Read zemba Ovilinga 7 Bible Online

Ovilinga 7 - zemba bible

Ovilinga 7

¹Omuyambethi omunene wa pula Stefanus ha tyaa: “Himatji popiwa otjatjili?”

²Stefanus we mu yaka ha tyaa: “Valumentu vakwetu nootateombwale, nteelela ndjen̯i! Kalunga ketumbalo we liholololela tateombwale Abraham, hiaa li moMesopotamia, tainkolo héya dhilukila koHaran.

³Kalunga wa heela Abraham ha tyaa: ‘Thiaa po omuhoko woye notjilongo tjen̯i, enda kotjilongo hoka hume ku yulikile.’

⁴Abraham wa dhiluka motjilongo tjaKaldea, ha ka tunga koHaran. Ihe yaAbraham hiaa t̯i, Kalunga wa dhilulila Abraham motjilongo hehi mumu li napano.

⁵Kalunga ka pinganethele Abraham okapambu kohi hendji ka ninge oke omwene nokoholo. Iya Kalunga we mu udhikila vala okutya me mu pa otjilongo, tjo matji ka kala otjoluyumuko lwe kon̯ima yet̯o lye, nandaku tiwa potembu ndjoka Abraham hima pewa omaudhiko henga, kaa li nondele.

⁶Kalunga wa heela Abraham ha tyaa: ‘Ovanoye mava ka kala odhongendi motjilongo tjambangu, omo mava ka kala ovapika, mava ka monethwa ovihuna kovene wotjilongo soka oule wodhombula omathele ane.

⁷Iya ame me ka yumaneka otjiwan̯a soka himatji ke ve kambula oupika, kon̯ima yotembu ndjoka mava ka dhiluka motjilongo moka, have ya okuntumbalekela pompuka hempa.’

⁸Kalunga wa twaa po ewaneneno pokati ke naAbraham netangan̯eko lyewaneneno hendi, etanda. Iya Isak hiaa yumukwa, Abraham we mu pititha etanda kon̯ima yotjivike tjimo. Isak wa pititha omuna Jakob etanda, Jakob wa pititha ovana omulongo navavali etanda, mboka ootateombwale.

⁹“Ootateombwale, odhondele dhaJakob ovadhantu, va t̯ila onki omunitjawo Josef, have mu landetha po, ha ka kala omupika koEgipiti. Iya Kalunga wa li pamo naye,

¹⁰he mu popile moudheu we auhe. Iya kotjipala tjaFarao, ohamba yaEgipiti, Kalunga wa pele Josef elao nounongo. Ohamba yaEgipiti ya vyaaletha Josef, a ninge elombe lyotjilongo nolyombala aihe yohamba.

¹¹Ondjala hiye ya motjilongo atjihe tjaEgipiti notjaKanana, ya eta oluhepo olunene. Ootateombwale kave na mpava li amava ulu okumona ovikulya.

¹²Jakob hiaa tee okutya koEgipiti ku na ovilya, wa tuma ko ovana, ootateombwale, otjikando tjolutenga.

¹³Motjikando tjawo otjityavali, Josef we liholololela ovakulwe, naFarao wa heelwa ovawo vaJosef.

¹⁴Iya Josef wa tumina ihe Jakob elaka, e ye koEgipiti pamo nonganda ye aihe, kumo va li ovantu omilongo epanduvali navatano.

¹⁵Iya Jakob wa ya koEgipiti, hoka ye omwene novana ootateombwale huva ka t̯ila.

¹⁶Iya wo hiva t̯i, va twalwa koSikem, hava ka pakwa mombila hendji Abraham ndjaa landele nodhombongo kodhondele dhaEmmor.

¹⁷“Otembu yaKalunga yokuhwithila po omaudhiko e, ngoka ngaa udhikila Abraham, hiye ya popedhi, otjihavelo tjotjiwan̯a tjetu moEgipiti tja ninga otjin̯ingi unene,

¹⁸katee kwe ke ya ohamba, ndjee ke ya okutumina Egipiti, ndjoka ndjaa li ahai i Josef nokanunu.

¹⁹Otjiwan̯a tjetu ye tji ninga ovineya, yo hai tatetha ootateombwale, hai ve tumin̯in̯a okuyekelahi oupepe wawo, mbwaa dhi pokuyumukwa, u t̯e.

²⁰Iya potembu mpoka Moses opo a yumukwa, ye wa li ondele omuwa, ha hopwa kuKalunga. Moses wa yungilwa monganda yaihe oule womiedhi vitatu.

