Read zemba Ovaroma 3 Bible Online

Ovaroma 3 - zemba bible

Ovaroma 3

¹Omujuda u na tji okupon̯a punguhe thi Omujuda? Ne okupita etanda maku popile tji?

²Iinga, okupita etanda maku popile movipuka ovingi. Olutengatenga Ovajuda owo va pewa odhondaka dhaKalunga.

³Iya ovi, andaa vamo kava itavelele? Hihava itavelele, matji ningitha okutya Kalunga ma ulu okukala ahe thi omuliun̯ikwa?

⁴Kaatji tjiiwa nokanunu! Kalunga u popya otjatjili, iya omuntu auhe ka popi otjatjili, omusonekwa ngahi mau popi himau tyaa: “Amo popi, u popya hitja vyuuka amo koywa, u ton̯a.”

⁵Iya andaa oulundhi wetu mau yulike okutya Kalunga omuvyuuki, matu tya vi? Matu tya Kalunga u undapa hitja puka, hiee tu yumaneka? (Hempa me popi monkalo yountu.)

⁶Aai, nokanunu. Kalunga ma ulu vi okukoya ouye andaa ye hamuvyuuki?

⁷Iya andaa otjatjili tjaKalunga hitji mu tumbaleketha, matji holololwa kovithithi vyandje, omena lyatji me koywa uke ngomulundhi?

⁸Omena lyatji hihame tyaa: “Tu undapen̯i ouvi, opo mu dhe ouwa”? Iya ovantu vamo va mpenya, hava nkuminine okutya mba popya hinyahi. Mava ka koywa hitji lithike povilinga vyawo.

⁹Iya tji li vi? Nt̯e Ovajuda, ont̯e tu li ovawa okupon̯a ovantu vamo? Aai, nokanunu. Twe tji yulika ae lukulu okutya Ovajuda nOvagreka avehe ve li kohi yodhonkono dhoulundhi,

¹⁰omusonekwa ngahi mau popi himau tyaa: “Kaku na tja omuvyuuki noumo,

¹¹ko kaku na tja noumo nguu yuvite, ko kaku na tja noumo nguma taendha Kalunga.

¹²Ovantu avehe va yetha Kalunga. Avehe va puka. Kape na tja noumoumo nguma undapa ouwa.

¹³Ovinyo vyawo vi ngala ombila ndjaa yuhama, omalaka awo e na ovineya. Movinyo vyawo mu dha odhondaka odhombi ndhii ngala oudhioo wonyoka.

¹⁴Movinyo vyawo mwe yula omatuka omanene.

¹⁵Odhompadhi dhawo dhi kanyauka okutilahi ombindhi.

¹⁶Mpava enda, pa kala ehan̯auko novihuna.

¹⁷Ondjila youwa kave i i.

¹⁸Okutila Kalunga kave tji i.”

¹⁹Napano tu tji i okutya atjihe soka oveta himai popi, mai tji heele mbave li kohi yoveta, opo omuntu auhe a patwe otjinyo, nouye auhe u kale au na onkali kotjipala tjaKalunga.

²⁰Kape na tja omuntu noumo nguma ile omuvyuuki kotjipala tjaKalunga, hima hwithile po soka himatji pulwa koveta, mena lyokutya oveta i lile po okuheela omuntu okutya ye omulundhi.

²¹Iya napano Kalunga wa hololola po ondjila yokuninga omuntu a ile omuvyuuki, hátji na tja noveta, oveta novaprofeti nawo ve tji hipulula.

²²Kalunga otjipuka hehi me tji ningile ovantu avehe mbava itavela muJesus Kristus. Me ve ningile tjo, hápe na tja okapungulula.

²³Iya ovantu avehe va lundha, kave na tja elaimo lyaKalunga.

²⁴Mava ningwa ovavyuuki otjali ket̯ilonkenda lye, mena lyokutya Kristus Jesus we ve yowola.

²⁵Kalunga wa twaa po Kristus a ile omuwan̯en̯eki okupitila mombindhi ye kumboka mbamava itavele muye, opo a yulike ouvyuuki we. Iya mena lyolweembya lwe Kalunga wa yetha odhonkali dhovantu ndhaa ningwa lukulu ahame ve yumaneke.

²⁶Iya napano Kalunga ma yulike okutya ye omuvyuuki, hima ningi omuntu nguma itavele muJesus, a ile omuvyuuki.

²⁷Iya matu ulu okulitangela tji? Omena lyokutya tu tyaa oveta? Aai, iya omena lyahitwa itavela.

²⁸Iya matu tya omuntu ma ningwa omuvyuuki mena lyeitavelo, hamena lyokuhwithila po oveta.

²⁹Ne Kalunga okOvajuda vala aveika? Hakovapaani wo? Iinga, okovapaani wo.

³⁰Kalunga yuumo vala nguu ninga ovantu mbava pita etanda nambahava pitile etanda, va ile ovavyuuki mena lyeitavelo.

³¹Oveta matu i itha po mena lyeitavelo? Aai, nokanunu, oveta matu i koleke.