Read zemba Ovilinga 2 Bible Online

Ovilinga 2 - zemba bible

Ovilinga 2

¹Iya etango lyaPentekoste[1] hilye thiki, ovaitaveli avehe va vadhwa ava ongana poluvedhe lumo.

²Dhivadhiva pa popya ondaka ndjaa dha meulu, ndjaa li amai ngala ombepo amai pepe nodhonkono, hai yula mondjuwo aihe muva li ava kala pohi.

³Iya wo va mona omalaka ngaa ngala omalakulaku omulilo ngae liyapauka, haa wile kombanda yomuntu auhe.

⁴Wo avehe ve yulithwa Ombepo Ondhilikwa, hava utu okupopya omalaka amo ngae lili, Ombepo Ondhilikwa ngahi ye ve pa va popye.

⁵MoJerusalem mwa li ovalumentu Ovajuda ovatilikalunga, mbava dha kovilongo novilongo vyomouye.

⁶Owingi wovantu hiva tee otjihoomo soka, va ongana pamo, wo va kumwa, mena lyokutya ve ve tyaa, auhe wa li ae yuvite melaka lye omwene.

⁷Wo avehe va tila, hava kumwa hava tyaa: “Talen̯i tuu, avehe nan̯i hemba mbamava popi havaGalilea?

⁸Ovi, iya nan̯i atuhe hitu ve yuvite amava popi momalaka etu?

⁹Nt̯e mbatu li hempa, tuVapartia nOvamedia nOvaelam, nahemba mbava kala moMesopotamia nomoJudea nomoKappadokia nowomoPontus nowomoAsia,

¹⁰nOvafrigia nOvapamfilia nOvaegipiti nowomovilongo mbyoka vyaLibia mbyaa ama koKireni nOvaroma hemba mbava kala muno nOvajuda mbava yumukilwa moujuda nambave lininga Ovajuda,

¹¹nOvakreta nOvaarabia, nt̯e atuhe tu ve yuvite himava popi ovilinga ovinene vyaKalunga melaka lyetu ovene.”

¹²Wo avehe va kumwa hava limbililwa, have lipula hava tyaa: “Hika otjipuka patji?”

¹³Iya vamo ve ve penya hava tyaa: “Ovalumentu hemba va pyaluka.”

¹⁴Petrus wa kulama pamo nomulongo naumo, ha popi nondaka ndjaa yeluka okuheela owingi wovantu ha tyaa: “Vajuda vakwetu, nan̯e amuhe mbamu li moJerusalem, nteelela ndjen̯i nawa, hime mu heele.

¹⁵Soka himamu soko okutya ovantu hemba va pyaluka, hatjo. Owola hendji ontyamoovi yomuhuka.

¹⁶Iya hehi otjo tja popilwe komuprofeti Joel, hiaa tile:

¹⁷‘Kalunga ma tya, omatango opehulilo ame me ka tila kombanda yovantu avehe Ombepo yandje, ovanwen̯i ovadhantu novakadhona mava ka teetha odhondaka dhaKalunga, omatele novathukona mava ka mona omamoneko, ovanene ven̯i mava ka lota omalambandjodhi.

¹⁸Iinga, momatango ngoka me ka yandja wo Ombepo yandje movapika vandje ovalumentu novakadhintu, nawo mava ka teetha odhondaka dhaKalunga.

¹⁹Me ka yulika ovikumithi peulu meulu nomatangan̯eko pohi kombanda yohi, maku ka kala ombindhi nomulilo nomwithi mbwaa twiima.

²⁰Etango ndyoka enene lyaMuhona ndyaa tumbala, tainkolo ahaliye ya, etango mali ka tjituka et̯iku, omwedhi mau ka thilaela ngombindhi.

²¹Iya auhe nguma kumbu mena lyaMuhona, ma ka hupithwa.’

²²“Vantu n̯e Ovaisraeli, teelelen̯i odhondaka hendhi! Jesus Omunasareta wa li omulumentu ngwaa holowolwa kuKalunga. Vaisraeli, Kalunga we mu holololela tjo kovilingankono, kovilingakumithi nokomatangan̯eko ngoka Kalunga ngaa undapetha Jesus mokati ken̯i, n̯e ovene ngahi mu tji i nawa.

²³Kalunga omwene we tji soka ae lukulu, ye he tji tokola okutya Jesus ma yandjwa momawoko en̯i, on̯e mwe mu yandja momawoko ovantu mbahave i oveta yaMoses, hamu mu papeletha komutjaakano, hamu mu dhipaetha.