²¹Iya hiaa ithwa mo monganda, ondele omukadhona waFarao we mu itha po, he mu tekula, a ninge omuna omudhantu.

²²Moses wa longwa ounongo auhe wOvaegipiti, wa li omulumentu ombandhi melaka nomovilinga.

²³“Moses hiaa ningi odhombula omilongo vine, wa tokola, a ka valule kOvaisraeli ovakwawo.

²⁴Wa vadha ko Omwiisraeli umo ama tonwa kOmweegipiti. Moses wa amena Omwiisraeli, ye ha kambulile Omweegipiti onkongo, he mu dhipaa.

²⁵Moses wa li ama tya pamo otjiwan̯a tje tja li atji tji i okutya Kalunga ma hala oku mu undapetha, opo e ve kutulule moupika, iya nan̯i mbenya kava li ave tji i.

²⁶Etango limo Moses wa vadhele Ovaisraeli vavali amava lu, ha lolo oku ve anununa, he ve heele ha tyaa: ‘Vantu n̯e, n̯e muvaihe imo, mamu lwile tji?’

²⁷Iya omulumentu ngoka ngwaa li ama tono omukwawo, wa yundula Moses, he mu pula ha tyaa: ‘Aan̯i ngwee ku twaa po, u kale omutumini nomuvyuululi wetu?

²⁸Mo hala okundhipaa ngahi wa dhipaele Omweegipiti ngunya ongulohi?’

²⁹Moses hiaa tee odhondaka ndhoka, wa ka inkolela kotjilongo tjaMidian. Hoka oko a ka yumukila ovana ovadhantu vavali.

³⁰“Hipa piti odhombula omilongo vine, omweengeli we liholololela Moses meno ndyaa tema omulilo, mokuti popedhi nondundu yaSinai.

³¹Moses wa li ae kuminwa emoneko ndyoka, ha hweene popedhi neno, a tale nawa. Iya wa tyaa ondaka yaMuhona, hai mu popitha hai tyaa:

³²‘Aame Kalunga kowoihoombwale, Kalunga kaAbraham, Kalunga kaIsak naKalunga kaJakob.’ Moses wa kambulwa kontilo, ha utu okuteketa, nokeno ahama ulu okutala ko.

³³Muhona we mu heela ha tyaa: ‘Tapula odhongaku, mena lyokutya oluvedhe hendu mpawa kulama oluvedhe oludhilikwa.

³⁴Ame mba mona nawanawa omatatetho otjiwan̯a tjandje moEgipiti, mba tyaa omikemo vyatjo, mba heluka okuya oku ve kutulula. Iya indjo, me hala oku ku tuma koEgipiti.’

³⁵“Moses hengu oye e li ye ngwaa anywa kOvaisraeli hiva tile: ‘Aan̯i ngwee ku twaa po u kale omutumini nomuvyuululi?’ Ye oye e li ye Kalunga ngwaa tumine, a kale omutumini nomuyowoli wawo kepopilo lyomweengeli ngoka ngwee liholololela ye meno ndyaa tema omulilo.

³⁶Moses wa dhilula Ovaisraeli moEgipiti, ha undapa ovilingakumithi novilingatangan̯eko moEgipiti nomElunga ethilantu nomokuti oule wodhombula omilongo vine.

³⁷Moses oye e li ye tuu ngoka ngwaa heelele Ovaisraeli ha tyaa: ‘Kalunga me ke mu tumina omuprofeti, ngaame hiaa ntumine kun̯e, nguma ka dha motjiwan̯a tjen̯i ovene.’

³⁸Moses oye e li ngwaa li pamo nOvaisraeli, hiva onganene mokuti. Ye wa kala mokuti pamo nootateombwale nomweengeli ngoka ngwaa popile naye kondundu yaSinai. Ye wa pewa kuKalunga odhondaka ndhoka, ndhimadhi yandja omwenyo, e tu heele dho.

³⁹“Iya ootateombwale kava li amava hala okwiitavela Moses. Va sokele oku mu yetha va tjune koEgipiti.

⁴⁰Ovaisraeli va heela Aron hava tyaa: ‘Tu ningila ookalunga mbamave tu hongolele komeho, mena lyokutya Moses ngoka ngwee tu dhilula moEgipiti, katu tji i okutya wa vadhwa kutji?’

