Read zemba Ovaroma 6 Bible Online

Ovaroma 6 - zemba bible

Ovaroma 6

¹Iya ngatu tye vi? Ngatu twikile okukala moulundhi okutya et̯ilonkenda lyaKalunga li ile en̯ingi?

²Hátjo nokanunu! Nt̯e mbatwa dha moulundhi, matji tjiiwa vi uke tu kale mo?

³Ne kamu tji i okutya nt̯e atuhe mbatwa tjatjelwa muKristus Jesus, twa tjatjelwa met̯o lye?

⁴Hitwa tjatjwa, twa t̯a, nt̯e hatu pakwa pamo naKristus, ngaKristus hiaa imunwa kout̯e kodhonkono dhelaimo lyaIhe, nant̯e tu tjiiwe okweenda monkalamwenyo ompe.

⁵Iya andaa tu na oukumo naKristus met̯o lye, matu kala wo noukumo naye meimuko lye kout̯e.

⁶Tu tji i okutya ountu wetu oukulu wa papelwa pamo naKristus komutjaakano, opo olutu lwoulundhi lu han̯aunwe po, ahamatu kala uke ovapika woulundhi,

⁷mena lyokutya auhe ngwaa t̯a, wa kutululwa koulundhi.

⁸Iya napano andaa twa t̯a pamo naye, twa itavela wo okutya tu na omwenyo pamo naye.

⁹Iya tu tji i okutya Kristus hiaa imunwa kout̯e, kaa t̯i uke. Et̯o kaali mu tumine uke.

¹⁰Et̯o ndyaa t̯a, wa t̯ila oulundhi otjikando tjimo vala. Iya omwenyo mbwee na wo, ma kalele Kalunga.

¹¹Iya nan̯e wo ngatjo mu lihava okutya mwa dha mo moulundhi, mu na omwenyo okukalela Kalunga muKristus Jesus.

¹²Iya hámu yetha omalutu en̯i ngamaa ka t̯a, a tuminwe koulundhi, opo hámu landula omahalo ao omavi.

¹³Hámu yandja ovin̯ipo vyen̯i koulundhi, vi ile oviundapethwa vyovipuka ovivi, iya ovene liyandjen̯i kuKalunga, mu liyandje, otjovantu mbamwa ithwa met̯o, hamu etwa momwenyo. Liyandjen̯i kuKalunga, opo e mu undapethe hitji li mondjila.

¹⁴Iya oulundhi háu mu tumine. N̯e kamu li kohi yoveta, iya mu li kohi yet̯ilonkenda lyaKalunga.

¹⁵Iya tji li vi? Ngatu lundhe, mena lyokutya katu li kohi yoveta, tu li kohi yet̯ilonkenda? Hátjo nokanunu!

¹⁶Kamu tji i okutya andaa mamu liyandja komuntu, mu ile ovapika ve wokutyaa kuye, mamu ile ovapika vangoka humamu tee? Andaa mamu liyandja okuundapa oulundhi, omaandelo atjo et̯o, iya andaa mamu tee kuKalunga, okutyaa hoka maku mu ningi ovavyuuki kotjipala tjaKalunga.

¹⁷Iya Kalunga nga tumbalekwe, mena lyokutya n̯e hemba mbamwa li ovapika woulundhi mwa itavela nomitima vyen̯i otjatjili himatji moneka melongo moka mumu li.

¹⁸N̯e mwa kutululwa moulundhi, mwa ila ovapika wovilinga vyouvyuuki.

¹⁹Me popi ngondele mena lyoungone womalutu en̯i. Lukulu mwa yandjele ovin̯ipo vyen̯i okuundapa ovipuka vyovupika mbyaa sila nokuundapa ovipuka ovivi. Iya napano yandjen̯i ovin̯ipo vyen̯i moupika wovilinga vyouvyuuki, opo mu ile ovadhilikwa.

²⁰Iya himwa li ovapika woulundhi, mwa kutulukile, kamwa li amu na ko natja nouvyuuki.

²¹Ouwa mbumwa mona owatji, himwa undapa ovipuka vyoku mu t̯itha ohon̯i? Ovipuka hembi mavi mu etele et̯o.

²²Iya napano mwa kutululwa moulundhi, mwa ila ovapika vaKalunga. Ouwa mbumamu mono monkalamwenyo yen̯i hoowombu okutya mwa ila ovadhilikwa, komaandelo mamu ka mona omwenyo waapehe.

²³Ondjambi youlundhi et̯o, iya otjali tjaKalunga omwenyo waapehe muKristus Jesus, Muhona wetu.