Read zemba Ovilinga 25 Bible Online

Ovilinga 25 - zemba bible

Ovilinga 25

¹Kon̯ima yomatango atatu, Festus hiaa ningi omutumini wotjilongo soka, wa dha moKesarea, ha i koJerusalem.

²Iya ovayambethi ovanene novanene wOvajuda ve ya kuFestus, hava utu oku mu hipululila ouhima waPaulus mpoka mpau li. Va kumba Festus,

³e ve popile, opo a tjun̯e ko Paulus koJerusalem, mena lyokutya va li amava panga ompango oku mu dhipaela mondjila.

⁴Iya Festus we ve yaka ha tyaa: “Paulus u li koKesarea wa kambulwa, ame omwene hwinya me ka ya ko dhiva.

⁵Ovanene ven̯i ngava ende koKesarea pamo naame, oko va ka kondjethele omulumentu hengu, andaa u na hiaa lundha.”

⁶Festus we ve valulila po omatango epandutatu ne omulongo, tjau ha tjuna koKesarea. Ngamuhuka wa kala pohi kotjipunditumino, ha heele ovakwavita okutya Paulus nga etwe.

⁷Iya Paulus hiee ya mo, ovanene wOvajuda mboka mbava dha koJerusalem ve mu kondoloka, hava utu oku mu kondjetha okutya omulumentu hengu wa undapa ovipuka ovivi ovingi. Iya va anyenwa okuyulika nawanawa mpape na ombedhi yoku mu pa onkali.

⁸Iya Paulus we lipopila ha tyaa: “Ame hí na himba yona koveta yOvajuda ne kotempeli ne komukesari.”

⁹Iya Festus wa li ama hala okuthevelwa Ovajuda, iya wa pula Paulus ha tyaa: “Mo hala okuya koJerusalem, oko ndji ke ku koyela?”

¹⁰Paulus we mu yaka ha tyaa: “Ame mba kulama mompela yomukesari, omo me tha okukoyelwa. KOvajuda hí na ko notjimo himba lundha, naove omwene ngahi u tji i nawa.

¹¹Iya andaa ndji na ombedhi ne ndji na onkali yokut̯a, híme anya okut̯a. Iya nan̯i andaa ovipuka avihe mbimava nkondjethele havyatjatjili, kape na tja nguma ulu okundjandja momawoko awo. Ame mbe liameke komukesari.”

¹²Festus hiaa tompola nodhosekulu dhe, wa heela Paulus ha tyaa: “Ove hiwe liameke komukesari, oko mo i.”

¹³Iya hipa piti omatango amo, ohamba Agrippa naBernike ve ya koKesarea okupopitha Festus.

¹⁴Iya hiva ningi mo omatango amo, Festus wa hipululila ohamba onkalo yaPaulus ha tyaa: “Muka mu na omulumentu ngwee thiwa mo kuFeliks.

¹⁵Ame himba ile koJerusalem, ovayambethi ovanene novanene wOvajuda ve dhile kwaame, hava ntjipululile himave mu kondjethele, wo hava nkumbu ndji mu koye.

¹⁶Iya ame mbe ve heela okutya Ovaroma kava yandja omukondjethwa, tainkolo háveya ithanenwa pamo novakondjethi ve, opo a mone okaluvedhe kokulipopila kotjipuka hima kondjethelwa.

¹⁷Iya hive ya huno, ame dhivadhiva ngamuhuka mba kala pohi kotjipunditumino, he tya omulumentu ngoka, nga etwe.

¹⁸Iya ovakondjethi ve hive mu kulamene, kava li amave mu kondjethele otjipuka otjinene, ngahi mba li ame soko.

¹⁹Va li amave mu kondjethele vala ovipuka vimo mbii na tja neundapelokalunga lyawo, nouhunga nomut̯e umo nguu tiwa oJesus, ngoka Paulus nguu tya u na omwenyo.

²⁰Ame hímba li andji tji i okutya otjatjili movipuka avihe hembi ndji tha oku tji mona vi, iya mba pula Paulus andaa ma hala okuya koJerusalem, oko ndji ke mu koyela.

²¹Iya Paulus we liameka komukesari, he likumbu, a kale mokaliwoso katee omukesari ma ka koya ovipopya vye. Iya mena lyanyahoka mba yandja elaka okutya ngetji kala mokaliwoso katee etango ndyoka me ka mona okaluvedhe oku mu tuma a ende komukesari.”

²²Agrippa wa heela Festus ha tyaa: “Naame wo me hala okuteelela omulumentu ngoka.” Festus we mu yaka ha tyaa: “Mo ke mu teelela komuhuka.”

²³Iya ngamuhuka Agrippa naBernike va thindikilwa netumbaleko enene kondjuwo yovikoya kodhondjai dhovita nokovanene wotjitungwalongo. Iya Festus wa yandja elaka, Paulus a etwe.

²⁴Festus hiaa dhi mpoka wa heela Agrippa ha tyaa: “Hamba Agrippa novatumbalekwa amuhe mboka mbamu li hempa pamo nant̯e. Omulumentu hengu ngumu lwete oye e li ye ngoka owingi wOvajuda auhe wahemu moKesarea nokoJerusalem nguva kondjetha kotjipala tjandje. Wo va wololoka peulu hava tya nga dhipawe.

²⁵Iya hí na hindji lwete hiaa lundha hitja thele oku mu dhipaetha. Ye omwene we liameka komukesari, opo mba dhi oku mu tuma kuye.

²⁶Iya hí na tja nawanawa hime thitululile omukesari, opo ndji mu sonekele, iya mbe mu eta kotjipala tjen̯i, unene kotjipala tjohamba Agrippa. Iya andaa wa thongonona otjipuka tje, pamo me mono po wo tuu tja, hitja thele okusonekwa.

²⁷Iya tja ngala ouhima kwaame okutuma omukambulwa ahape na ondaka ndjaa kohoka yotjipuka hima kondjethelwa.”