Read zemba 1 Ovakorinto 2 Bible Online

1 Ovakorinto 2 - zemba bible

1 Ovakorinto 2

¹Vakwetu, ame himbe ya kun̯e, hí dhile nodhondaka dhouthewe ne dhounongo oku mu teethela otjiholekwa tjaKalunga.

²Ame mba tokola ndji kale ahame iwa tja mokati ken̯i kakele vala okwiiwa Jesus Kristus, ngwaa papelwa komutjaakano.

³Ame himbe ya kun̯e, mba li noungone nowoma, ame teketa unene.

⁴Epopyo lyandje neteetho lyandje kalya li olyodhondaka dhounongo nodhokuhekela, iya lya li olyodhonkono dhOmbepo yaKalunga,

⁵eitavelo lyen̯i opo háli ka kulama mounongo wountu, iya li kale modhonkono dhaKalunga.

⁶Ounongo hembu me u popi vala pumbava kula pambepo, haunongo wopauye hembu ne wovatumini mbava tumina ouye hembu, mboka mbamava anda.

⁷Iya ounongo hembu mbume popi, ounongo waKalunga, mbwaa holekelwe. Kalunga we u twaa po ae lukulu, ouye tainkolo ahau ko, u ile etumbalo lyetu.

⁸Ovatumini wouye hembu kape na tja noumo nguu i ounongo hembu, kave u i, ngaile ve u i, ngai kava papelele Muhona wetumbalo komutjaakano.

⁹Iya ngahi kwa sonekwa okutyaa: “Otjipuka hihatji monekele, nahihatji teekele, nahihatji dhile momutima womuntu, Kalunga otjo a longekedhela mbave mu hole.”

¹⁰Iya Kalunga we tu holololela tjo okupitila mOmbepo ye. Ombepo i thongonona ovipuka avihe noviholekwa ovinene vyaKalunga.

¹¹Iya aan̯i nguu i hitji li momuntu? Ombepo yomuntu omwene oyo vala aiika i i hitji li muye. Otjo tji li wo, kape na nguu i hitji li muKalunga, kakele vala Ombepo yaKalunga oyene oyo i i hitji li muKalunga.

¹²Nt̯e katu pelwe ombepo youye hembu, iya twa pewa Ombepo ndjaa dha kuKalunga, opo tu iwe ovipuka avihe Kalunga mbyee tu pa otjali.

¹³Ovipuka hembi mbimatu popi, kaatu popi odhondaka dhomounongo wountu, iya matu popi odhondaka ndhaa dha melongo lyOmbepo yaKalunga. Ovipuka vyopambepo matu vi thitululile mbave na Ombepo yaKalunga.

¹⁴Iya omuntu vala kaa ulu okutambula ovipuka mbimavi dhi kOmbepo yaKalunga. Kee vi tee, mavi mu ningile owoova, mena lyokutya ovipuka vyopambepo mavi teeka vala kovantu wopambepo.

¹⁵Omuntu wopambepo ma koneke ovipuka avihe, ye kaa konekwa komuntu noumo.

¹⁶Omusonekwa mau tyaa: “Aan̯i nguu i omalipulo aMuhona? Aan̯i nguma ulu oku mu longa?” Iya nt̯e tu na omalipulo aKristus.