Read zemba Ovafilippi 2 Bible Online

Ovafilippi 2 - zemba bible

Ovafilippi 2

¹Okukala muKristus matji mu vandhipaleke. Kristus hiee mu hole matji mu tendeleke. Iya amu na oukumo nOmbepo Ondhilikwa, n̯e mu kale nonkenda nolweembya novakwen̯i,

²hwithilen̯i po ehuluko lyandje, mu kale nomalipulo amo, mu kale amu na ohole imo, omwenyo umo, nontanto imo.

³Hámu undapa tja nokanunu mombepo yokukala amu lihole ovene ne okutaendha vala etumbalo, iya linunupiken̯i mu tumbaleke ovakwen̯i okupon̯a pun̯e ovene.

⁴Hó litala vala pwoove omwene, tala omukwen̯i.

⁵Kalen̯i nomalipulo ngangaa li naKristus Jesus.

⁶Kristus nandaku tiwa wa li Kalunga, ke liyulikile okutya oKalunga.

⁷Iya we lidhula oukalunga, he liningi ngomupika, he litha kovantu, nahiaa kala, u ngala omuntu.

⁸We linunupika katee met̯o, iinga, katee met̯o lyokomutjaakano.

⁹Iya Kalunga we mu yela peulu, he mu luku ena ndyaa pon̯a omana aehe,

¹⁰opo auhe nguu li meulu nokombanda yohi nokohi yohi a twike odhongolo mena lyaJesus,

¹¹elaka alihe li tumbaleke Kalunga Ihe, li hipulule okutya Jesus Kristus oye e li Muhona.

¹²Iya vahivilikwa vandje, ngahi mwa kala amamu ntee apehe, tainkolo mba li pun̯e, tyeen̯i wo unene tuu napano hihe li pun̯e. Kalen̯i amamu undapa nontilo amamu teketa mena lyehupitho lyen̯i.

¹³Iya Kalunga oye a undapa mun̯e okutya mu hale n̯e mu undape ngahi ma hala.

¹⁴Ovipuka avihe vi undapen̯i ahamamu tanguna, n̯e ahamu na odhombata,

¹⁵opo mu kale odhondele dhaKalunga ovakohoki mbahamu na tja otjipo mokati kekula ndyaa uvala ndihali tee. Laiminen̯i mokati kawo ngodhonyothi mouye,

¹⁶mu kambulithe odhondaka dhomwenyo, ndji litange metango lyaKristus, opo hé ngala mba dhamuka vala ne mba undapa vala okuliulithwa.

¹⁷Iya eitavelo lyen̯i olyo li li eyambo motjilinga tjaKalunga, iya ame nande yandjwa ngeyambo, me hulukwa, me linyandaele pamo nan̯e amuhe.

¹⁸Iya nan̯e wo hulukwen̯i, linyandaelen̯i pamo naame!

¹⁹Iya ame me liun̯ike muMuhona Jesus ndji tume Timoteus dhiva kun̯e, opo naame wo ndji hulukwe, hime tee himu li po.

²⁰Iya ame hí na tja uke umo nguma soko ngaame, e mu t̯ile otjiho.

²¹Hemba avehe va taendha ovipuka vyawo ovene, havyaJesus Kristus.

²²Iya n̯e onkalo yaTimoteus mu i i, hiaa kala pamo naame ngondele ae li naihe meteetho lyondaka ombwa.

²³Iya hengu oye mbe liun̯ike oku mu tumina dhiva, himba mono ovipuka mbime ka ningilwa.

²⁴Mbe liun̯ika muMuhona, ame omwene me ke ya wo dhiva.

²⁵Ame me tala okutya matji hepwa oku mu tumina Epafroditus omukwetu, omulongi nomukwavita mukwetu, ontumwa yen̯i, nguma mpopile muhime hepwa.

²⁶Epafroditus we mu dhimbaluka amuhe, wa li ae yuvite navi, mena lyokutya mwa tyaa okutya wa li ama vele.

²⁷Iinga, iya wa li ama vele unene okuhala naa okut̯a. Kalunga we mu t̯ila onkenda, iya haye vala aika, naame wo wa nt̯ila onkenda, opo hé wedhelwa uke oudheu.

²⁸Iya ame me hala unene okutuma Epafroditus, himamu mu mono uke, mamu hulukwa, naame híme etetha onkenda.

²⁹Mu tambulen̯i muMuhona nehuluko alihe, ovantu mbave li ngaye, ve tumbaleken̯i.

³⁰Iya we tje t̯a mena lyotjilinga tjaKristus hiaa ndjandjela omwenyo a mpopile poluvedhe lwen̯i.