Read zemba Ovaroma 15 Bible Online

Ovaroma 15 - zemba bible

Ovaroma 15

¹Nt̯e mbatwa kola meitavelo twa thele okupopila ovingone meitavelo moungone wawo, hátu undapa vala himatji tu thevelwa.

²Auhe munt̯e nge thevelwe omukwawo, mena lyouwa womukwawo, omukwawo opo a tungwe meitavelo.

³Iya naKristus ke lithevelelwe ye omwene, iya ngahi kwa sonekwa hikwa tiwaa: “Omapenyo ambave ku penya, a mbwila.”

⁴Ovipuka avihe mbyaa sonekwa lukulu, vya sonekelwa oku tu longa, okutya tu kale atu na eliun̯iko ndimali pitile melikambulithilo nometendeleko lyomisonekwa.

⁵Iya napano Kalunga kelikambulithilo noketendeleko nge mu pe omalipulo amo mokati ken̯i, mu holele Kristus Jesus,

⁶opo n̯e amuhe kumo mu tange Kalunga, Ihe yaMuhona wetu Jesus Kristus, nondaka imo.

⁷Iya litambulen̯i, ngaKristus hiee mu tambula, opo ovantu va tumbaleke Kalunga.

⁸Iya ame me mu heele okutya Kristus we ya okuundapela Ovajuda ouwa, okuyulika okutya Kalunga omuliun̯ikwa, opo a pameke omaudhiko ngaa pelwe ootateombwale.

⁹Ovapaani mava tumbaleke Kalunga mena lyet̯ilonkenda lye, ngahi kwa sonekwa okutyaa: “Iya me ke ku tumbaleka mokati kovapaani, nena lyoye me ke li tanga ame imbi.”

¹⁰Iya omusonekwa mau tya uke: “Linyandaelen̯i, n̯e ovapaani pamo novantu ve.”

¹¹Iya mau tya uke: “Tumbaleken̯i Muhona, n̯e ovapaani amuhe, noviwan̯a avihe ngavi mu tumbaleke.”

¹²Iya Jesaja ma tya uke: “Maku ya nguma dhi moluyumuko lwaIsai, ma kulama, a tumine ovapaani, wo mave ke liun̯ika muye.”

¹³Iya Kalunga kekevelelo nge mu yulithe nehuluko alihe nouwa meitavelo, opo mu kale nekevelelo enene mena lyodhonkono dhOmbepo Ondhilikwa.

¹⁴Vakwetu, naame ndji tji lwete okutya mokati ken̯i mu na ouwa oun̯ingi, n̯e mu na odhondunge, mamu ulu okukala amamu lilongo.

¹⁵Nandaku tiwa otjo nyahoka kombinga imo ndji na ouvandhi oku mu sonekela, ndji mu thipalukithe ovipuka hembi, mena lyonkenda ndjimba pewa kuKalunga,

¹⁶opo ndji undapele Kristus Jesus mokati kovapaani, movilinga ovidhilikwa vyouyambethi vyokuteetha ondaka ombwa yaKalunga, ovapaani opo va ile eyambo ndyee thewa, Ombepo Ondhilikwa ndiya dhilika.

¹⁷Iya ame me litangele muKristus Jesus motjilinga tjandje tjokuundapela Kalunga.

¹⁸Iya ame hí na tja notjimo himba thele okupopya nouvandhi kakele vala kasoka Kristus hiaa ndjundapetha, himba eta ovapaani kuKalunga. Mbe ve eta novilinga mbimba undapa nodhondaka ndhimbe ve teethela,

¹⁹kodhonkono dhomatangan̯eko nodhovilingakumithi, kodhonkono dhOmbepo yaKalunga ngahi mba hwithila po eteetho lyondaka ombwa yaKristus okudha koJerusalem nomonkondoloka katee koIlliriko.

²⁰Ame ontanto yandje okuteetha ondaka ombwa mpoka ena lyaKristus mpahaliya teeka, opo hé tungile kekulameno ndyaa tungwa komuntu umo.

²¹Iya ngahi kwa sonekwa haku tiwaa: “Mboka mbahave mu heelelwe, mave ke mu mona, mbahave mu teele, mave ke mu tyaa.”

²²Iya ame ovikando ovingi mba li wo nomaluvinda, opo mba dha okuhedhile kun̯e.

²³Iya napano himba mana ovilinga vyandje movilongo hembi, nahimba ninga odhombula odhingi ambe mu dhimbaluka, me hala okuya kun̯e oku mu valulila po.

²⁴Ame me ya okupita pun̯e, hime i koSpania mena lyokutya me hala oku mu mona, olutenga ndji kale pun̯e outango mu ntendeleke, hime ya pokuya mu ndongekedhe nawa.

²⁵Iya napano me i koJerusalem ndji twale ovipuka mbimavi ka yandjwa otjali kovadhilikwa vaKalunga mbave li hoka.

²⁶Iya Ovamakedonia nOvaakaia va mona okutya tji li nawa okwoongedha odhombongo dhokupopila ovadhilikwa vaKalunga ovathona womoJerusalem.

²⁷Va mona okutya tji li nawa, nawo va ningile Ovajuda nyahoka. Andaa ovapaani va pewa ovipuka vyopambepo otjali kOvajuda, nawo wo ve na ongele oku ve popila novipuka vyokolutu.

²⁸Amba mana otjilinga hehi, me ke ve twalela ovipuka mbyaa ongedhwa, me ke ya oku mu valulila po, hime ya okupita mpoka okuya koSpania.

²⁹Ndji tji i okutya hime ya kun̯e, me mu etele elao alihe ndimali dhi kuKristus.

³⁰Vakwetu, me mu ilikin̯a mena lyaMuhona wetu Jesus Kristus nomena lyohole ndjimai dhi mOmbepo Ondhilikwa, kumben̯i amwa mana mo pamo naame, mu nkumbile kuKalunga,

³¹ndji hupithwe momawoko ovantu mboka mbahava tee womoJudea, opo otjilinga tjandje moJerusalem tji tambulwe kovadhilikwa vaKalunga.

³²Andaa Kalunga we tji hala, ame me ya kun̯e nehuluko, ndji ye tu thuve po.

³³Kalunga kouwa nga kale pamo nan̯e. Amen.