Read zemba Ovilinga 27 Bible Online

Ovilinga 27 - zemba bible

Ovilinga 27

¹Iya hipa tokolwa okutya nt̯e matu i nombapolo koItalia, Paulus nodhonkwatwa dhimo odhonkwawo va yandjwa momawoko omunene wovakwavita nguu tiwa oJulius, ngwaa li umo owomotjilombo tjomukesari.

²Nt̯e twa londa mombapolo yokoAdramiti ndjaa li amai i komahelulilo ngoka ngae li pontyo yelunga motjit̯indwalongo tjaAsia. Twa ya melunga, hatu ende pamo naAristarkus, Omumakedonia ngwaa dhile koTessalonika.

³Iya ngamuhuka twa thika moSidon. Julius wa li nawa naPaulus, we mu yethele, a ka tjingile po omapanga e, ve mu pe soka hima hepa.

⁴Iya hitwa dhi ko, twa vyuuka melunga, hatu ende amatu lamba naKipros, hoka huhakwa li ombepo onene, mena lyokutya ombepo ya li amai tu dhi motjipala.

⁵Twa yauka elunga men̯i lyaKilikia naPamfilia, hatu thiki koMira motjit̯indwalongo tjaLikia.

⁶MoMira, omunene wovakwavita Julius wa vadha mo ombapolo ndjimai dhi koAleksandria ndjaa vyuuka koItalia, he tu heele okutya ngamo tu londa.

⁷Iya omatango omengi twa enda amatu lithindaeke noudheu melunga, kon̯ima otjo twe ke ya popedhi nondolopa ndjii tiwa oKnidus. Iya ombepo hiye tu tjaele ko, twa ka lamba nompanga yaKreta, hoka huhakwa li ombepo onene, hatu ende kut̯a koSalmone.

⁸Twa lamba kontyo noudheu katee twe ke thika pompuka mpapa tiwa Ovihelulilo oviwa, popedhi notjitungwalongo tjaLasea.

⁹Iya hipa piti olule, tja kala otjidheu okweenda nombapolo, mena lyokutya etango enene lyeithepo lyodhonkali[19] lya vadhwa alya piti, Paulus we ve londola,

¹⁰he ve heele ha tyaa: “Valumentu vakwetu, ame ndji lwete okutya ouyenda wetu okweenda nombapolo mau ka ila ouvi, wo hau ka kala moudheu owingi, hawo ombapolo vala novimbundu, iya nomienyo vyetu wo mavi ka keka.”

¹¹Iya Julius wa itavela momweendethi nomomwene wombapolo okupon̯a podhondaka dhaPaulus.

¹²Iya mena lyokutya otjihelulilo soka katja li otjiwa okukala potembu yompepela, ovantu ovengi va li amava hala okudha mo, nt̯e tu tale andaa matu ke thika koFoiniks, omo tu kala pompepela. Hehi otjo tja li otjihelulilo tjimo tjomoKreta hitja pilukila komakumbinda-utokelo nokomakulyo-utokelo otjilongo.

¹³Ombepo ombwa yokomakumbinda otjilongo hiya utu okupepa, va li amava tya pamo mava ka thika huva li amava hala okuya. Va nana mo ovikulameno, hava ka lamba noKreta.

¹⁴Hipa piti okaluvedhe pa ka tukuka ombula yongandavila yokomakulyo-utjilo.

¹⁵Ombapolo katwa li amatu i ulu oku i vyuukitha mombepo, mena lyokutya ombepo ya li amai litono mombapolo, hatu twalwatwalwa nombepo.

¹⁶Twa ka kondoloka nompanga ndjii tiwa oKauda, hoka huhakwa li ombepo onene. Pompuka mpoka twa kondja noudheu okutwaa okawato mombapolo.

¹⁷Iya hiva nanene okawato mombapolo, va uta okuvalanga ombapolo nomapanda, mena lyokutya va li amava tila okutya pamo ombapolo mai ke litona modhontuntu dhomaheke omomeva kut̯a koLibia. Va thothonona odholona, tjau hava twalwatwalwa nombepo.

¹⁸Ombula yongandavila ye tu tona unene nodhonkono, ngamuhuka ovimbundu vyomombapolo va uta oku vi yekelahi melunga.

¹⁹Iya etango etyatatu va yekelahi nomawoko awo ovene oviundapethi vyombapolo.

²⁰Oule womatango omengi nt̯e twa kala ahatu lwete etango nodhonyothi, nombepo ya pepa ahamai nyimi. Iya kon̯ima twe ke liyumba onya, hatu mono okutya kaatu hupu.

²¹Ovantu hiva kala omatango omengi ahaveya lya tja, Paulus wa kulama mokati kawo, he ve heele ha tyaa: “Valumentu n̯e, ngaile mwa nteele ahamamu sungu okudha moKreta, ngai twa yepe ovihuna noudheu hembu.

