Read zemba 1 Ovakorinto 12 Bible Online

1 Ovakorinto 12 - zemba bible

1 Ovakorinto 12

¹Vakwetu, iya napano hime popi ouhunga novipuka vyopambepo, híme hala mu kale hámu tji i.

²Mu tji i okutya himwa li ovapaani, mwa twalwatwalwa kovikalunga mbihavi popi, havi mu pukitha.

³Iya me mu heele okutya kaku na tja omuntu nguma viyulwa kOmbepo yaKalunga, ha popi okutyaa: “Jesus nga thingwe,” ko kaku na tja omuntu nguma ulu okutyaa: “Jesus oye e li Muhona,” kakele vala ama viyulwa kOmbepo Ondhilikwa.

⁴Pe na otjali tjOmbepo hitji lili nahitji lili, atjaa tji yandjwa kOmbepo yatjo ndjoka.

⁵Pe na odhondjila ndhii lili nandhii lili okuundapa ovilinga, iya Muhona, Kalunga yuumo.

⁶Pe na ounongo mbuu lili nambuu lili okuundapa, iya Kalunga yuumo, nguu undapa movipuka avihe movantu avehe.

⁷Iya omuntu auhe ma pewa eholololo lyOmbepo Ondhilikwa mena lyouwa wovantu avehe.

⁸Omuntu umo ma pewa ondaka younongo kOmbepo Ondhilikwa, omukwawo ha pewa ondaka yodhondunge kOmbepo yatjo tuu ndjoka,

⁹umo ma pewa eitavelo kOmbepo, tainkolo omukwawo ma pewa odhonkono dhokuvelula ovavedhi kOmbepo yatjo tuu ndjoka.

¹⁰Omuntu umo ma pewa otjali tjokuninga ovilingankono, umo ma pewa otjali tjokupopya etumwalaka lyaKalunga, umo ma pewa otjali tjokutangan̯eka notjokuthongonona odhombepo. Omuntu umo ma pewa otjali tjokupopya momalaka ngahae iwe, umo okupitiya omalaka.

¹¹Iya ovipuka hembi avihe vi undapwa kOmbepo yatjo tuu ndjoka Ondhilikwa ndjii li imo, oyo i yandja komuntu auhe ngahi mai hala.

¹²Iya olutu ngahi lu li lumo, lwo lu na ovin̯ipo ovingi, ovin̯ipo nandaku tiwa ovingi, vyo olutu lumo, naKristus otjo e li wo nyahoka.

¹³Iya nant̯e wo atuhe kutya nee Ovajuda ne Ovagreka ne ovapika ne ombahave thi ovapika twa tjatjelwa molutu lumo kOmbepo Ondhilikwa imo, hatu pewa Ombepo yatjo tuu ndjoka.

¹⁴Iya olutu kalu tungilwe wo notjin̯ipo tjimo, lwa tungwa novin̯ipo ovingi.

¹⁵Ompadhi ngai tyaa: “Ame hitjin̯ipo tjolutu, mena lyokutya hikuwoko,” hehi kaatji i tjaele okutya i kale ahai thi otjin̯ipo tjolutu.

¹⁶Iya okutwi ngaku tyaa: “Ame hitjin̯ipo tjolutu, mena lyokutya ame haame eho,” hehi kaatji ku tjaele okutya ku kale ahaku thi otjin̯ipo tjolutu?

¹⁷Olutu aluhe ngaile lwa li eho, ngai olutu malu tee vi? Olutu aluhe ngaile lwa li okutwi, ngai olutu malu thimbuna vi?

¹⁸Iya Kalunga oye a twaa ovin̯ipo avihe molutu ngahi ma hala omwene.

¹⁹Iya ngaile ovin̯ipo avihe vya li otjin̯ipo tjimo, ngai olutu lu li pi?

²⁰Iya ovin̯ipo ovingi, olutu ilumo.

²¹Eho kaali ulu okuheela okuwoko hali tyaa: “Ame híme ku hepa,” nomutwe kaau ulu okuheela ompadhi hau tyaa: “Ame híme ku hepa.”

²²Ovin̯ipo vyolutu mbii ngala ovingone, ovyo tu hepa unene.

²³Iya ovin̯ipo vyolutu mbihavi tumbalele, ovyo tu thevetha nawa, mbimatu t̯i ohon̯i, hatu vi tjikile

²⁴okupon̯a ovin̯ipo vyetu mbyoka mbyee thewa. Iya Kalunga wa twaa kumo ovin̯ipo vyolutu, ovin̯ipo mbihavi tumbalele, he vi pa etumbalo enene,

²⁵molutu opo hámu kala eliyapauko, iya ovin̯ipo vi lit̯ile otjiho pokati.

²⁶Iya otjin̯ipo tjimo amatji ihama, ovin̯ipo ovikwawo mavi ihama pamo natjo wo, ne otjin̯ipo tjimo atja tumbalekwa, ovin̯ipo avihe mavi hulukwa.

²⁷N̯e amuhe mulutu lwaKristus, nomuntu auhe otjin̯ipo tje.

²⁸Iya Kalunga ovantu avehe we ve twaa pomaluvedhe awo meongalo, olutenga ovayapostoli, olutyavali ovaprofeti nolutyatatu ovalongethi. Iya ku na uke mbava ninga ovilingankono, haku landula mbava pewa odhonkono okuvelula ne okupopila ovakwawo ne oku ve viyula ne okupopya momalaka ngahae iwe.

²⁹Ovantu avehe ovayapostoli? Ovantu avehe ovaprofeti? Ovantu avehe ovalongethi? Ovantu avehe va ninga ovilingankono?

³⁰Ovantu avehe ve na ounongo wokuvelula? Ovantu avehe va popya momalaka ngahae iwe? Ovantu avehe va pitiya?

³¹Iya tween̯i omitima vyen̯i movipuka mbii na otjilinga otjinene. Me mu yulikile uke ondjila ombwa unene.