ama vakwa, have mu kulameke mokati kawo.

⁴Iya wo va heela Jesus hava tyaa: “Mulongethi, omukadhintu hengu wa hupulwa ama vakwa.

⁵Iya napano moveta yetu Moses we tu heela okutya omukadhintu ngwaa ningi nyahoka, nga dhipawe nomawe. Iya ove mo tya vi?”

⁶Hehi ve tji popya, opo va lole nyahoka Jesus, opo ve tjiiwe oku mu vela odhombedhi. Jesus wa yongama, ha soneke pohi nomunwe.

⁷Iya hiva li amava pula Jesus omapulo, Jesus wa yongamuka ha tyaa: “Nguhe na tja odhonkali mokati ken̯i, nga tenge oku mu tona newe.”

⁸Jesus we liyongamena uke, ha soneke pohi.

⁹Wo hive tji tee, va ya kooumo nooumo okuuta kovanene. Jesus we thiwa po aika nomukadhintu ngoka ngwaa kulama mpoka.

¹⁰Jesus wa yongamuka, he mu pula ha tyaa: “Ove, iya vamo ve li pi? Kape na ngwee ku koyo?”

¹¹Omukadhintu wa yaka ha tyaa: “Aai, Muhona, kape na tja noumo.” Jesus we mu heela ha tyaa: “Naame híme ku koyo. Iya enda, okudha hempa hó lundha uke.”]

¹²Jesus wa heela uke ovantu ha tyaa: “Aame otjiten̯i tjouye. Nguma ndandula, kaa ende met̯iku nokanunu, iya ma kala notjiten̯i tjomwenyo.”

¹³Iya Ovafarisai ve mu heela hava tyaa: “Mo lihipulula ove omwene. Otjihipululo tjoye hatjatjili.”

¹⁴Jesus we ve yaka ha tyaa: “Nandaku tiwa me lihipulula ame omwene, me popi otjatjili, mena lyokutya ame ndji ku i hoka humba dha nahoka hume i. Iya n̯e kamu ku i hoka humba dha nahoka hume i.

¹⁵N̯e mamu koyo monkalo yountu, iya ame hí na ngume koyo.

¹⁶Iya andaa me koyo, ekoyo lyandje li li mondjila, mena lyokutya ame haame aika motjipuka hehi, iya tu li naTate, ngoka ngwaa ntuma.

¹⁷Iya nomoveta yen̯i mwa sonekwa okutya otjihipululo tjovantu vavali otjatjili.

¹⁸Ame me lihipulula ame omwene, naTate, ngoka ngwaa ntuma, ma ntjipulula.”

¹⁹Ovafarisai ve mu pula hava tyaa: “Iho u li pi?” Jesus we ve yaka ha tyaa: “Ame kamu ndji i, naTate kamu mu i. Ngaile mu ndji i, ngai naTate mu mu i wo.”

²⁰Odhondaka hendhi adhihe Jesus we dhi popya, hiaa li ama longo ovantu motempeli, mondjuwo ndjoka mumwa li ovikasa mumu tuwa mbimavi yambwa. Iya kape na tja omuntu noumo ngwee mu kambula, mena lyokutya owola ye ya li ahaiye thika.

²¹Jesus we ve heela uke ha tyaa: “Ame me i, n̯e mamu kala amamu ntaendha, iya mamu ka t̯ila modhonkali dhen̯i. Kompuka hoka hume i, kaamu ka ula okuya ko.”

²²Ovajuda va popya hava tyaa: “Ma hala pamo okulidhipaa, hima tyaa: ‘Kompuka hoka hume i, kaamu ka ula okuya ko’?”

²³Jesus wa yaka ha tyaa: “N̯e mwa dha huno pohi, iya ame mba dha kombanda. N̯e muwomouye, iya ame hiwomouye hembu.

²⁴Iya otjo me mu heele okutya mamu ka t̯ila modhonkali dhen̯i. Iya andaa kaamu itavele okutya ‘Ame Aame,’ mamu ka t̯ila modhonkali dhen̯i.”

²⁵Wo ve mu pula hava tyaa: “Ove oove an̯i?” Jesus we ve yaka ha tyaa: “Ohimbe mu heele ae lukulu.

²⁶Ame ndji na otjingi okupopya ouhunga nan̯e noku mu koya. Iya ngoka ngwaa ntuma, owatjatjili. Mbyoka mbime tee kuye, ovyo me heele ouye.”

²⁷Ovajuda va li ahave tji i okutya Jesus me ve heele Ihe.

²⁸Iya Jesus we ve heela ha tyaa: “Katango mamu ka yela Omuna wOmuntu peulu, mamu ka mona okutya aame. Iya mamu ka mona okutya ame híme ningi tja mwaame omwene, iya me popi ovipuka mbyoka Tate mbyaa ndonga.

²⁹Iya ngoka ngwaa ntuma, u li pamo naame, ye ka ndjetha ndji kale aika, mena lyokutya apehe ndji undapa ovipuka mbyee mu thevelwa.”

³⁰Jesus hiaa popi ovipuka hembi, ovantu ovengi va itavela muye.

³¹Jesus wa heela Ovajuda mboka mbave mu itavela ha tyaa: “Andaa mamu kala modhondaka dhandje, otjatjili mamu kala ovalongwa vandje.

