Read zemba Ovagalati 3 Bible Online

Ovagalati 3 - zemba bible

Ovagalati 3

¹Vagalati n̯e ovahima! Aan̯i ngwee mu uvalaleka? Ame mbe mu thitululila nawa Jesus Kristus hiaa t̯a komutjaakano.

²Hime hala ndji tyee mun̯e hootjohi okutya mwa pewa Ombepo yaKalunga, mena lyokutya mwa undapa himwa heelwa koveta ne omena lyokutya mwa tyaa Ondaka yaKalunga, hamu itavele?

³Nan̯i n̯e muvahima? Mwa uta moMbepo yaKalunga, napano mamu hala okwaandela monkalo yountu?

⁴Iya nan̯i mwe litwiila tji vala momaudheu omengi, andaa nan̯i okuliulithwa vala?

⁵Kalunga hime mu pa Ombepo ye, ha undapa ovilingankono mokati ken̯i, omena lyokutya mwa kambulitha oveta ne omena lyokutya mwa itavela himwa tyaa?

⁶Omusonekwa ngahi mau popi, himau tyaa: “Abraham wa itavela muKalunga, mena lyokutya wa itavela, Kalunga we mu tala okutya omuvyuuki.”

⁷Iya napano iwen̯i okutya mbava itavela, owo ve li ovanwaAbraham.

⁸Omusonekwa wa popya ae lukulu okutya Kalunga ovapaani me ke ve ninga ovavyuuki mena lyeitavelo. Iya Omusonekwa wa teethela Abraham ae lukulu ondaka ombwa, hau tyaa: “Oviwan̯a avihe mavi ka pewa elao mena lyoye.”

⁹Abraham wa itavela, ha pewa elao, iya mbava itavela, mava pewa elao ngaAbraham hiaa pewa elao.

¹⁰Avehe mbava soka okutya mava hwithile po oveta, mava thingwa, mena lyokutya omusonekwa mau tyaa: “Auhe ngoka nguhama hwithile po ovipuka avihe mbyoka mbyaa sonekwa membo lyoveta, ma thingwa.”

¹¹Iya napano tja kohoka okutya kape na nguma ningi omuvyuuki kotjipala tjaKalunga mena lyokuhwithila po oveta. Omusonekwa mau tyaa: “Omuvyuuki ma ka kala nomwenyo mena lyeitavelo.”

¹²Oveta kai na tja neitavelo, iya ngume i hwithile po, ma kala nomwenyo mena lyayo.

¹³Kristus hiaa thingwa, we tu yowola moveta, ahamatu thingwa. Ye wa thingwa poluvedhe lwetu, mena lyokutya omusonekwa mau tyaa: “Auhe nguma yendjelela momuti, wa thingwa.”

¹⁴Kristus we tu yowola, opo elao ndyaa pewa Abraham, li yandjwe kovapaani okupitila muKristus Jesus, mena lyeitavelo tu pewe Ombepo Ondhilikwa ndjitwa udhikilwa.

¹⁵Vakwetu, me popi monkalo yountu, hitja popiwa naa nawa, hatji tokolwa, kape na tja uke nguma ulu oku tji lundulula ne okuwedha po.

¹⁶Kalunga wa udhikila Abraham noluyumuko lwe eudhiko. Omusonekwa kaau tyaa: “Nomaluyumuko e”, okutya ngaile ovantu ovengi, iya “oluyumuko lwoye”, matji tya omuntu umo aika, omuntu ngoka oKristus.

¹⁷Ame me hala okupopya okutya Kalunga wa twaa po ewaneneno pokati kawo naAbraham, ye he li kambulitha. Oveta ndjoka ndjee ya kon̯ima yodhombula omathele ane nomilongo vitatu, kaai ulu okuteya ewaneneno ndyoka, hái han̯auna po eudhiko lyaKalunga.

¹⁸Iya epingo andaa mali dhi moveta, ngaile kaali dhi uke meudhiko. Iya Kalunga epingo we li yandja otjali kuAbraham mena lyeudhiko.

¹⁹Iya ontanto yoveta oyatji? Ya wedhwa po mena lyoulundhi, i kale po katee oluyumuko ndwaa pewa eudhiko malu ya. Oveta ya tuwa po okupitila movaengeli, hai yandjwa mokuwoko kwomuwan̯en̯eki.

²⁰Iya mpape na omuntu umo kaapa hepa omuwan̯en̯eki, Kalunga yuumo vala.

²¹Iya oveta i kondjetha omaudhiko aKalunga? Aai, nokanunu. Iya ngaile pa yandjwa oveta ndjii yandja omwenyo, ngai ouvyuuki mau dhi tjatjili moveta.

²²Iya Omusonekwa mau tya ovipuka avihe vi li kohi youlundhi, opo mboka mbava itavela, va pewe hiva udhikilwa, andaa va itavele muJesus Kristus.

²³Iya tainkolo oluvedhe lweitavelo háluye ya, twa li odhonkwatwa dhoveta, katee eitavelo lya holololwa.

²⁴Oveta ye tu yunga katee Kristus e ya, opo tu ningwe ovavyuuki keitavelo.

²⁵Iya napano eitavelo lye ya, katu li uke kohi yokuyungwa.

²⁶Iya n̯e amuhe muKristus Jesus mudhondele dhaKalunga mena lyeitavelo.

²⁷Iya n̯e amuhe mbamwa tjatjelwa muKristus, mwa dhala Kristus.

²⁸Iya kape na tja uke okapungulula okutya hengu Omujuda ne Omugreka ne omupika ne nguhe thi omupika ne omulumentu ne omukadhintu, iya n̯e amuhe muvamo muKristus Jesus.

²⁹Iya andaa muvaKristus, okutya mumbuto yaAbraham, mamu ka pewa soka Kalunga hiee mu udhikila.