Read zemba Ovafilippi 4 Bible Online

Ovafilippi 4 - zemba bible

Ovafilippi 4

¹Vakwetu n̯e, ovahivilikwa vandje mbamba dhimbaluka, on̯e ehuluko lyandje nohala yandje. Vahivilikwa, kalen̯i amwa kola muMuhona.

²Euodia naSintike me mu pukulula, mu kale amu na omalipulo amo muMuhona.

³Iinga, naove wo omupopili wandje watjatjili, me ku pula, u popile ovakadhintu hemba, mena lyokutya va kondjela ondaka ombwa pamo naame, wo va undapa pamo naKlemens novapopili vakwetu mboka mbave na omana awo membo lyomwenyo.

⁴Hulukwen̯i muMuhona apehe! Me mu heele uke okutya hulukwen̯i!

⁵Olweembya lwen̯i ngalu moneke kovantu avehe. Muhona u li popedhi.

⁶Hámu kala amu na otjiho natja, iya outhona wen̯i u heelen̯i Kalunga momaalikano, mokukumba nomokupandula.

⁷Ouwa waKalunga, mbwaa pon̯a ounongo auhe wountu ngau amene omitima vyen̯i nomalipulo en̯i muKristus Jesus.

⁸Iya, vakwetu, thongononen̯i otjipuka atjihe soka hitji li otjatjili, nahitja tumbala, nahitja vyuuka, nahitja kohoka, nahitji holwe, nahitja tumbalekwa, kutya onteto ombwa ne ompandu,

⁹ovipuka hembi avihe mbimwe lilonga nambimwa tambula nambimwa tyaa nambimwa mona mwaame, vi ningen̯i. Kalunga kouwa nga kale pamo nan̯e.

¹⁰Ame napano mbe hulukwa unene muMuhona, mena lyokutya mwa yandhumuka okunt̯ila otjiho ngahi mwa li amamu hala oku tji ninga lukulu, atjaa kamu mwene oluvedhe oku tji ninga.

¹¹Hamena lyokutya ndji na oluhepo, otjo me popile hinyahi, monkalo aihe mbe lilonga okutya hindji na tjo tja ntjulu.

¹²Ame okukala moluhepo ndji tji i, okukala mekuta ndji tji i. Avihe mbe vi ilila, okukala ambe kuta ne okut̯a ondjala, okukala mekuta ne moluhepo.

¹³Ovipuka avihe me vi ulu muKristus nguma nkoleke.

¹⁴Nandaku tiwa otjo nyahoka mwa ninga nawa, himu na oupanga naame moudheu wandje.

¹⁵Napano nan̯e wo Ovafilippi, mu tji i okutya himba uta okuteetha ondaka ombwa, himba dha koMakedonia, kape na tja eongalo nolimo ndyee litwaa kumo naame okuhava hitja yandjwa nahitja tambulwa, kakele vala kan̯e.

¹⁶Iya tainkolo mba li noluhepo moTessalonika mwa ntumina epopilo, hatjikando tjimo vala, iya ovingi.

¹⁷Hatjali me hala, iya me hala okutya n̯e ovene mu limonene otjingi, hitja hulu.

¹⁸Iya ovipuka avihe mbe vi pewa, ndji na hitja hulu, pa hupu. Mba yowoka unene himba mono soka himba etelwa kuEpafroditus, himwa ntumine otjali, matji ngala eyambo ndyaa pepa, ndyaa tambulwa, ndyee thevelwa Kalunga.

¹⁹Kalunga kandje me mu pa atjihe himamu hepa hitji lithike pouhona we metumbalo muKristus Jesus.

²⁰Kalunga Tate nga tumbalekwe apehe katee apehe. Amen.

²¹Menekelen̯i po ovantu ovadhilikwa avehe muKristus Jesus. Ovakwetu mbatu kala nawo mave mu menekele po.

²²Ovantu ovadhilikwa avehe mave mu menekele po unene owomoyomukesari.

²³Et̯ilonkenda lyaMuhona Jesus Kristus ngali kale nan̯e amuhe! Amen.