²²Iya napano ame me mu kumbu mu vandhipale. Kape na omuntu mokati ken̯i nguma t̯i, ombapolo oyo vala mai hiti kohi yomeva.

²³Iya motjit̯iku tjandino pwaame pe ya omweengeli waKalunga kandje, Kalunga ngoka ame ngundji undapela,

²⁴ha ntjeele ha tyaa: ‘Paulus, hó tila! Ove mo ka kulama kotjipala tjomukesari. Iya mena lyoye ovantu avehe mbave li pamo naove mombapolo, Kalunga me ve hupitha.’

²⁵Iya napano vandhipalen̯i valumentu, mena lyokutya ame mba itavela muKalunga, okutya soka hiaa ntjeele, otjo matji ka kala.

²⁶Iya nt̯e matu ka yekelwahi kontyo yompanga imo.”

²⁷Iya otjit̯iku soka otjityamulongo notjityane hitwa li amatu lingaululwa kombepo melunga lyaAdria, mokati kout̯iku mboka ovaundapi womombapolo va iwa okutya va li ava hweene keheke.

²⁸Iya wo va yumba ongodhi yosumbu momeva, hava mono okutya omeva e na odhometa omilongo vine. Hiva hweene ko uke kanunu, ve i yumba mo uke, hava mono okutya omeva e na odhometa omilongo vitatu.

²⁹Wo va li amava tila okutya ombapolo mai ke litona momawe kohi yomeva, va yumba ovikulameno vine vyombapolo kon̯ima, wo ve hulililwe, va li amava hala ku tje.

³⁰Iya ovaundapi womombapolo va li amava hala okuhena mo mombapolo, ve ke lihupithe. Wo va helula okawato momeva, hava ningi ngambamava twaa ko ovikulameno komeho yombapolo.

³¹Iya Paulus wa heela omunene wovakwavita novakwavita ha tyaa: “Ovaundapi womombapolo andaa kaava kala mo, nan̯e kaamu ka ula okuhupithwa.”

³²Iya ovakwavita va teta odhongodhi ndhoka ndhaa kambula okawato, have ke yetha, haka wile momeva.

³³Hikwa andjuluka, Paulus we ve ilikin̯a avehe va lye, ha tyaa: “Iya pa piti omatango omulongo naane, amamu kevelele, hámuya lya tja, n̯e ahamuya lola otjikulya notjimo.

³⁴Iya napano me mu ilikin̯a mu lye, mena lyokutya ovikulya mavi mu pameke. Iya kape na ondjutji imo yokomitwe vyen̯i ndjimai ka wa ko.”

³⁵Iya Paulus hiaa dhi pokupopya, wa itha po omungome, ha pandula Kalunga movipathi vyawo avehe, he u nyembula, ha utu okulya.

³⁶Iya avehe va vandhipala, nawo hava utu okulya.

³⁷Nt̯e atuhe kumo mbatwa li mombapolo twa li ovantu omathele avali nomilongo epanduvali nepandu.

³⁸Iya ovantu hiva dhi pokulya, hive kuta, va uta okuyekelahi ovilya melunga, ombapolo i puvalelwe.

³⁹Hikwa tji ovaundapi womombapolo kava ivilwe eheke ndyoka, iya wo va mona ontyo molunkombo lwelunga ndjii na oluvedhe oluwa lwokukulametha. Iya wo va tokola okuvyuukitha ombapolo koluvedhe ndoka, andaa mave tji ulu.

⁴⁰Wo va teta po odhongodhi dhovikulameno vyombapolo, have vi yethele melunga. Iya moluvedhe lwatjo vala ndoka va kutulula odhongodhi ndhaa kutile ovisungitho. Wo va yela olona yokomeho yombapolo peulu, okutya ombepo i yundulile ombapolo kontyo yelunga.

⁴¹Iya ombapolo ye litona montuntu yeheke ndjaa li kohi yomeva, ontulo yayo hai kakatele, nokunyunguta ahamai nyunguta uke. Iya ombinga yokon̯ima yombapolo ya teyaulwa nomakuthikuthi.

⁴²Ovakwavita va tokola okudhipaa odhonkwatwa adhihe, okutya ndhoka ndhii tji i okuywaa, opo hadhi ka inkola.

⁴³Iya omunene wovakwavita wa li ama hala okuhupitha Paulus, ye ka yandjelele ovakwavita va dhipae odhonkwatwa. Iya ye wa heela mbave tji i okuywaa, okutya ngawo va lombokela olutenga melunga, va ywee okweenda kontyo.

⁴⁴Iya mboka mbava hupa ko va enda kovipilangi nokovipambu vyombapolo. Iya otjo va enda nyahoka avehe katee ve thiki kontyo, hava hupu.