Read zemba 1 Ovakorinto 11 Bible Online

1 Ovakorinto 11 - zemba bible

1 Ovakorinto 11

¹Ntjolela ndjen̯i, ngaame hindji holela Kristus.

²Me mu pandula himu nt̯ipaluka movipuka avihe nahimwa kambulitha elongo lyandje, ngahi mbe mu longa.

³Iya me hala mu iwe okutya Kristus oye e li omutwe womulumentu auhe, nomulumentu oye e li omutwe womukadhintu, naKalunga oye e li omutwe waKristus.

⁴Omulumentu auhe nguma kumbu ne nguma teetha ae na tja komutwe okutya ma t̯itha ohon̯i Kristus.

⁵Iya omukadhintu auhe nguma kumbu ne nguma teetha ahe likutile komutwe, tje litha nae li nkulumutwe, ma t̯itha ohon̯i omulumentu we.

⁶Iya omukadhintu andaa ke likutile komutwe, odhondjutji dhe ngadhi heywe, iya ama t̯a ohon̯i okuheywa ne okukululwa onkulumutwe, nge likute.

⁷Omulumentu kaa ulu okulikuta komutwe, mena lyokutya ye otjithika netumbalo lyaKalunga. Iya omukadhintu etumbalo lyomulumentu,

⁸mena lyokutya omulumentu ka dhile momukadhintu, iya omukadhintu oye a dha momulumentu.

⁹Iya omulumentu haye a utilwa omukadhintu, iya omukadhintu oye a utilwa omulumentu.

¹⁰Iya mena lyovaengeli omukadhintu u tha okulikuta komutwe, a yulike okutya u li kohi yetumino lyomulumentu we.

¹¹Nandaku tiwa otjo nyahoka, atu li muMuhona, omukadhintu kaa ulu okukala po ahape na omulumentu, omulumentu kaa ulu okukala po ahape na omukadhintu.

¹²Iya ngomukadhintu hiaa dhile momulumentu, nomulumentu otjo madhi momukadhintu. Iya ovipuka avihe vi dha kuKalunga.

¹³Tokolen̯i ovene andaa tji li nawa omukadhintu a kumbe kuKalunga mokati kovantu, hé likutile komutwe?

¹⁴Ountjitwe owene kombinga imo mau ku longo okutya omulumentu okukala nodhondjutji odhonde matji mu t̯itha ohon̯i.

¹⁵Iya omukadhintu ae na odhondjutji odhonde outhewe, mena lyokutya madhi mu thevetha nawa.

¹⁶Iya andaa pe na nguma tetha ombata, nt̯e nomaongalo aKalunga katu na po uke ondjila imo amatu kumbu.

¹⁷Iya hehi hime mu heele, híme hala oku mu pandula, mena lyokutya amwa ongana pamo kamu ningi nawa, mu ninga navi unene.

¹⁸Olutenga, mba tyaa okutya amwa ongana, mpamu onganena mu liyapuka pokati, mu li movinkopo, otjipuka hehi mbe tji itavela.

¹⁹Iinga, okuliyapauka maku tha okukala mokati ken̯i, opo mbave tji i okuliun̯ikwa mokati ken̯i, va moneke.

²⁰Iya amwa ongana pamo, kamu li Okulya Okudhilikwa kwaMuhona,

²¹mena lyokutya mu lithinta, kamu likevelele, tji tya vala hengu we thiwa nondjala, ngunya wa pyaluka.

²²Iya kamu na tja odhonganda oko mu ka lila ne oko mu ka nwina? Mwa tomba eongalo lyaKalunga ne mu hala okut̯itha ohon̯i mbahave na hive na tjo? Nge mu heele vi? Nge mu pandule? Motjipuka hehi híme mu pandula.

²³Iya elongo hendi ndimbe mu longa mbe li pewa kuMuhona okutya Muhona Jesus out̯iku mbwinya hiaa welelekwa, wa itha omungome,

²⁴ha kumbu, he u nyembula, ha tyaa: “Hehi olutu lwandje ndumamu yandjelwa, tji ningen̯i amamu nt̯ipaluka.”

²⁵Iya kon̯ima yokulya wa itha po otjinwino, ha tyaa: “Otjinwino hehi ewaneneno epe mombindhi yandje, amamu tji nu, tji ningen̯i amamu nt̯ipaluka.”

²⁶Iya etango alihe amamu li namamu nu motjinwino hehi, mamu hipulula et̯o lyaMuhona katee me ya.

²⁷Iya nguma li navi omungome hembu, ye ha nu navi motjinwino hehi, ma kala nodhonkali, ha tombetha olutu nombindhi yaMuhona.

²⁸Iya omuntu nge lithongonone omwene hima li omungome hembu nahima nu motjinwino hehi.

²⁹Iya nguma li, ye ha nu ahama tangan̯eke olutu lwaMuhona, me lilile, ye he linwine ekoyo omwene.

³⁰Iya mena lyovipuka hembi, mokati ken̯i mu na ovingone ovingi novavedhi ovengi, ovengi va ka lala po.

³¹Iya ngaile twe lithongononene ovene, ngai katu koyelwe.

³²Nt̯e twa koywa, ha tu longwa kuMuhona, opo hátu ka yumanekwa pamo nouye.

³³Vakwetu, iya amwa ongana amamu li Okulya Okudhilikwa kwaMuhona, likevelelen̯i.

³⁴Andaa pe na ngwaa t̯a ondjala, nga lye koyawo, amwa ongana, opo hámu lietele ekoyo lyaKalunga. Iya mbyaa hupu ko, hime ya, me ya oku mu longa vyo.