⁴¹Iya potembu ndjoka Ovaisraeli ve liningila otjikalunga hitji ngala ontana, have tji yamba, hava ningi otjipito tjokuhulukilwa otjikalunga soka hive liningila nomawoko awo ovene.

⁴²Kalunga wa dha po puwo, he ve yetha va tumbaleke odhonyothi dhokeulu, ngahi kwa sonekwa membo lyovaprofeti, hiku tiwaa: ‘Vaisraeli n̯e! Haame mwa dhipaelele, n̯e haame mwa yambele omayambo mokuti oule wodhombula omilongo vine.

⁴³N̯e mwa tjinda otenda yotjikalunga Molok, notjithika tjonyothi tjotjikalunga tjen̯i Refan, ovikalunga mbimwe liningila oku vi tumbaleka. Iya ame me mu tumu mounkwatwa tjikoohehinya tjaBabilon.’

⁴⁴“Mokuti ootateombwale va li ave na otenda ndjoka ndji yulika okutya Kalunga u li mokati kawo. Otenda ndjoka ya tungilwe nawanawa, Kalunga ngahi a heelele Moses, e i tunge molupe lwethano ndyoka Kalunga ndyee mu yulikila.

⁴⁵Ootateombwale hive i pewa kowoihe, ve i eta naJosua, hava vyaala otjilongo tjovapaani, mboka Kalunga mbaa lamba movipathi vyawo. Otenda otjo va kala nayo nyahoka katee potembu yaDavid.

⁴⁶David wa t̯ilwa onkenda kuKalunga, ha kumbu Kalunga e mu yandjele okutungila Kalunga kaJakob otempeli.

⁴⁷Iya Salomo oye a tungilile Kalunga otempeli.

⁴⁸“Iya Kalunga Owokombandambanda ka kala modhonganda ndhii tungwa kovantu, omuprofeti ngahi ma popi ha tyaa:

⁴⁹‘Muhona ma tya, eulu otjipunditumino tjandje, ohi otjilyatelo tjodhompadhi dhandje. Mamu ntungile onganda ndjii li vi? Ne oluvedhe lwandje lwokuthuvila ngaile malu kala pi?

⁵⁰Ovipuka avihe mbika kavi undapelwe komawoko andje?’ ”

⁵¹Stefanus wa twikila ko uke okupopya ha tyaa: “N̯e mwa poloka. Omatwi nomitima vyen̯i vi ngala vala ovyovapaani, ondaka yaKalunga kamu i tee. N̯e mu ngala vala owoihoombwale, apehe mu kondjetha Ombepo Ondhilikwa.

⁵²Aan̯i omuprofeti nguha tatethelwe kowoihoombwale? Owoihoombwale va dhipaa ovatumwa vaKalunga, mboka mbava popya ouhunga nokuya kwOmuvyuuki waKalunga, ngumwa weleleka, hamu mu dhipaa.

⁵³N̯e on̯e mwa pewa ovitumino, oveta yaKalunga ndjaa etelwe kovaengeli, iya nan̯i n̯e kamu i itavelele!”

⁵⁴Ovanene wOtjoongi hiva tee odhondaka dhaStefanus, dhe ve t̯itha outheno, hadhi ve yumanetha.

⁵⁵Iya Stefanus wa li ae yula Ombepo Ondhilikwa, wa tala peulu keulu, ha mono ko elaimo lyaKalunga naJesus aa kulama kokulyo kwaKalunga.

⁵⁶Stefanus wa heela ovanene wOtjoongi ha tyaa: “Talen̯i, ndji lwete eulu ndyaa yeluka, nOmuna wOmuntu wa kulama kokulyo kwaKalunga.”

⁵⁷Iya ovanene wOtjoongi va tona otjuuyila otjinene, have lipata komatwi, okudha mpoka avehe have mu lombokele,

⁵⁸wo ve mu lamba mo motjitungwalongo, have mu dhipaa nomawe. Odhombangi dha twaa ovikutu vyawo pomudhantu nguu tiwa oSaulus.

⁵⁹Iya tainkolo va li amava twikile okutona Stefanus nomawe, Stefanus wa kumba kuKalunga ha tyaa: “Muhona Jesus, tambula omwenyo wandje!”

⁶⁰Iya Stefanus wa twika odhongolo, ha wololoka peulu ha tyaa: “Muhona, hó ve tjun̯ine onkali hendji.” Stefanus hiaa dhi pokupopya nyahoka, ha t̯i.