Read zemba Ovilinga 10 Bible Online

Ovilinga 10 - zemba bible

Ovilinga 10

¹MoKesarea mwa li omulumentu nguu tiwa oKornelius, omunene wovakwavita wotjilombo tjaItalia.

²Kornelius wa li omuundapeli nomutilikalunga pamo nonganda ye aihe. Ye wa li aa yandja omapopilo kOvajuda ovathona, ye wa kambulithile wo okukumba kuKalunga.

³Etango limo powola ontyatatu yokomatango Kornelius wa mona emoneko, omweengeli waKalunga ame ya kuye, ye he mu ithana ha tyaa: “Kornelius!”

⁴Kornelius wa tala omweengeli, he mu tongolola, wa li aa tila, ha tyaa: “Muhona, hehi otjitji?” Omweengeli we mu yaka ha tyaa: “Kalunga wa tee okukumba kwoye, ha mono ovilinga vyoye vyokupopila ovathona, ye he ku thipaluka.

⁵Iya napano tuma ovalumentu vamo mbamava i koJoppe, va ka ete Simon nguu tiwa oPetrus.

⁶Ye omuyenda monganda yaSimon omupeli woviyalo, owonganda ndjii li popedhi nelunga.”

⁷Iya omweengeli ngoka ngwaa li ama popi naye, hiaa i, Kornelius wa ithana ovantu ve vavali nomukwavita umo omuundapelikalunga, owomumboka mbava li puye.

⁸Iya ye hiee ve hipululile ovipuka avihe mbyoka mbyaa ningwa po, he ve tumu koJoppe.

⁹Iya ngamuhuka, tainkolo ava li mondjila, popedhi nokuthika motjitungwalongo tjaJoppe, Petrus wa londa kombanda yondjuwo pondatu oku ka kumba.

¹⁰Petrus wa li ama hala okulya, mena lyokutya wa li aa t̯i ondjala unene. Iya tainkolo ovikulya vya li amavi telekwa, we lipuulukwa, ha mono emoneko.

¹¹Petrus wa mona eulu alye liyapuka, mo hamu dhi otjipuka himatji ngala otjitopa otjinene hitja t̯itwa kodhontyo dhatjo ne, hatji thothonokethelwa pohi.

¹²Mutjo mwa li ovipuka mbii na omwenyo, mbii lili nambii lili, mbii na omakulu ane, nambii kokoloka komadhimo, novidhila vyopeulu.

¹³Iya ondaka ye mu heela hai tyaa: “Petrus kulama, dhipaa ovipuka mbyoka, u lye.”

¹⁴Iya Petrus wa yaka ha tyaa: “Aai! Muhona kaatji tjiiwa, ame nkee mba dhile, hí na mpamba lile otjipuka hihatji liwa nokanunu ne hihatji kohokele.”[4]

¹⁵Ondaka ye mu popitha otjikando otjityavali hai tyaa: “Atjihe soka Kalunga hiaa dhilika, ove koo ulu okutya otjivi.”

¹⁶Iya ondaka hiye mu popitha ovikando vitatu, otjitopa tja ithwa po hatji nanenwa meulu.

¹⁷Petrus hiaa mono emoneko ndyoka wa li aa kumwa. Tainkolo a li ame lipula nemoneko ndyoka okutya mali tya vi, ovalumentu mbenya mbava li ava tumwa kuKornelius va yulikilwa onganda yaSimon, wo ve ya hava kulama potjivelo.

¹⁸Wo va pula monganda amava wololoka unene hava tyaa: “Monganda muka kamu thikilile omulumentu nguu tiwa oSimon Petrus?”

¹⁹Iya Petrus tainkolo a li ame lipula uke nemoneko okutya mali tya vi, Ombepo Ondhilikwa ye mu heela hai tyaa: “Teelela, pomuvelo pe na ovalumentu vatatu mbamave ku pula.

²⁰Iya kulama napano u heluke, ove u ende pamo nawo, hó limbililwa, mena lyokutya aame mbe ve tumu.”

²¹Petrus wa heluka, ha i pohi kovalumentu, ye he ve heele ha tyaa: “Aame hengu ngumamu hala. Mwe ya okweeta tji?”

²²Wo ve mu yaka hava tyaa: “Nt̯e twa tumwa komunene wovakwavita Kornelius. Ye omulumentu omuwa unene omutilikalunga, ngwaa tumbalekwa unene kOvajuda avehe. Wa heelwa komweengeli omudhilikwa memoneko e ku ithane, u ye konganda ye, a tyee soka hiuu na tjo, u mu heele.”

²³Iya Petrus wa ithanena ovalumentu monganda, he ve pa omala otjit̯iku soka. Komuhuka hikwa tji, Petrus wa kulama, ha i pamo nawo. Vamo owomovaitaveli owomoJoppe va ya pamo naye.

²⁴Etango etyavali otjo ve thika moKesarea, Kornelius wa vadhwa ame ve kevelele, wa ithana ovakwawo nomapanga e.

