Read zemba Ovaroma 13 Bible Online

Ovaroma 13 - zemba bible

Ovaroma 13

¹Omuntu auhe nga tyee kovatumini mbave mu tumina, mena lyokutya kape na tja etumino ndihali dhile kuKalunga. Ovatumini hemba mbatu na wo, va tuwa po kuKalunga.

²Iya nguma anya okutyaa ketumino, ma kondjetha oveta yaKalunga. Mbamava kondjetha oveta yaKalunga, mava ka yumanekwa.

³Ovatumini kave lile po okutilitha mbamava undapa ouwa, iya ombamava undapa ouvi. Amo hala okukala hámo tila etumino, undapa ouwa, etumino li ku pandule.

⁴Iya omutumini omupopili waKalunga oku ku popila. Iya amo undapa ouvi, tila, mena lyokutya ye u na odhonkono oku ku yumaneka, ye omupopili waKalunga okuyumaneka mboka mbamava undapa ouvi.

⁵Iya mwa thele okutyaa koveta, hamena vala lyokutila okuyumanekwa, iya omena wo lyokukala nelityoo ewa.

⁶Iya opo mu dha okuthendela elilimo, mena lyokutya ovatumini va undapela Kalunga amava hwithile po ovilinga vyawo.

⁷Avehe ve pen̯i soka hiva thele okupewa. Elilimo ndimave mu pula, thendelen̯i. Vi yandjen̯i huvya thele okuyandjwa, tilen̯i mbava thele okutilwa, tumbaleken̯i mbava thele okutumbalekwa.

⁸Hámu kala nongele yomuntu, kakele vala ongele yokukala amu lihole. Iya nguu hole omukwawo, u hwithila po oveta.

⁹Ovitumino hoovyombi, mavi tyaa: “Hó yono olukupo. Hó dhipaa. Hó vaka. Hó kema.” Ovitumino hembi novikwawo vya kambulilwa kumo kotjitumino hehi himatji tyaa: “Kala au hole omukwen̯i ngahi u lihole omwene.”

¹⁰Iya nguu hole omukwawo kaa ulu oku mu ninga navi. Iya ohole ehwithilopo lyoveta.

¹¹Iya hehi tji ningen̯i, mena lyokutya otembu mu i i, okutya owola yokwiimuka po molupot̯i ye thiki. Napano ehupitho lyetu li li popedhi okupon̯a nahi hitwa uta okwiitavela.

¹²Otjit̯iku tji li pokuvadha ombimba, netango li li pokutumba. Ngatu yethen̯i okuundapa ovilinga vyomet̯iku. Ngatu maneken̯i omauta, nt̯e tu kondje atu li motjiten̯i.

¹³Ngatu enden̯i monkalo ombwa yopoluhandja ndjii endwa, hátu kala modhontjingo dhomaut̯iku, mepyalu, movihulo nomokuhelitjaela movihulo, molutangu ne onki.

¹⁴Iya maneken̯i omauta aMuhona Jesus Kristus, omalutu en̯i hámu e undapetha ehalo lyountu evi.