²⁴Kalunga we mu imuna kout̯e, ye we mu kutulula momiihamo vyet̯o, mena lyokutya et̯o kali ulile oku mu kambulila moupika.

²⁵Iya David we mu popya ha tyaa: ‘Ame ndji mona Muhona apehe ae li kotjipala tjandje. Ye u kala kokulyo kwandje, opo hé putala.

²⁶Iya omutima wandje we hulukwa, elaka lyandje li na ondolo onene, nolutu lwandje wo malu ka thuva meliun̯iko,

²⁷mena lyokutya omwenyo wandje koo u yethele motjovat̯e, ove koo yetha olutu lwomudhilikwa woye lu wole.

²⁸Wa ndonga odhondjila dhomwenyo, okukala po kwoye kwe ndjulitha ehuluko.’

²⁹“Valumentu vakwetu, ndjetha ndjen̯i, ndji mu heele poluhandja ouhunga natateombwale David okutya wa t̯a, ha pakwa mombila, katee ndino hendi ombila ye tu i mona.

³⁰Iya hiaa li omuprofeti wa ivilwe okutya Kalunga we mu anena eano okutya ontekulona ye imo etango limo mai ka kala ohamba.

³¹David wa iwa himatji ka ningwa komeho, iya we tu heela okutya Messias ma ka imunwa kout̯e. Ye wa popya ha tyaa: ‘Kalunga ke mu yethelele motjovat̯e nolutu lwe kalu yethelwe lu wole.’

³²Kalunga wa imuna Jesus hengu kout̯e, nt̯e atuhe tudhombangi dheimuko hendi.

³³Jesus wa yelulilwa peulu kokulyo kwaKalunga, iya ye wa pewa eudhiko lyOmbepo Ondhilikwa, Ihe ngahi e mu udhikila. Jesus we tu pa Ombepo Ondhilikwa, ndjimu mona napano nandjimu tyaa.

³⁴Iya David haye a londa keulu, iya ye omwene wa popya ama tyaa: ‘Muhona wa heela Muhona wandje ha tyaa: Kala pohi kokulyo kwandje,

³⁵katee me ningi odhondjedhi dhoye otjilyatelo tjodhompadhi dhoye.’

³⁶Iya Ovaisraeli avehe ngava kale ave tji i nawa okutya Jesus hengu ngumwa papela komutjaakano, Kalunga we mu ninga Muhona, naMessias.”

³⁷Iya ovantu hive tji tee, tje ve ihametha omitima, wo hava heele Petrus novayapostoli ovakwawo hava tyaa: “Valumentu vakwetu, ngatu ninge vi?”

³⁸Petrus we ve yaka ha tyaa: “Liteyululen̯i, omuntu auhe e litjatjethe mena lyaJesus Kristus, mu ithilwe po odhonkali dhen̯i. Iya n̯e mamu ka pewa otjali Ombepo Ondhilikwa.

³⁹Iya eudhiko hendi ndimwa udhikilwa olyen̯i nodhondele dhen̯i novantu avehe mbave li kokule, wo avehe Muhona Kalunga ketu me ke ve ithana.”

⁴⁰Petrus we ve hipululila odhondaka odhingi, ye he ve ilikin̯a ha tyaa: “Hupithwen̯i mo mekula hendi ndyaa uvalala.”

⁴¹Iya mboka mbava tambula odhondaka dhe, va tjatjwa, metango ndyoka mwa wedhwa ovantu mbave lithike pomayovi atatu.

⁴²Iya wo va kambulitha okukala melongo lyovayapostoli, moukumo, mokulya nomokukumba pamo.

⁴³Ovantu avehe va kala nowoma, novayapostoli va undapele ovilingakumithi nomatangan̯eko omengi.

⁴⁴Iya avehe hemba mbava itavela va kala pamo, nemona lyawo ve li twaa kumo.

⁴⁵Iya wo va landetha po ovipuka vyawo nomamona awo, have liyandjele odhombongo, auhe ha pewa ngahi ma hepa.

⁴⁶Etango alihe va ongana pamo motempeli nomutima umo. Wo va lya pamo modhonganda nodhonganda, have liyandjele ovikulya vyawo nawa nehuluko,

⁴⁷hava tanga Kalunga. Va li ava hopwa kovantu avehe, etango alihe Muhona wa wedha mo mokati kawo mbava hupithwa.