²⁵Iya Petrus tainkolo a li ama ende okuya nokonganda, Kornelius wa wanena naye, ha twike odhongolo kotjipala tje, he mu tumbaleke.

²⁶Iya Petrus we mu heela ha tyaa: “Kulama, mena lyokutya ame naame ndjimuntu vala.”

²⁷Iya Petrus naKornelius va enda amava tompola himava i nomonganda, moka muva vadha ovantu ovengi ava ongana.

²⁸Iya Petrus we ve heela ha tyaa: “N̯e mu tji i nawa okutya kOvajuda tji dhila okulitjinga nokulivalula nomihoko vimo. Iya Kalunga wa ndjulikila okutya hé popi omuntu okutya omuvi ne hamudhilikwa.

²⁹Iya mwa ndjithana, mbe ya, hí anyene. Napano me mu pula okutya mwa ndjithanene tji?”

³⁰Kornelius wa yaka ha tyaa: “Iya hipa piti omatango ane powola nawanawa ngahendji, ame mba vadhwa ame kumbu monganda yandje powola ondatu yokomatango. Dhivadhiva mbe ya okulihaka momulumentu ngwaa kulama komeho yandje, nguu na ovikutu mbimavi ngen̯auka.

³¹Ye wa ntjeela ha tyaa: ‘Kornelius! Kalunga wa tee okukumba kwoye, ye wa thipaluka ovilinga vyoye vyokupopila ovathona.

³²Iya tuma omuntu koJoppe, a ka ete ko omulumentu nguu tiwa oSimon Petrus. Ye we thikila monganda yaSimon, omupeli woviyalo, owonganda ndjii li pontyo yelunga.’

³³Iya ame opo mba dhi oku ku tumina dhiva elaka. Ove wa ningi nawa hiwe ya. Nt̯e atuhe tu li pamo hempa kotjipala tjaKalunga, u tu heele atjihe soka Muhona hiee ku heela.”

³⁴Petrus wa uta okuteetha ha tyaa: “Otjatjili ame napano mba iwa okutya Kalunga ke na tja okapungulula kovantu avehe.

³⁵Kalunga u tambula omuntu moviwan̯a avihe, nguu mu tila nanguu undapa ouvyuuki.

³⁶Hendji oyo i li ondaka Kalunga ndjaa tuma kotjiwan̯a tjaIsrael noku ve teethela ondaka ombwa yehuluko ndjaa etwa naJesus Kristus, Muhona wovantu avehe.

³⁷N̯e mwa iwa nawa soka hitja ningwa motjilongo atjihe tjaJudea, tjo tja uta moGalilea, Johannes hiaa dha poku ve teethela etjatjo.

³⁸N̯e mwa iwa okutya Jesus waNasaret, Kalunga we mu pa Ombepo Ondhilikwa nodhonkono. Jesus wa endaenda apehe, wa undapa ouwa, ye ha velula avehe mbava li kohi yodhonkono dhaSatana, mena lyokutya Kalunga wa li puye.

³⁹Nt̯e tudhombangi dhovipuka avihe Jesus mbyaa ninga motjilongo tjOvajuda nomoJerusalem, iya wo ve mu dhipaa, hive mu yendjeleleka komuti.

⁴⁰Iya Kalunga we mu imuna kout̯e etango etyatatu, a moneke.

⁴¹Jesus ka monekele kotjiwan̯a atjihe, iya nan̯i okunt̯e vala mboka Kalunga mbaa holowola ae lukulu, tu ninge odhombangi dhe, nt̯e mbatwa lya, hatu nu pamo naye kon̯ima yahiaa imuka kout̯e.

⁴²Kalunga we tu heela tu teethele ovantu avehe ondaka ombwa noku ve hipululila Jesus okutya wa holowolwa kuKalunga, a koye ovanamwenyo novat̯e.

⁴³Ovaprofeti avehe va popile Jesus okutya omuntu auhe nguma itavele muye, ma ithilwa po odhonkali dhe mena lye.”

⁴⁴Iya Petrus tainkolo a li ama popi odhondaka ndhoka, Ombepo Ondhilikwa ye ya movantu mboka mbava li amava teelele ondaka ombwa.

⁴⁵Ovaitaveli vamo Ovajuda mbava dhile naPetrus koJoppe, ve kuminwe hiva mono okutya Ombepo Ondhilikwa ya pewa ovapaani.

⁴⁶Ovapaani va li amava popi momalaka ngahae iwe, otjo mava hivilike Kalunga. Petrus we ve heela ha tyaa:

⁴⁷“Ovantu hemba va pewa Ombepo Ondhilikwa ngant̯e hitwa pewa. Pe na nguma anya okutjatja ovantu hemba nomeva?”

⁴⁸Petrus we ve heela okutya wo ngava tjatjelwe mena lyaJesus Kristus. Wo va pula Petrus, a kale pamo nawo omatango amo.