Read zemba Ovilinga 21 Bible Online

Ovilinga 21 - zemba bible

Ovilinga 21

¹Nt̯e twe ve lekela, hatu i. Okudha mpoka twa vyuukilila kompanga yaKos. Iya ngamuhuka twe ke thika koRodos, okudha mpoka hatu ya koPatara.

²MoPatara twa vadha mo ombapolo ndjimai i koFoinikia, hamo tu londa, hatu i.

³Iya hitwa li amatu ende, twa mona ompanga yaKipros komeho yetu, twe i yembetha komakumbinda, hatu vyuukilile koSiria. Hatu heluka moTiro, mena lyokutya ombapolo ya li ai na okuhelula ovimbundu vyayo.

⁴Moka twa vadha mo ovaitaveli, hatu ve valulile po omatango epanduvali, ovaitaveli va heela Paulus ngahi va heelwa kOmbepo Ondhilikwa hava tya koJerusalem há i ko.

⁵Iya omatango epanduvali hiaa pu ko, nt̯e twa twikila ondjila yetu. Ovaitaveli avehe pamo novakadhintu nodhondele ve tu thindikila katee twa dhi mondolopa. Hitwe thiki kontyo yelunga twa twika odhongolo pamo nawo, hatu kumbu.

⁶Iya twe lilekaela, nt̯e hatu londo mombapolo, ovakwetu va tjuna kodhoyawo.

⁷Twa dha moTiro, hatu i koPtolemais, hoka hutwa ka popitha ovaitaveli, hatu kala nawo etango limo.

⁸Iya ngamuhuka twa twikila ouyenda wetu katee koKesarea. MoKesarea twa ka thikila monganda yomweevaengeliste Filippus. Filippus yuumo owomovalumentu epanduvali mbava holowolelwe okwiila ovapopili moJerusalem.

⁹Filippus wa li novana vane ovathukona wongendjo, mbava li ovaprofeti.

¹⁰Iya nt̯e hitwa kala mo omatango omengi, pe ya omuprofeti nguu tiwa oAgabus, ngwaa dhile koJudea.

¹¹Ye we dhile kunt̯e, ha itha po omuvya waPaulus wokudhalela, he likutu nawo komakulu nokomawoko ha tyaa: “Ombepo Ondhilikwa mai tyaa: ‘Omwene womuvya hembu otjo ma ka kutwa hinyahi kOvajuda womoJerusalem, wo mave ke mu yandja momawoko ovapaani.’ ”

¹²Iya hitwa tee odhondaka ndhoka, nt̯e novakwetu mbava kala hempa, twe liheka kuPaulus okutya ahama i uke koJerusalem.

¹³Paulus we ve yaka ha tyaa: “Mamu ningi vi nyahoka, himamu lili, mamu yandja owoma komwenyo wandje? Ame mbe limana okupwa, haku ka kutwa vala moJerusalem, iya noku ka t̯a mena lyaMuhona Jesus.”

¹⁴Iya híhe tu itavelele oku mu anda, twa nyima, hatu tyaa: “Ehalo lyaMuhona Kalunga ngali hwithilwe po.”

¹⁵Iya kon̯ima yomatango ngoka, twa longela ovipuka vyetu, hatu i koJerusalem.

¹⁶Ovalongwa vamo owomoKesarea va ya pamo nant̯e. Wo ve tu twala konganda yaMnason, omulumentu mpatwa thele okuthikila, ngwaa dhile koKipros, ngwaa li umo owomovalongwa wolutenga.

¹⁷Iya hitwe ya koJerusalem, ovaitaveli ovakwetu ve tu yakula nehuluko enene.

¹⁸Ngamuhuka Paulus wa ya pamo nant̯e kuJakob, ovanene veongalo avehe oko va onganene.

¹⁹Paulus we ve popitha, he ve hipululile nawanawa ovipuka avihe Kalunga mbyaa undapa, hiee mu undapetha mokati kovapaani.

²⁰Hiva dhi pokuteelela otjihipululo tje, avehe va hiva Kalunga, wo have mu heele hava tyaa: “Ove Paulus, u tji i ae okutya muno mu na Ovajuda omayovi omengi mbava ninga ovaitaveli, avehe va kambulitha nawa oveta yaMoses.

²¹Iya wo va heelwa okutya kwa tiwa ove u longa Ovajuda avehe mbava kala movilongo vyovapaani okutya ngava yethe oveta yaMoses, wo háva pititha odhondele dhawo etanda, wo ahamava holele odhonteto dhOvajuda.

