Read zemba Ovagalati 5 Bible Online

Ovagalati 5 - zemba bible

Ovagalati 5

¹Kristus we tu kutulula, tu kale atwa kutuluka. Iya kalen̯i amwa kola, hámu liyandja uke mu ningwe ovapika.

²Taa tuutuu, ame Paulus me mu heele okutya andaa mamu lipititha etanda, okutya Kristus ke na hime mu popile.

³Me mu heele uke okutya auhe ngume lipititha etanda, u tha okuhwithila po oveta aihe.

⁴Mbamamu hala okuninga ovavyuuki kotjipala tjaKalunga, mena lyokuhwithila po oveta, okutya mwe liitha mo muKristus. Met̯ilonkenda lyaKalunga mwa u mo.

⁵Iya nt̯e matu kevelele okutya Kalunga me tu ningi ovavyuuki. Matu kevelele atu na eitavelo mena lyodhonkono dhOmbepo yaKalunga.

⁶Iya atu li muKristus Jesus, okupita etanda nokuhapita etanda, avihe hembi kavi na himavi tya. Hitji na otjilinga okukala atu na eitavelo ndimali yulike okutya tu hole ovakwetu.

⁷Nahi mu ninga nawa. Aan̯i ngwee mu tjaela okutya hámu tee ondaka yatjatjili? We mu tyoletha vi?

⁸Omatyoletho ngoka kaa dhile kuKalunga, ngwee mu ithana.

⁹Okantathi maka ulu okupitha ombulunga aihe.

¹⁰Ame mbe liun̯ika mun̯e mena lyaMuhona okutya kamu na tja uke omalipulo amo ngahae thi ngwaandje. Omuntu ngume mu ngwangwaneke, ma ka yumanekwa kuKalunga kutya ne omuntu ngoka aan̯i.

¹¹Iya vakwetu, ame ngaile me teetha okutya etanda li na otjilinga, ngai me tatethelwa tji? Otjipuka hehi andaa otjatjili, okutya eteetho lyandje ouhunga nomutjaakano waKristus kaali eta uke oudheu.

¹²Ovalumentu mbamave mu ngwangwaneke ngave litukane ngahi tji tukanwa ovipako.

¹³Vakwetu, mwa ithanwa mu kale amwa kutuluka. Okukutuluka hehu, hakutya mu ninge ngahi matji hala omalutu en̯i. Iya mu kale amu lihole, n̯e mu lipopile.

¹⁴Oveta aihe mai hwithilwa po motjitumino tjimo himatji tyaa: “Kala au hole omukwen̯i ngahi u lihole omwene.”

¹⁵Iya andaa mu li ngovithitu, mu lilumata, hamu liihametha, lungamen̯i, mpe mamu limana po.

¹⁶Me mu heele okutya Ombepo ngai mu endethe monkalo yen̯i aihe. Hámu ningi ngahi matji hala olutu.

¹⁷Olutu lu kondjetha Ombepo, nOmbepo i kondjetha olutu, ovipuka hembi vi likondjetha, opo hámu ningi ngahi mamu hala.

¹⁸Andaa Ombepo mai mu endetha, kamu li kohi yoveta.

¹⁹Omuyondjili wovilinga vyehalo lyolutu, hoowombu: Ovihulo, okuhakohoka, okuhelitjaela movihulo,

²⁰okuundapela ovikalunga, oumpule, okuliyele, odhombata, oukodhi, oluyuma, ovilwa, okulipatela odhondjila,

²¹ethupa, epyalu, odhontjingo dhout̯iku novipuka ovikwawo ngahembi. Ame me mu londola ngahi mbe mu londola ae lukulu. Ovantu mbamava undapa ovilinga mbii li nyahoka, kaava ka pingana otjilongo tjaKalunga.

²²Iya ovinyango vyoMbepo hoovyombi: Okukala amu lihole, okuhulukwa, ouwa, okulikambulithila, oupanga, okukala nawa novantu, okukala omuliun̯ikwa,

²³okulinunupika nokulikambula nawa. Kape na tja oveta ndjii na onki novilinga hembi.

²⁴Iya ovantu vaKristus Jesus va papela komutjaakano ovilinga vyawo avihe vyotjipando otjivi nehalo lyolutu.

²⁵Andaa Ombepo mai tu endetha, ngatu ende wo ngahi mai hala.

²⁶Hátu kala amatu lithele, hátu lileve ne okulit̯ila onki.