Read zemba Ovakolossa 1 Bible Online

Ovakolossa 1 - zemba bible

Ovakolossa 1

¹Omukanda hembu mau dhi kwaame Paulus, omuyapostoli waKristus Jesus, kehalo lyaKalunga, nokomukwetu Timoteus.

²Me sonekele ovadhilikwa vaKalunga, ovaitaveli vakwetu muKristus womoKolossa. Et̯ilonkenda nouwa waKalunga Tate ngau kale nan̯e.

³Nt̯e matu yandja ompandu kuKalunga, Ihe yaMuhona wetu Jesus Kristus, apehe amatu mu kumbile,

⁴mena lyokutya twa tyaa eitavelo lyen̯i muKristus Jesus, nohole yen̯i himu hole ovantu ovadhilikwa avehe,

⁵mena lyeliun̯iko ndimwa ungulilwa meulu. Eliun̯iko hendi mwe li tyaa lukulu metumwalaka lyatjatjili, ndii li ondaka ombwa,

⁶ndjee ya kun̯e. Ondaka ombwa mai eta elao, hai handjana wo nouye auhe nawanawa ngahi ya handjana mokati ken̯i okudha ketango ndyoka himwe i tyaa, n̯e hamu iwa et̯ilonkenda lyaKalunga ngahi li li tjatjili,

⁷ngahi mwa longwa kuEpafras omuundapi omukwetu omuhivilikwa, omuliun̯ikwa motjilinga tjaKristus poluvedhe lwetu.

⁸Ye we tu hipululila wo ohole yen̯i ndjimwa pewa kOmbepo Ondhilikwa.

⁹Iya nt̯e katu nyimine wo oku mu kumbila okudha ketango ndyoka hitwa tyaa ouhunga nan̯e. Nt̯e matu kumbu kuKalunga e mu yulithe Ombepo ye, ndjoka ndjimai mu ivitha ehalo lye nounongo auhe nodhondunge,

¹⁰okweenda kwen̯i opo ku thevelwe Muhona, mu ninge himatji hulukitha Muhona apehe. Ovilinga vyonkalamwenyo yen̯i avihe mavi ka kala oviwa, okwiiwa kwen̯i Kalunga, maku ile okunene.

¹¹Kolekwen̯i nodhonkono adhihe dhaMuhona, ndhimadhi dhi metumbalo lye, opo mu tjiiwe okulikambulithila omaudheu aehe nehuluko,

¹²mu yandje ompandu kuTate, ngwee mu ninga okutya mu mone oumpinga wovadhilikwa motjilongo tjaKalunga tjotjiten̯i.

¹³We tu hupitha metumino lyet̯iku, he tu eta motjilongo tjOmuna omuhivilikwa.

¹⁴Omuna oye e tu yowola, ye oye e tu ithila po odhonkali dhetu.

¹⁵Kristus otjithika tjaKalunga nguha moneka, omutenga meuto alihe.

¹⁶Iya ovipuka avihe meulu nokombanda yohi Kalunga hiee vi uta, vya pitila muKristus, ovipuka mbii moneka nambyoka mbihavi moneka, kutya nee odhonkono dhombepo ne ovahona ne ovatumini ne omatumino. Otjuutwa atjihe tja utwa okupitila muKristus, tjo tji mu tumbaleke.

¹⁷Kristus oko a li, tainkolo ovipuka avihe vya li ahavi ko. Ovipuka avihe vye likambulila kumo muye.

¹⁸Oye e li omutwe wolutu, matji tya omutwe weongalo. Ye oye e li eutilo, omutenga meimuko kout̯e, opo a kale omutenga movipuka avihe.

¹⁹Iya Kalunga wa tokola okutya Omuna a kale ae na ehwilopo alihe lyoukalunga muye.

²⁰Iya Kalunga wa tokola okutjun̯a ouye, u ye puye omwene okupitila mOmuna. Kalunga wa eta ouwa okupitila mombindhi yOmuna komutjaakano. Ovipuka avihe kutya ne okombanda yohi ne omeulu we vi eta pamo puye.

²¹N̯e lukulu mwa li kokule naKalunga, mwe lininga odhondjedhi momalipulo en̯i mena lyovipuka ovivi mbimu ninga.

²²Iya napano Kalunga we mu tjun̯a puye okupitila met̯o lyOmuna, opo e mu ninge ovadhilikwa, mbamwa kohoka, mbahamu na ombedhi kotjipala tje,

²³andaa mamu kala meitavelo mumwa kulama, mumwa kola, hámu ithwa mo mekevelelo lyondaka ombwa ndjimwa tyaa, ndjaa teethelwa ovantu avehe mouye. Iya ame Paulus mba ila omuteethi wondaka ndjoka.

²⁴Iya ame napano mbe hulukwa, hime tatethwa mena lyen̯i. Ame me hwithile po nolutu lwandje omaudheu ovipuka mbihavya ningililwe olutu lwaKristus, nduu li eongalo.

²⁵Mba ila omupopili weongalo, ndji undape otjilinga tjouteku wondaka yaKalunga mbumba pewa, ndji mu teethele ondaka yaKalunga ndjaa hwile po.

²⁶Otjiholekwa Kalunga hiaa holekele ovantu moule woluvedhe aluhe ndwaa ka pita, napano we tji holololela ovantu ve ovadhilikwa.

²⁷Iya ontanto yaKalunga okwiivithila ovantu ve otjiholekwa hitji na ouhona, hitji na etumbalo ndyoka ndyee ve udhikila. Otjiholekwa otjo soka okutya Kristus u li mun̯e, okutya n̯e mamu ka kala amu na mo tja metumbalo lyaKalunga.

²⁸Matu teetha Kristus, hatu ilikin̯a, hatu longo omuntu auhe nounongo auhe, opo tu kaleke omuntu auhe poluhandja, a kule muKristus.

²⁹Iya me kondjo okutya ndji ete otjilinga hehi komaandelo. Me undapetha odhonkono ndhimba pewa kuKristus ndhii li mwaame.