Read zemba 1 Ovakorinto 9 Bible Online

1 Ovakorinto 9 - zemba bible

1 Ovakorinto 9

¹Ame hí kutulukile? Ame himuyapostoli? Muhona wetu Jesus Kristus hí mu mwene? Hán̯e nan̯i otjilinga tjandje muMuhona?

²Andaa himuyapostoli kuvamo, ame ndjimuyapostoli kun̯e tjatjili. N̯e on̯e mu li otjilimbo tjouyapostoli wandje muMuhona.

³Hendi olyo li li elipopilo kumbamava nt̯ongonona.

⁴Nan̯i katu na tja outhemba okulya nokunwa?

⁵Nan̯i katu na tja outhemba okweenda nomukadhintu omwiitaveli mukwetu ngovayapostoli vakwetu novanitjaMuhona naPetrus ngahiva ninga?

⁶Ne nt̯e naBarnabas ont̯e vala atwiika twa thele okuundapa tu mone ovikulya?

⁷Omukwavita aan̯i nguu lithutila hima hepwa movita nandaku tiwa etango limo? Aan̯i nguu kuna motjuundo, atjaa ka li himatji dhi mo? Ne aan̯i nguu litha, atjaa ka li omahini ovipako mbyaa litha?

⁸Me popi vala ovipuka mbika monkalo yountu? Ne noveta ovipuka mbika i vi popya?

⁹Iya moveta yaMoses mwa sonekwa okutyaa: “Hó kutu onani kotjinyo, amai yungula.” Kalunga ma yavala vala mpaeli odhongombe adhiika?

¹⁰Hant̯e matu hewa nyahi? Hehi tja sonekwa okutya tji tu yulikile okutya amatu pulula ne amatu yungula, tu kevelela okutya tu hupe mo.

¹¹Andaa nan̯i mun̯e twa kuna mo ovipuka vyopambepo, nan̯i n̯e kaamu ulu oku tu pa ovipuka mbimatu hepwa palutu?

¹²Andaa nan̯i pe na vamo mbave na outhemba okukevelela mu ve pe tja, nan̯i nt̯e katu na tja outhemba ounene oku ve pon̯a? Iya katu undapethele outhemba mbuu li hinyahi, iya nt̯e twe likambulithila ovipuka avihe, opo hátu etele ondaka ombwa yaKristus oluvinda.

¹³Kamu tji i okutya mbava undapa motempeli, va mona ovikulya motempeli, nambava yamba kotjiyambelo, ve na hiva pewa moviyambwa vyawo moka?

¹⁴Iya Muhona otjo a popya wo okutya ovateethi wondaka ombwa ngava pewe ovikulya vyawo nahimava hepwa.

¹⁵Iya ame hí na himba undapetha notjimo otjomovipuka hembi, ye ame hí sonekele ovipuka hembi okutya n̯e opo mu vi ndingile. Iya kwaame okut̯a hahe. Kape na nguma ulu okutya okulitanga kwandje kaku na tja otjilinga.

¹⁶Iya ame andaa me teetha ondaka ombwa, híme ulu ndji litangele yo. Me n̯in̯ikidhwa okutya ndji tji ninge. Utatyei, andaa híme teetha ondaka ombwa!

¹⁷Ngaile me teetha nehalo lyandje omwene, ngai ame me ulu okukevelela okupewa ondjambi, iya ame híme teetha nehalo lyandje omwene, otjilinga hehi himba pewa kuKalunga.

¹⁸Mba thutwa tji? Hindji teetha ondaka ombwa, hí thutwa, ye hí na tja noumo ngundji pula a thute. Ame hindji teetha ondaka ombwa, mba yetha outhemba wokuthutwa mwaame omwene.

¹⁹Ame nandaku tiwa hí tuminwa kovantu avehe, mbe lininga omupika wovantu avehe, opo ndji nganyane ovantu ovengi.

²⁰KOvajuda ndji ngala Omujuda, ndji nganyane Ovajuda. Kumbave li kohi yoveta, ndji ngala ngundji li kohi yoveta, nandaku tiwa ame hí li kohi yoveta, ndji nganyane mbave li kohi yoveta.

²¹Kumbahave na tja oveta, ndji ngala nguhe na tja oveta, nandaku tiwa hí kutulukile koveta yaKalunga, iya ndji li kohi yoveta yaKristus, opo ndji nganyane ovantu ovengi hápe na tja oveta.

²²Kumbave li ovingone, ndji ngala otjingone, opo ndji nganyane ovingone. Ame ndji ngala ovantu avehe movipuka avihe, opo ndji hupithe po vamo.

²³Avihe hembi mbe vi ninga mena lyondaka ombwa, naame mondaka ombwa ndji mone mo elao.

²⁴Kamu tji i okutya mbamave lipatele, avehe va dhamuka, iya haumo vala nguma ka mona ondjambi? Iya lipatelen̯i mu ka mone ondjambi.

²⁵Ngume lipatele auhe u teelela nawa ovipuka mbyaa longwa, hime ke lipatela, u tji ninga okutya a mone ohala ndjimai lundhaka, iya nt̯e tu tji ninga, tu dhalekwe ohala yaapehe.

²⁶Hí lipatele vala, hé na tja ontanto, iya ame lu, hí lu vala ngangume tono ombepo.

²⁷Ndji tatetha olutu lwandje, he lu ningi olupika, opo hé teethele vala ovakwetu, ame omwene ngaile ndji yekelwehi.