³²Mamu ka iwa otjatjili, iya otjatjili matji ke mu kutulula.”

³³Wo ve mu yaka hava tyaa: “Nt̯e tumbuto yaAbraham, katu na mpatwa li ovapika wovantu. Mo popi vi, himo tyaa: ‘Mamu ka kutululwa?’ ”

³⁴Jesus we ve yaka ha tyaa: “Ame me mu heele otjatjili okutya auhe ngoka nguma undapa oulundhi, omupika woulundhi.

³⁵Iya omupika ka kala monganda apehe, iya omuna u kala mo apehe.

³⁶Iya Omuna andaa me mu kutulula, otjatjili mamu kala amwa kutuluka.

³⁷Ndji tji i okutya n̯e mumbuto yaAbraham, atjaa mamu hala okundhipaa, mena lyokutya odhondaka dhandje kadhi mwene mo oluvedhe mun̯e.

³⁸Ame me popi ovipuka mbimba mona puTate, iya n̯e mamu undapa soka himwa heelwa kwiiho.”

³⁹Wo ve mu yaka hava tyaa: “Tate oAbraham.” Jesus we ve heela ha tyaa: “Ngaile mudhondele dhaAbraham, ngai mamu undapa ovilinga mbyoka Abraham mbyaa undapa.

⁴⁰Iya napano n̯e mamu hala okundhipaa, ngundji mu hipululila otjatjili himba tyaa kuKalunga. Iya Abraham ke tji ningile.

⁴¹N̯e mamu undapa ovilinga vyaiho.” Wo ve mu yaka hava tyaa: “Nt̯e katu yumukililwe movihulo. Tu na Tate umo vala, oKalunga.”

⁴²Jesus we ve heela ha tyaa: “Ngaile Kalunga oye a li iho, ngai mu ntjole, mena lyokutya ame mbe ya okudha kuKalunga, ame napano aame hengu. Ame hí dhile mwaame omwene, iya oye a ntuma.

⁴³Omena lyatji hihamamu koneke hime popi? Omena lyokutya n̯e kaamu ulu okutyaa odhondaka dhandje.

⁴⁴N̯e mu na iho omudiapoli, mamu hala okuundapa ehalo lyaiho. Ye omudhipai okudha peutilo, ye ke na tja mpoka mpaa li motjatjili, mena lyokutya muye kamu na tja otjatjili. Ama popi ovithithi, u popya ovipuka vye omwene, mena lyokutya ye onkembi, ye oye e li ihe yovithithi avihe.

⁴⁵Iya n̯e kaamu ndjitavele mena lyokutya me popi otjatjili.

⁴⁶Aan̯i mun̯e nguma ulu okuyulika okutya ndji na odhonkali? Andaa me popi otjatjili, omena lyatji iya hihamu ndjitavele?

⁴⁷Ngoka ngwaa dha kuKalunga, u tyaa odhondaka dhaKalunga. N̯e kaamu tee odhondaka dhaKalunga, mena lyokutya kamu dhile kuKalunga.”

⁴⁸Ovajuda va yaka Jesus hava tyaa: “Katu popile hitja vyuuka, hitwa tyaa uMusamaria, ove u na ondemoni?”

⁴⁹Jesus wa yaka ha tyaa: “Ame hí na tja ondemoni, iya ame me tumbaleke Tate, iya n̯e mwa ntomba.

⁵⁰Ame híme taendha etumbalo lyandje omwene. Pe na umo ngoka ngume li ntjalele, ye oye e li omukoyi.

⁵¹Ame me mu heele otjatjili okutya kwalukele ngoka nguma takametha odhondaka dhandje kaa t̯i katee apehe.”

⁵²Ovajuda ve mu heela hava tyaa: “Napano tu tji i nawa okutya u na ondemoni. Abraham novaprofeti va t̯a, iya ove mo tyaa: ‘Kwalukele ngoka nguma takametha odhondaka dhandje, ke na tja mpama ka lola et̯o katee apehe.’

⁵³Ove umunene nan̯i wa pon̯a tate Abraham ngwaa t̯a? Ovaprofeti nawo va t̯a lukulu. Ove mo liningi an̯i?”

⁵⁴Jesus we ve yaka ha tyaa: “Ame ngaile me litumbaleke omwene, ngai etumbalo lyandje kali na tjilinga. Tate, ngumu tya, oye e li Kalunga ken̯i, oye a ntumbaleka.

⁵⁵N̯e kamu mu i, iya ame ndji mu i. Ngaile mba tya hí mu i, ngai ame ndjinkembi ngan̯e. Iya ame ndji mu i, nodhondaka dhe ndji dhi takametha.

⁵⁶Iho Abraham we hulukilwa okutya ma ka mona etango lyandje, ye we li mona, he hulukwa.”

⁵⁷Ovajuda ve mu heela hava tyaa: “Ove kuya ninga uke odhombula omilongo vitano, napano mo tya wa mona Abraham?”

⁵⁸Jesus we ve yaka ha tyaa: “Ame me mu heele otjatjili okutya Abraham tainkolo aheya yumukwa, ame oko mba li lukulu.”

⁵⁹Ovajuda va nyanga omawe, ve mu tone, atjaa Jesus ha holama, ha dhi mo motempeli.