Read zemba 1 Ovakorinto 13 Bible Online

1 Ovakorinto 13 - zemba bible

1 Ovakorinto 13

¹Ame nande popi omalaka ovantu noovayengeli, atjaa hí na tja ohole, okupopya kwandje maku ngala vala omukonko amau popi ne ongendjo amai kwelengendja.

²Ame nande kala andji na otjali tjokupopya etumwalaka lyaKalunga, he kala nounongo wokwiiwa oviholekwa avihe ne he kala andji na eitavelo ndimali ulu okudhikula po ondundu, atjaa nan̯i hí na tja ohole, okutya aame otjipuka vala.

³Ame nande yandja po ovipuka vyandje avihe ne he yandja po olutu lwandje lu hikwe po, atjaa hí na tja ohole okutya hí na hime nganyana.

⁴Ohole i likambulithila, ohole i na onkenda, ohole kai na tja onki, ohole kai litanga.

⁵Ohole kai ya navi, kai taendha otjayo oyene, kai leve, kai thipaluka ovipuka ovivi mbiya ningilwa.

⁶Ohole kai hulukilwa ouvi, iya i hulukilwa otjatjili.

⁷Ohole i t̯imika ovipuka avihe, i itavela ovipuka avihe, i liun̯ika movipuka avihe, yo i likambulithila ovipuka avihe.

⁸Ohole kaai anda, iya okupopya etumwalaka lyaKalunga maku anda ne okupopya momalaka ngahae iwe, maku anda ne odhondunge madhi anda.

⁹Iya okwiiwa kwetu nokupopya kwetu etumwalaka lyaKalunga kaku hulile.

¹⁰Iya hitja hwila po himatji ya, hihatjiya hwila po matji anda.

¹¹Ame himba li ondele nahi ndji popya ngondele, ndji soka ngondele, ndji nonga ngondele, himba ile omulumentu mba yetha ovipuka vyoulele.

¹²Hitu lwete napano tji ngala vala otjidhidhimbe amo litalele motjilivandjelo, iya etango ndimali ya, matu ke limona otjipala notjipala. Iya napano okwiiwa kwandje kaku hulile, iya etango ndyoka me ka iwa nawa, ngaKalunga wo hiee ndji i nawanawa.

¹³Iya napano mapa kala ovipuka vitatu: Eitavelo, ekevelelo, nohole. Ohole oyo i li onene movipuka hembi vitatu.