Read zemba 1 Ovakorinto 14 Bible Online

1 Ovakorinto 14 - zemba bible

1 Ovakorinto 14

¹Landulen̯i ohole, mu kale amamu hala unene otjali tjopambepo, unene tuu otjali tjokupopya etumwalaka lyaKalunga.

²Nguu popya momalaka ngahae iwe, ka heele ovantu, iya u heela Kalunga, mena lyokutya kape na ngume mu tee. Ye u undapethwa kOmbepo Ondhilikwa ama popi oviholekwa.

³Iya nguu popya etumwalaka lyaKalunga, u heela ovantu, he ve popile, he ve vandhipaleke, ye he ve tendeleke.

⁴Nguu popya momalaka ngahae iwe, u litunga omwene, iya nguu popya etumwalaka lyaKalunga, u tunga eongalo.

⁵Me hala okutya amuhe mu popye momalaka ngahae iwe, iya unene tuu mu popye etumwalaka lyaKalunga. Nguu popya etumwalaka lyaKalunga, wa pon̯a nguu popya momalaka ngahae iwe, nkwai ama pitiya okutya eongalo li litunge.

⁶Iya vakwetu, andaa me ya kun̯e ame popi momalaka ngahae iwe, me mu popile tji, andaa nan̯i híme mu thitululile eholololo lyaKalunga ne ounongo ne etumwalaka lyaKalunga ne elongo?

⁷Ngahi tji li ovipuka mbii hikwa, ovisandji novihumba, omuntu ma koneke vi himavi popi, andaa koo hiki nawa?

⁸Iya nongoma yovita ahai teekele nawa, aan̯i ngume lilongekedhele okuya kovita?

⁹Iya nan̯e amamu popi odhondaka ndhihamadhi teeka nawa, aan̯i nguma tee okutya mamu tya vi? Odhondaka dhen̯i madhi i nombepo.

¹⁰Mouye mu na omalaka omengi ngae lili nangae lili, iya kape na tja nolimo ndihali teeka.

¹¹Nguma popi elaka ndihe i okutya ndjingendi kuye, naye ama popi elaka ndihe i ongendi kwaame.

¹²Iya nan̯e wo himamu hala okukala amu na otjali tjopambepo, kalen̯i nontanto yokukondjela himatji tungu eongalo.

¹³Iya omuntu nguma popi momalaka ngahae iwe, nga kumbe kuKalunga, e mu pe ounongo wokupitiya omalaka ngoka himaa popi.

¹⁴Iya ame kumbu momalaka ngahae iwe, ombepo yandje oyo i kumba vala, atjaa omalipulo andje kae litwaa mo.

¹⁵Iya mba thele okuninga vi? Me kumbu nombepo yandje, iya he kumbu wo nomalipulo andje. Me imbi nombepo yandje, iya he imbi wo nomalipulo andje.

¹⁶Andaa mo yandja ompandu kuKalunga nombepo yoye, omukwen̯i nguhe na hiee i, ma tya vi “Amen” himo yandja ompandu? Ngunya ke ku yuvite himo popi.

¹⁷Tjikootjimo tji li nawa, mo yandja ompandu kuKalunga, atjaa komukwen̯i nguhe ku yuvite, kaatji mu tungu.

¹⁸Ame me pandula Kalunga okutya ndji popya momalaka ngahae iwe oku mu pon̯a amuhe.

¹⁹Iya meongalo, he popi po odhondaka ntano ndhii yuvitwe, ndhimadhi longo, onawa okupon̯a okupopya odhondaka omayovi omulongo ndhihadhi yuvitwe.

²⁰Vakwetu, hámu lipula ngodhondele. Kalen̯i odhondele movipuka ovivi, iya momalipulo kalen̯i ovanene.

²¹Moveta mwa sonekwa okutyaa: “Muhona ma tya, ame me ka heela ovantu vandje hemba okupitila momalaka ngae lili nomovinyo vyodhongendi, atjaa nandaku tiwa otjo nyahoka, kaava ka nteelela.”

²²Iya okupopya omalaka ngahae iwe, etangan̯eko kumbahava itavelele, hakumbava itavela, tainkolo otjali tjokupopya etumwalaka lyaKalunga, etangan̯eko kovaitaveli, hakumbahave thi ovaitaveli.

²³Iya andaa eongalo alihe lya ongana pamo, avehe hava utu okupopya omalaka ngahae iwe, atjaa hamu ya mbahave tji i ne mbahave thi ovaitaveli, kaava tya mamu vele epamba?

²⁴Iya andaa avehe mava popi etumwalaka lyaKalunga, atjaa hamu ya nguhe thi omwiitaveli ne omuntu vala, me liteyulula, ha londolwa kondaka ndjee yuvite,

²⁵noviholekwa vyomomutima we mavi hololoka poluhandja, he lit̯imike po, ha tumbaleke Kalunga, ha hipulula ama tyaa: “Otjatjili, Kalunga u li pun̯e.”

²⁶Vakwetu, napano tji li vi? Amwa ongana pamo meundapelokalunga, umo u na eimbilo, umo ma longo ovakwawo, umo ma hololele ovakwawo oviholekwa vyaKalunga, umo ma popi momalaka ngahae iwe umo ma pitiya. Iya ovipuka avihe hembi ngavi kale amavi tungu eongalo.

²⁷Iya andaa pe na nguma popi elaka ndihali iwe, kon̯ima yomapopyo avali ne atatu, ngaku landule nguma pitiya.

²⁸Iya andaa kape na nguma pitiya, nguma hala okupopya meongalo nga nyime, nkwai nga kale vala ame lipopile ne ama popi kuKalunga.

²⁹Vavali ne vatatu mbava pewa etumwalaka lyaKalunga, ngava popye, tainkolo ovakwawo mava thongonona soka ovakwawo himava popi.

³⁰Iya andaa umo mumbava kala pohi, u na hiaa holololelwa kuKalunga, ngwaa vadhwa ama popi ngetji nyimi.

³¹Amuhe mamu ulu okupopya etumwalaka lyaKalunga, atjaa lipen̯i omaluvedhe ooumo naumo, opo omuntu auhe e li longe, ye a vandhipalekwe.

³²Mbava pewa otjali tjokupopya etumwalaka lyaKalunga, ngave tji kambule nawa,

³³mena lyokutya Kalunga ka hala tu kale atwa ngwangwana, iya u hala tu kale atwa tutuvala, atu li nawa. Ngahi tji li momaongalo aehe ovadhilikwa vaKalunga,

³⁴ovakadhintu meongalo ngava kale ava nyimi, oveta yOvajuda ngahi mai popi okutya ovakadhintu háva kala ovaviyuli.

³⁵Andaa ve na himava hala okwiiwa, ngava pule kovalumentu vawo modhonganda. Iya omukadhintu okupopya meongalo, ohon̯i.

³⁶Ne odhondaka dhaKalunga dha uta mun̯e? Ne okun̯e vala dha vadha?

³⁷Andaa pe na ngume lipula okutya ye omuprofeti ne u na otjali tjopambepo, nga koneke nawa okutya ovipuka mbime mu sonekele vya dhi kuMuhona.

³⁸Iya andaa pe na nguhe na ko natja notjipuka hehi, Muhona naye kaa kala ae na ko natja naye.

³⁹Vakwetu, iya kalen̯i amamu hala okupopya etumwalaka lyaKalunga, hámu tjaele nguma popi omalaka ngahae iwe.

⁴⁰Ovipuka avihe ngavi ningwe monkalo ombwa ndjaa vyuuka.