Read zemba Ovaroma 7 Bible Online

Ovaroma 7 - zemba bible

Ovaroma 7

¹Vakwetu, ame me popi kovantu mbave i oveta, kamu tji i okutya oveta i na odhonkono vala komuntu nguu na omwenyo?

²Omukadhintu ngwaa kupwa, oveta mai mu kutile kumo nomulumentu we, tainkolo omulumentu ae na omwenyo. Iya omulumentu andaa wa t̯i, okutya omukadhintu hengu wa kutuluka koveta yolukupo.

³Iya andaa wa kupwa komulumentu umo, tainkolo omulumentu we ae na omwenyo, okutya omukadhintu hengu ma talwa okutya u li movihulo. Iya andaa omulumentu we wa t̯i, okutya omukadhintu ha kupwa komulumentu umo nguu lili, wa kutuluka, ke li movihulo.

⁴Vakwetu, nan̯e wo moveta mwa dha mo, mena lyokutya muun̯ipo wolutu lwaKristus. Napano tuvahengu ngwaa imunwa kout̯e, opo tu undapele Kalunga otjilinga otjiwa.

⁵Hitwa li monkalo yountu, oulundhi wa tukululwa koveta, wa kala amau undapa munt̯e. Onkalo ndjii li nyahoka mai twala met̯o.

⁶Iya napano moveta mutwa t̯ililile, ndjee tu kambulile, twa kutuluka mo, opo tu undapele Kalunga monkalo ompe yopaMbepo, hamonkalo onkulu yoveta ndjaa sonekwa.

⁷Atjaa napano ngatu tye vi? Oveta oulundhi? Hátjo nokanunu. Iya ngaile haveta, ngai hí ivilwe oulundhi. Oveta ngai kaai tyaa: “Hó kema otjipuka tjomukwen̯i,” ngai hí ivilwe okutya okukema otjitji.

⁸Oulundhi wa mona oluvedhe okupitila motjitumino, wa tukulula mwaame omahalo aehe omavi. Mpahape na oveta, oulundhi wa t̯a.

⁹Lukulu ame mba li ahe na oveta, iya otjitumino hitje ya, oulundhi tjau hau imuka po,

¹⁰ame he t̯i. Mba mono okutya otjitumino hitja thele okundjetela omwenyo, tja ndjetela et̯o.

¹¹Oulundhi wa mona oluvedhe okupitila motjitumino, wa mpukitha, hau ndhipaetha kotjitumino.

¹²Iya oveta ondhilikwa, notjitumino otjidhilikwa, otjivyuuki, tjo otjiwa.

¹³Iya otjipuka otjiwa tja ndjetela et̯o? Hátjo nokanunu. Et̯o lya etwa koulundhi, oulundhi wa undapa okupitila muhitji li nawa, hau ndjetele et̯o, opo u hololoke poluhandja okutya wo oulundhi. Iya oulundhi hiwa pitila motjitumino, wa yulika okutya wo oulundhi tjatjilitjili.

¹⁴Iya tu tji i okutya oveta i li pambepo, ame ndjimuntu, ndji li kohi youlundhi, ndji ngala omupika.

¹⁵Hime undapa hítji i, mena lyokutya ndji undapa hihamba thele okuundapa. Iya ndji undapa hindji yele.

¹⁶Andaa nan̯i ndji undapa híhe hala, me itavele okutya oveta i li mondjila.

¹⁷Iya napano haame uke ndji undapa hinyahi, iya oulundhi hembu mbuu li mwaame.

¹⁸Ndji tji i okutya mwaame, mountu wandje kamu na tja ouwa nokanunu. Ehalo lyokuundapa ouwa ndji na lyo, atjaa odhonkono dhoku tji ninga, hí na dho.

¹⁹Ouwa mbundji hala okuundapa, hí u undapa, iya ouvi mbuhe hala, owo ndji undapa.

²⁰Andaa me undapa híhame hala okutya oulundhi mbuu li mwaame owo mau ndjundapetha.

²¹Otjipuka hehi ndji tji mona ngoveta, ame hala okuundapa ouwa, ndji undapa vala ouvi,

²²iya momutima wandje mba hopa oveta yaKalunga.

²³Iya ame ndji mona oveta imo ndji li molutu lwandje, ndjimai kondjetha, ndjimba itavela momutima wandje, ya nkambula, ndji kale omupika woveta youlundhi ndjii li molutu lwandje.

²⁴Ame ndjimuntu omulundhi omuvi! Aan̯i nguma nkutulula molutu hendu ndumalu t̯i?

²⁵Iya Kalunga nga tumbalekwe mena lyaJesus Kristus Muhona wetu! Iya ame omwene nehalo lyandje me hala okuundapela oveta yaKalunga, atjaa olutu lwandje lu undapela oveta youlundhi.