Read zemba 2 Ovakorinto 3 Bible Online

2 Ovakorinto 3 - zemba bible

2 Ovakorinto 3

¹Ngatu ute uke nt̯e ovene okulipopila? Ne matu hepa ngovantu vamo omikanda vyepopilo mbimavi ya kun̯e ne mbimavi dhi kun̯e?

²N̯e on̯e mu li omukanda wetu mbwaa sonekelwa momitima vyetu, u iwe, wo u tangwe kovantu avehe.

³Iya mwa yulika okutya mumukanda waKristus, mbwaa t̯ilwa otjiho kunt̯e. Kau sonekelwe nohinga, iya wa sonekwa nOmbepo yaKalunga omunamwenyo. Kau sonekelelwe kovipelende vyomawe, iya okovipelende vyomomitima vyovantu.

⁴Eliun̯iko ndii li hinyahi nditwe liun̯ika muKalunga, tu na lyo okupitila muKristus.

⁵Nt̯e munt̯e ovene katu na himatu ulu okulipula, tu tye ngaile munt̯e tu na himatu ulu. Himatu ulu, matji dhi muKalunga.

⁶Kalunga oye e tu ninga wo okutya tu undape otjilinga tjewaneneno epe. Ewaneneno hendi halyoveta ndjaa sonekwa, iya olyOmbepo Ondhilikwa. Iya oveta ndjaa sonekwa mai dhipaa, iya Ombepo Ondhilikwa mai yandja omwenyo.

⁷Iya andaa otjilinga tjoveta ndjii eta et̯o tja tjangwa momawe, tje ya nelaimo nOvaisraeli kava li amava ulu okutala otjipala tjaMoses mena lyelaimo lyotjipala tje, nandaku tiwa elaimo lye mali dhimi,

⁸iya otjilinga tjOmbepo Ondhilikwa matji kala atji na elaimo enene ndii lithike pi?

⁹Iya andaa otjilinga himatji koyele ovantu et̯o, tji na elaimo, okutya otjilinga tjouvyuuki himatji kutulula ovantu, matji kala atji lithike pi?

¹⁰Iya hitja li atji na elaimo, napano katji na tja elaimo oku tji yeleka nelaimo hendi ndii li po napano.

¹¹Iya muhitja li po okaluvedhe okanunu, mwa li elaimo okutya elaimo ndyoka ndii li muhimatji kala apehe, li lithike pi?

¹²Iya hitu na ekevelelo ndii lithike hempa, matu popi nouvandhi.

¹³Kaatu ngala Moses ngwee lit̯imika notjitopa kotjipala tje, Ovaisraeli opo háva ulu okumona elaimo himali dhimi po.

¹⁴Omalipulo awo a t̯imikwa, otjo e li katee ndino hendi, himava tanga omambo omewaneneno ekulu. Otjitopa matji ithwa po vala, omuntu aa wanene naKristus.

¹⁵Iinga, katee ndino hendi oveta yaMoses amai tangwa, otjitopa tji yuvikila omitima vyawo.

¹⁶Iya omuntu auhe ama tjuna kuMuhona, otjitopa matji ithwa po.

¹⁷Iya Muhona oye e li Ombepo. Apehe mpape na Ombepo yaMuhona, pe na ekutuluko.

¹⁸Napano nt̯e atuhe mbahatu tjikuluka kovipala, tu ngala otjilivandjelo mumamu monekele elaimo lyaMuhona ngoka nguu li Ombepo, matu lundululwa, tu lithe kolupe lwe omwene lwelaimo enene okupon̯a omalaimo aehe.