²²Wo otjatjili, mave ku tee okutya we ya, napano ngatu ninge vi?

²³Ninga ngahi matu ku heele. Hempa pe na ovalumentu vane mbava ana eano.

²⁴Tambula iya ovalumentu hemba, ove u likohole pamo nawo, ove u ve thutile, wo ve likulule, avehe opo ve tji mona okutya ovipuka avihe hembi mbiva popya kavi na thina namutwe, mena lyokutya naove wo u takametha oveta yaMoses.

²⁵Iya kombinga yovapaani mbava ninga ovaitaveli, twe ve sonekela omukanda wetokolo, hatu ve heele okutya ngave litjaele ovipuka hembi: Ombaveka, okulya ombindhi, otjipuka hitja pondwa ne okulala novantu.”

²⁶Paulus wa itha ovalumentu vane, he likohola pamo nawo. Okudha mpoka va ya kotempeli, e ke ve heele okutya omatango awo okulikohola maa pu ko nalun̯i, mena lyokutya auhe u tha okweeta eyambo, tainkolo omatango ahaeya pwa ko.

²⁷Iya omatango ngoka epanduvali hiaa li pokupwa ko, Ovajuda vamo mbava dhile koAsia va mona Paulus motempeli. Wo va uta okuhongaetha owingi wovantu auhe, hava kambula Paulus,

²⁸va wololoka unene hava tyaa: “Valumentu n̯e Ovaisraeli, indjen̯i mu tu popile! Omulumentu ngoka oye e li ye nguu endaenda novilongo ama longo ovantu avehe, elongo lye mali kondjetha otjiwan̯a tjetu noveta yetu notempeli hendji. Iya napano motempeli wa hititha mo Ovagreka, wa penyetha oluvedhe oludhilikwa hendu.”

²⁹Wo va popya nyahoka, mena lyokutya va mwene Trofimus ngwaa dhile koEfeso, ae li pamo naPaulus motjitungwalongo, wo hava tya pamo we mu twalele motempeli.

³⁰Omangwangwaneko e yulile motjitungwalongo atjihe, ovantu avehe ve liongele, hava kambula Paulus, have mu kokololele kotjila tjotempeli, omivelo vyo havi yedhilwa dhivadhiva.

³¹Ovantu tainkolo va li amava hala okudhipaa Paulus, elaka lye ya kondjai yovita yOvaroma okutya Jerusalem atjihe tji li momangwangwano.

³²Ondjai yovita ya itha po dhivadhiva ovakwavita novanene wovakwavita, hava ka dhamukila kowingi wovantu. Iya owingi wovantu hiwa mono ondjai novakwavita, Paulus ve mu yetha oku mu tona.

³³Ondjai ya vyuukilila kuPaulus, hai mu kambulitha, hai tya nga kutwe nomalyenge avali, ye hai mu pula okutya omulumentu nguka aan̯i, ye wa ninga tji?

³⁴Owingi wovantu wa uta okuwololoka, hau popi odhondaka ndhihamadhi i kumo, mena lyotjuuyila ondjai yovita kai ivilwe hitji li mondjila. Iya ye wa heela ovakwavita okutya va twale Paulus mokamba yawo.

³⁵Iya Paulus hiee ya povilyatelelo, ovakwavita ve mu tjinda po, mena lyokutya ovantu va li ava tjituka.

³⁶Owingi wovantu we mu landula amau wololoka hau tyaa: “Nga dhipawe!”

³⁷Iya ovakwavita hiva li amava hala okuhititha Paulus mokamba yawo, wa pula ondjai ha tyaa: “Matji tjiiwa tuu ndji ku heele tja?” Ondjai ye mu pula hai tyaa: “U popya Otjigreka?

³⁸Nan̯i haove Omweegipiti ngunya nahi mpenya ngwaa utithitha ovita novalumentu omayovi ane, mbava maneka, ha i nawo mokuti?”

³⁹Paulus wa yaka ha tyaa: “Ame ndjiMujuda, ngumba yumukilwa moTarso, motjitungwalongo hitja tumbala moKilikia. Alikana ndjandjela ndje ndji popye notjiwan̯a.”

⁴⁰Ondjai ye mu yandjela, a popye. Iya Paulus wa kulama kovilyatelelo, ha nyimitha ovantu nokuwoko. Wo hiva nyimi, wa popya nawo mOtjiheberi ha tyaa: