Read zemba 2 Ovakorinto 11 Bible Online

2 Ovakorinto 11 - zemba bible

2 Ovakorinto 11

¹Ame me hala mu likambulithile kanunu ouhima wandje. Alikana, linkambulithila ndjen̯i.

²Iya ame me mu kodhilile ngaKalunga hiee mu kodhilila. Iya n̯e mu ngala omuthukona wongendjo ngumba nepela olukupo omulumentu umo vala, oye e li Kristus.

³Ame me tila okutya pamo omalipulo en̯i maa ngwangwanekwa, hamu yetha okukala ovantu vaKristus ngaEva hiaa pukithwa konyoka yovineya.

⁴Iya n̯e mu likambulithila nehuluko auhe ngume ya kun̯e oku mu teethela Jesus umo nguu lili, nguhe thi ngutu teetha ne okutambula ombepo nondaka ombwa ndjii lili, ndjihai lithele kombepo nokondaka ombwa ndjoka ndjitwe mu pa.

⁵Ame hime litala hí lwete okutya mba pon̯wa kovayapostoli ven̯i hembenya ovanene.

⁶Iya andaa ndjimuhima okupopya, himuhima modhondunge. Hehi twe mu heela tjo ae lukulu monkalo aihe.

⁷Ame mbe mu teethela ondaka ombwa yaKalunga otjali. Mbe linunupika, n̯e mu nenepekwe. Ne mba lundha?

⁸Nahi hindji undapa mokati ken̯i, ndji thutwa komaongalo amo ngae lili, nge tye mbe e nyeka, opo ndji mu popile.

⁹Iya ovakwetu mbava dha koMakedonia, va mpopila, hava mpa atjihe himba li amba hepa. Movipuka avihe híme hala oku mu twika omutenge okutya ahame mu ulithwa, otjo me ningi nokomeho.

¹⁰Ngahi ndji na otjatjili tjaKristus, okulitanga kwandje kaaku ka nyimithwa kovantu womotjit̯indwalongo tjomoAkaia.

¹¹Omena lyatji? Omena lyokutya mpaeli hí mu hole? Kalunga u tji i okutya ndji mu hole.

¹²Ame me twikile okuundapa hime undapa, okutya ndji tjaele ovayapostoli vamo mbave litanga, have liningi ngant̯e hitu undapa.

¹³Ovalumentu mbave li nyahoka, ovayapostoli wovithithi. Va undapetha ovithithi movilinga vyawo. Ve litjitula ovayapostoli vaKristus.

¹⁴Iya kaatji tu kumitha! Satana naye omwene we litjitula omweengeli wotjiten̯i.

¹⁵Iya hatjipuka otjinene andaa mbava undapela Satana, nawo wo mave litjitula, va ile ovaundapi wouvyuuki, komaandelo mava ka pewa hitji lithike povilinga vyawo.

¹⁶Me tjuna mo uke ame tyaa: Hápa kala nguma ntjokele okutya ndjimuhima. Iya andaa otjo nyahoka, amamu tya ndjimuhima, ntambula ndjen̯i ngomuhima, naame wo opo ndji litange kanunu.

¹⁷Hehi hime popi hatjo soka Muhona hima hala ndji popye. Motjipuka hehi tjokulitanga, me litanga ngomuhima.

¹⁸Tainkolo ape na ovantu ovengi mbave litanga ngovantu wouye, naame wo me litanga.

¹⁹Iya n̯e muvanadhondunge nan̯i mbamu likambulithila ovahima.

²⁰Mu likambulithila omuntu auhe ngume mu ningi omupika, ngume mu kengelele, ngume mu ningi ovineya, ngume linomene n̯e nangume mu tono motjipala.

²¹Ame me t̯a ohon̯i okwiitavela okutya twa li ovingone okuundapa ovipuka mbii li nyahoka. Andaa pe na nguma ulu okulitanga, me popi ngomuhima, ame naame wo me ulu okulitanga.

²²Ovaheberi? Naame wo ndjiMuheberi. Ovaisraeli? Naame wo ndjiMwiisraeli. Ombuto yaAbraham? Naame wo ndjimbuto yaAbraham.

²³Va undapela Kristus? Me popi ngomulumentu nguhe na odhondunge, okutya mbe ve pon̯a. Mba undapa unene oku ve pon̯a. Mba kala mokaliwoso otwingi oku ve pon̯a, mba tonwa unene oku ve pon̯a, povikando ovingi mbe tje t̯a.

²⁴Mba tonwa ovikando vitano kOvajuda, odhosokoti omilongo vitatu nomoovi.

²⁵Mba tonwa odhosokoti ovikando vitatu kOvaroma, notjikando tjimo mba tonwa nomawe. Mba kala ovikando vitatu moudheu wombapolo ndjaa teka. Mba kala mokati kelunga out̯iku nomutenya.

²⁶Otwingi modhondjila dhandje mba li moudheu womilonga, moudheu wovapundi, moudheu wotjiwan̯a tjandje, moudheu wovapaani, moudheu womovitungwalongo, moudheu womomakuti, moudheu womelunga nomoudheu womokati kovaitaveli vakwetu wovithithi.

²⁷Pa li ovilinga noudheu, otwingi ndji lala ontali, mba t̯a ondjala nonyota. Otwingi mba kala ahe na tja ovikulya mbyaa hulu. Mba mona ovihuna unene koutalala nokoluhepo.

²⁸Kakele kovipuka hembi etango alihe ndji na otjiho nomaongalo aehe.

²⁹Umo ae li otjingone, naame wo ndji ngala otjingone. Umo aa lundha, naame wo me ihamenwa.

³⁰Andaa me litanga, mba thele okulitangela ovipuka mbyoka mbimavi yulike okutya ndjitjingone.

³¹Kalunga, Ihe yaMuhona wetu Jesus, nguu tumbalekwa apehe, u tji i okutya híme kembe.

³²Ame himba li moDamasko, osova yohamba Aretas ya twaa ovayungi povivelo vyotjitungwalongo, i nkambule.

³³Iya ame mba thothononenwa mombwe, he pitithilwa montovi ndjii li mekuma, he thoponoka mo momawoko ohamba.