Read zemba Ovagalati 6 Bible Online

Ovagalati 6 - zemba bible

Ovagalati 6

¹Vakwetu, andaa pe na ngwaa lundha, mbamu viyulwa kOmbepo yaKalunga, mu pukululen̯i nawa. Lungamen̯i nan̯e wo, opo hámu tyolethwa.

²Litjindithen̯i ko omitenge, amamu ningi nyahoka okutya mamu hwithile po oveta yaKristus.

³Andaa pe na ngume litanga, ye ahe na mpae li, okutya omuntu ngoka me likembele po.

⁴Omuntu auhe nga thongonone ovilinga vye. Andaa oviwa, opo me litangele hiaa undapa, ahama yeleke ovilinga vye novyovakwawo.

⁵Iya omuntu auhe ma tjindi omutenge we omwene.

⁶Ngwaa longwa odhondaka dhaKalunga, nga yandje kungwee mu longa ovipuka avihe oviwa mbyee na vyo.

⁷Hámu likembele po. Kalunga ka lalulwa. Iya omuntu hima kunu, otjo ma teya.

⁸Nguma kunu monkalo yountu, eteyo lye mali ka ila et̯o, nguma kunu ngahi matji hala Ombepo yaKalunga, eteyo lye mali ka ila omwenyo waapehe.

⁹Hátu poyola okuundapa ouwa, mena lyokutya ahatu ulilwe, oluvedhe malu ya lwokuteya.

¹⁰Iya tainkolo tu na okaluvedhe, ngatu ningile ovantu avehe ouwa, unene tuu owoyetu meitavelo.

¹¹Talen̯i, hime mu sonekele odhondanda odhonene nokuwoko kwandje omwene.

¹²Ovantu mbava hala okulithevetha nokulitangela ovipuka vyountu, ve mu n̯in̯ikidha mu pitithwe etanda, va ningila okutya opo háva tatethwa mena lyomutjaakano waKristus.

¹³Iya mbava pitithwa etanda, wo ovene kava kambulithile oveta, va hala okutya mu pitithwe etanda, opo ve litangele omalutu en̯i.

¹⁴Iya ame ndji litangela vala ouhunga nomutjaakano waMuhona wetu Jesus Kristus. Ouye wa pwa ko kwaame, naame mba pwa ko kuwo.

¹⁵Okupita etanda ne okukala hó pitile etanda katji na himatji tya. Hitji na otjilinga okwiila omuntu omupe.

¹⁶Mbamava landula onkalo hendji monkalamwenyo yawo, ouwa nonkenda ngai kale pamo nawo, yo ngai kale pamo novantu vaKalunga avehe.

¹⁷Me hulitha ame tya hapa kala uke nguma mpa oudheu, mena lyokutya omahathi ngandji na o, maa yulike okutya ame ndjimuntu waJesus.

¹⁸Et̯ilonkenda lyaMuhona wetu Jesus Kristus ngali kale nan̯e, vakwetu amuhe. Amen.