Read zemba Ovilinga 22 Bible Online

Ovilinga 22 - zemba bible

Ovilinga 22

¹“Valumentu vakwetu nootateombwale, nteelela ndjen̯i hime lipopile kotjipala tjen̯i.”

²Iya hiva tee hime ve popitha mOtjiheberi, va nyima hava tya thiluu. Iya Paulus wa twikila ko ha tyaa:

³“Ame ndjiMujuda, mba yumukilwa kotjitungwalongo tjaTarso moKilikia, mba kulila moJerusalem. Omulongethi wandje oGamaliel. Ame mba longwa nawa okwiiwa onteto yootateombwale, mba li ombandhi yokuundapela Kalunga ngan̯e amuhe nawanawa himu li ndino.

⁴Ame uke mba tatethele, he dhipaa ovantu mboka mbava landula ondjila yaMuhona Jesus. Mba kambulitha ovalumentu novakadhintu, he ve yedhilile mokaliwoso.

⁵Nomuyambethi omunene novantu avehe womOtjoongi tjOvanene mava ulu oku tji popya okutya me popi otjatjili. Mboka owo va mpele wo omikanda mbyaa sonekelwa Ovajuda ovakwetu owokoDamasko, opo ndji ya ko, ndji ka kambule ovaitaveli, ndji ve ete koJerusalem ava kutwa nomalyenge, ve tjiiwe okuyumanekwa.

⁶“Iya himba li ame ende, tainkolo mba li mondjila mokati komutenya ame linanene koDamasko, ontukuluka vala mba laiminwa kotjiten̯i hitja dha meulu, hatji nkondoloka.

⁷Iya mbe lisata pohi, he tee ondaka ndjimai mpopitha hai tyaa: ‘Saulus, Saulus, mo ntaantele tji?’

⁸Iya ame mba pula he tyaa: ‘Muhona, iya oove aan̯i?’ Ye wa ndjaka ha tyaa: ‘Aame Jesus Omunasareta, ngoka ngumo taata.’

⁹Ovalumentu mboka mbava li pamo naame, va mona elaimo, atjaa ondaka ndjaa mpopitha kave i teele.

¹⁰Iya mbe mu pula he tyaa: ‘Muhona, mba thele okuninga tji?’ Muhona wa ntjeela ha tyaa: ‘Kulama, enda koDamasko, hoka humo ka heelwa ovipuka mbyoka avihe mbiwa ithanenwa mbimo ka ninga.’

¹¹Elaimo hendi lya twikitha omeho andje, iya ovalumentu hemba mbava li pamo naame, va nkambula kempangoti, hava ntwala koDamasko.

¹²“Motjitungwalongo moka mwa li omulumentu umo nguu tiwa oAnanias, omutilikalunga, nguu tumbaleka oveta yaMoses. Wa tumbalekelwe kOvajuda avehe womoDamasko.

¹³We ya kwaame, ha hweene popedhi naame, wa ntjeela ha tyaa: ‘Mukwetu Saulus, twikuluka!’ Powola yatjo vala ndjoka mba twikuluka, he mu mono.

¹⁴Okudha mpoka wa ntjeela ha tyaa: ‘Kalunga kootate we ku holowola, opo u iwe ehalo lye, ove u mone Omuvyuuki watjatjili, u tyee ondaka ndjimai dhi motjinyo tje,

¹⁵mena lyokutya ove mo ka ninga ombangi okuhipululila ovantu avehe soka hiwa mona nahiwa tyaa.

¹⁶Iya napano mo kevelele tji uke? Kulama! Tjatjwa, kumba kuKalunga, odhonkali dhoye dhi ithwe po.’

¹⁷“Iya himba tjuna koJerusalem, tainkolo mba li ame kumbu motempeli, mba mona emoneko,

¹⁸andji lwete Muhona ama ntjeele ha tyaa: ‘Kanyauka, dha mo dhivadhiva moJerusalem, mena lyokutya kaava hala okwiitavela himo ntjipulula.’

¹⁹Ame mbe mu yaka he tyaa: ‘Muhona, wo ve tji i ae okutya nahi ndji ya modhosinagoga okukambula nokutona ovantu avehe mboka mbave ku itavela.

²⁰Omuhipululi woye Stefanus hiaa dhipawa, naame wo opo mba li. Mba li ambe hulukilwa okudhipawa kwe, mba li ame yungu omidhalo vyovadhipai ve.’

²¹Iya Muhona wa ntjeela ha tyaa: ‘Enda ko, mena lyokutya me ke ku tuma kokule kovapaani.’ ”

²²Ovantu katee hempa va teelela soka Paulus hiaa li ama popi. Iya okudha mpoka va uta okuwololoka peulu hava tyaa: “Nga dhipawe! Kaa ulu okukala uke ae na omwenyo!”

²³Ovantu va li amava wololoka, otjo mava dhungadhunga omidhalo vyawo, otjo mava nkindula eheke.

²⁴Ondjai yovita ya popya okutya Paulus nga twalwe mokamba. Yo ye ve heela hai tya Paulus nga pulwe, ye nga tonwe, opo a tyee okutya omena lyatji Ovajuda mave mu kwiilile nyahoka.

²⁵Iya hive mu kutu, ve mu tone nodhosokoti, Paulus wa pula omunene wovakwavita, ngoka ngwaa li aa kulama puwo ha tyaa: “Mamu ulu okutona Omuroma, tainkolo héya koywa?”

²⁶Omunene hengu hiee tji tee, wa ya kondjai, he mu pula ha tyaa: “Mo hala okuninga vi nyahoka? Omulumentu hengu Omuroma.”

²⁷Iya ondjai ya ya kuPaulus, hai mu pula hai tyaa: “Ntjeela ndje, uMuroma?” Paulus we mu yaka ha tyaa: “Ii mbee.”

²⁸Ondjai ya heela Paulus hai tyaa: “Ame mba mona oukwatjilongo hembu waRoma, himba thuta etumino odhombongo odhingi.” Paulus we mu yaka ha tyaa: “Iya ame ndjiMuroma pakuyumukwa.”

²⁹Dhivadhiva ovalumentu mboka mbava li ave na okupula Paulus, ve mu yetha. Ondjai ya li wo aya tila, hiya mono okutya nan̯i Paulus ngoka ngwaa kutitha nomalyenge, Omuroma.

³⁰Iya ngamuhuka ondjai yovita ya li amai hala okutyaa nawa okutya Ovajuda otjitji mava hala okukondjetha Paulus. Ondjai ya popya okutya Paulus nga kutululwe, yo hai heele ovayambethi ovanene, Otjoongi atjihe tjOvanene tji ongane. Ondjai ya eta mo Paulus, hai mu kulameke komeho yawo.