Read zemba Ovilinga 18 Bible Online

Ovilinga 18 - zemba bible

Ovilinga 18

¹Kon̯ima yovipuka hembi Paulus wa dha moAtena, ha i koKorinto.

²MoKorinto omo a ka vadha Omujuda nguu tiwa oAkula nomukadhe Priskila. Omulumentu hengu wa yumukilwa moPontus, wa vadhwa opo e ya okudha koItalia, mena lyokutya omukesari Klaudius wa heela Ovajuda avehe okutya ngava dhe mo moRoma. Paulus wa ya oku ke ve tala,

³ha kala puwo, hava undapa pamo, mena lyokutya wa li omuundapi wodhotenda ngawo.

⁴Paulus wa popya mosinagoga mEsabati alihe, ha itaveletha Ovajuda nOvagreka.

⁵Iya Silas naTimoteus hive thiki, moKorinto okudha koMakedonia, va vadha Paulus ae litwaa mokuteetha odhondaka dhaKalunga nokuyulikila Ovajuda okutya Jesus oye e li Messias.

⁶Ovajuda hive mu kondjetha, ve mu penya, iya Paulus we lipupula ombuma kovikutu vye, he ve heele ha tyaa: “Andaa mwa ka keka, onkali oyen̯i ovene. Ame hí na mo tja motjipuka hehi. Ame okudha ndino hendi, me i ndji ka teethele ovapaani.”

⁷Paulus wa dha po, ha ka kala konganda yomulumentu omutilikalunga nguu tiwa oTitius Justus. Onganda ye ya li popedhi nosinagoga.

⁸Krispus, ngwaa li omunene wosinagoga, wa itavela muMuhona pamo nonganda ye aihe. Ovantu ovengi owomoKorinto mbava teele ondaka yaKalunga, va itavela, hava tjatjwa.

⁹Out̯iku umo Muhona wa popitha Paulus memoneko ha tyaa: “Hó tila, twikila okuteetha, hó nyimi,

¹⁰mena lyokutya ame ndji li pamo naove. Kape na omuntu ngume ku kondjetha, he ku ningile ouvi, mena lyokutya ndji na ovantu ovengi motjitungwalongo hehi.”

¹¹MoKorinto Paulus wa kala mo ombula imo nomiedhi epandu, ama longo ovantu ondaka yaKalunga.

¹²Iya Gallio hiaa li omutumini moAkaia, Ovajuda ve litwaa kumo, hava kambula Paulus, have mu twala kompela.

¹³Iya hava tyaa: “Omulumentu hengu u hekela ovantu va undapele Kalunga nonkalo ndjihai i kumo noveta.”

¹⁴Iya Paulus hiee tje hala okupopya, Gallio wa heela Ovajuda ha tyaa: “Vajuda n̯e, ngaile pa yonwa ne pa undapwa ovilinga vyouputji, ngai mbe likambulithile oku mu teelela.

¹⁵Iya napano himamu litetha ombata ouhunga nodhondaka nomana novitumino vyen̯i ovene, on̯e ovene mwa thele okulipula novipuka hembi. Ame hime ulu okukoya ovipuka mbii li nyahoka.”

¹⁶Ye we ve lamba mo mompela.

¹⁷Wo avehe va kambula Sostenes, ngwaa li omunene wosinagoga, have mu tonene komeho yompela. Gallio kaa li ae na ko natja nokanunu.

¹⁸Paulus wa kala moKorinto omatango omengi pamo novaitaveli, he ve lekele, ha i pamo naPriskila naAkula koSiria. Iya tainkolo ahaveya ya nombapolo, wa kululwa moKenkrea mena lyeano ndyaa vadhwa a ana.

¹⁹Wo ve ya moEfeso, moka Paulus mwaa thiaa Priskila naAkula, ye wa ya kosinagoga hoka huva ka tompola nOvajuda.

²⁰Iya Ovajuda hiva pula Paulus, a kale pamo nawo omatango omengi, ye ka itavelele.

²¹Iya ye we ve lekela ama tyaa: “Kalunga andaa we tji hala, me tjuna uke.” Paulus moEfeso wa dha mo nombapolo.

²²Iya hiee thiki moKesarea, wa ya koJerusalem ha ka popitha eongalo, okudha mpoka ha i koAntiokia.

²³Moka omo a kala omatango amo. Kon̯ima ha ka valulila po ovilongo novilongo vyomotjit̯indwalongo tjaGalatia notjaFrigia. Wa popila ovaitaveli vahoka, va kole meitavelo lyawo.

²⁴Omujuda umo nguu tiwa oApollos ngwaa yumukilwa moAleksandria, we dhile koEfeso. Ye wa li nounongo wokupopya nokwiiwa omisonekwa.

²⁵Apollos wa longelwe ondjila yaMuhona, ha teetha nouvandhi, ha longo ovantu ouhunga naJesus. Iya ye wa ivilwe vala etjatjo lyaJohannes.

²⁶Apollos wa uta okuteetha nouvandhi mosinagoga. Iya Priskila naAkula hive mu teelela, ve mu ithana e ye koyawo. Wo ve mu longa, have mu thitululile nawa ondjila yaKalunga.

²⁷Iya Apollos hiaa li ama hala okuya koAkaia, ovaitaveli womoEfeso ve mu popila mouwa, wo hava soneke omukanda, e u twaelele kovaitaveli mbave li koAkaia, oku ve heela okutya ve mu yakule nawa. Iya ye hiee thiki, wa popila unene ovantu mboka mbava ninga ovaitaveli ket̯ilonkenda lyaKalunga.

²⁸Iya wa suka Ovajuda movipathi vyovantu avehe, ama itha momisonekwa okutya Jesus oye e li Messias.