Read zemba 1 Ovakorinto 4 Bible Online

1 Ovakorinto 4 - zemba bible

1 Ovakorinto 4

¹Iya omuntu auhe nge tu tale okutya nt̯e tuvantu vaKristus, twe liun̯ikilwa oviholekwa vyovipuka vyaKalunga.

²Iya napano omuyungi auhe ma kevelelwa a kale omuliun̯ikwa.

³Kwaame katji na otjilinga kutya n̯e mamu nkoyo ne me koywa kovantu vamo. Iya ame omwene híme ulu okulikoya.

⁴Ame omalityoo andje omawa, atjaa kaatji tya ndjimuvyuuki, Muhona oye e li omukoyi wandje.

⁵Hámu koyo omuntu, tainkolo otembu háiye thika, katee Muhona me ya, nguma eta poluhandja oviholekwa vyet̯iku nokuhololola omalipulo aehe omomutima. Iya omuntu auhe ma ka pewa ompandu kuKalunga.

⁶Vakwetu, ovipuka hembi napano ame mbe vi vyuulula kombinga yetu naApollos mena lyen̯i, opo mu lilonge eeli ndimali tyaa: “Hó kambuka hitja sonekwa,” opo hámu linomo, mu popile umo, n̯e mu tombe omukwawo.

⁷Iya aan̯i ngwee ku ninga omunene okupon̯a ovakwen̯i? Otjitji hiuu na tjo, hiho pelwe kuKalunga? Andaa nan̯i we tji pewa, mo linomene tji ngangumo tya ku tji pelwe otjali?

⁸N̯e mu na tja ae atjihe himamu hepa. Muvahona, mwa ila odhohamba nandaku tiwa nt̯e katudhohamba. Mbe tje hala mu ile naa odhohamba, opo nant̯e wo tu ile odhohamba pamo nan̯e.

⁹Ame ndji lwete okutya nt̯e ovayapostoli, Kalunga we tu twaa kon̯ima, tu ngala mbatwa koyelwa et̯o, mena lyokutya twa ila otjidhaneno tjouye auhe, tu talwa kovaengeli nokovantu.

¹⁰Nt̯e tumaova mena lyaKristus, iya n̯e muvanongo muKristus. Nt̯e tuvingone, iya n̯e muvanamatha, n̯e mwa tumbalekwa, iya nt̯e twa tombwa.

¹¹Katee napano tu na ondjala nonyota, tu li nyahinya, tu tonwa, tu tjivauluka.

¹²Tu undapa unene nomawoko etu. Amave tu thingi, nt̯e tu ve pa elao, amave tu tatetha, nt̯e tu likambulithila.

¹³Amave tu kuminine, nt̯e tu ve popya nawa. Tu ngala otjitoto tjoviyaya mouye hembu. Tu ngala ovantu ovatombwantu kovantu avehe katee ndino.

¹⁴Hime soneke hinyahi, híme hala ndji mu t̯ithe ohon̯i, iya me mu pukulula ngodhondele dhandje ovahivilikwa.

¹⁵Nandaku tiwa mu na ovatekuli omayovi omulongo muKristus, iya kamu na tja owoiho ovengi. Aame iho muKristus Jesus himbe mu teethela ondaka ombwa.

¹⁶Iya me mu ilikin̯a, mu ntjolele.

¹⁷Mena lyotjipuka hehi, me mu tumine Timoteus, ye nguu li ondele yandje omuhivilikwa, omutakamethi muMuhona. Me ke mu thipalukitha onkalo yandje muKristus Jesus, nambimba longa apehe momaongalo aehe.

¹⁸Ovantu vamo owomun̯e va uta okulinoma, va tya pamo híme ya kun̯e.

¹⁹Muhona andaa we tji hala, ame me ke ya dhiva oku mu valulila po, ndji ke limonene ko omwene, hahitji popiwa vala kovalinomi hemba, iya nokutala wo odhonkono dhawo.

²⁰Otjilongo tjaKalunga hatjipuka tjokupopya vala, iya otjipuka hitji na odhonkono.

²¹Mamu hala tji? Nge ye kun̯e nosokoti ne nge ye nohole nombepo ombwa?