Read zemba 1 Ovatessalonika 5 Bible Online

1 Ovatessalonika 5 - zemba bible

1 Ovatessalonika 5

¹Iya vakwetu, omatango nodhowola kaamu hepa oku dhi sonekelwa,

²mena lyokutya n̯e ovene mu tji i nawanawa okutya, etango lyaMuhona mali ya ngotjimpulu hitji ya out̯iku.

³Tainkolo mava tya pe na ouwa neameno, mape ya dhiva ehan̯auno, ngedhimo amali kweya, kave na humava ka inkolela.

⁴Iya vakwetu, kamu li met̯iku, etango ndyoka opo háli mu vadha ngotjimpulu.

⁵N̯e amuhe muvantu wotjiten̯i, muvantu vetango. Nt̯e katuvantu wout̯iku ne vet̯iku.

⁶Iya hátu lala ngavamo, ngatu pathumuken̯i, tu liyunge.

⁷Mbava lala, va lala out̯iku, mbava pyaluka, va pyaluka out̯iku.

⁸Nt̯e tuvantu vetango, ngatu liyunge, tu dhale omudhalo wokontulo weitavelo nowohole nosapeu yotjivela yeliun̯iko lyehupitho.

⁹Kalunga ke tu twiile po tu yumanekwe, iya tu hupithwe, mena lyaMuhona wetu Jesus Kristus,

¹⁰ngwee tu t̯ila, opo tu kale pamo naye atu na omwenyo ne atwa t̯i.

¹¹Iya livandhipaleken̯i, n̯e mu litunge okupon̯a mpoka.

¹²Vakwetu, matu mu kumbu mu yandje nompandu kumbava undapa mokati ken̯i, mbave mu hongolela muMuhona, mbave mu pukulula,

¹³mu ve tumbaleke unene, mu kale amu ve hole tjatjili, mena lyotjilinga tjawo. Kalen̯i nouwa.

¹⁴Vakwetu, matu mu pukulula, mbave na ondende, ve pukululen̯i, mbava lya owoma, ve vandhipaleken̯i, popilen̯i ovingone, avehe ve talen̯i nonkenda.

¹⁵Taa tuutuu, hápa kala omuntu noumo nguma tjun̯ine omukwawo ouvi. Kalen̯i amamu undapele ovakwen̯i ouwa, mu u ningile ovantu avehe.

¹⁶Kalen̯i amwe hulukwa apehe!

¹⁷Kumben̯i, hámu petuka.

¹⁸Yandjen̯i ompandu movipuka avihe. Hehi otjo tji li ehalo lyaKalunga kun̯e muKristus Jesus.

¹⁹Ombepo Ondhilikwa hámu i tjaele.

²⁰Odhondaka dhouprofeti hámu dhi tombo.

²¹Thongononen̯i nawa ovipuka avihe. Soka hitji li otjiwa tji kambulithen̯i.

²²Yepen̯i ovipuka avihe ovivi.

²³Kalunga wouwa nga dhilike okukala kwen̯i akuhe, ye nge mu amene, opo ombepo yen̯i nomwenyo nolutu vi kale ahavi na ombedhi, katee Muhona wetu Jesus Kristus ma tjuna.

²⁴Ngwee mu ithana, omuliun̯ikwa, ye me ke tji ninga.

²⁵Vakwetu, tu kumbilen̯i wo.

²⁶Menekelen̯i po ovakwetu avehe nehupito edhilikwa.

²⁷Me mu anetha muMuhona, omukanda hembu u tangelen̯i ovakwetu ovadhilikwa avehe.

²⁸Et̯ilonkenda lyaMuhona wetu Jesus Kristus ngali kale nan̯e amuhe! Amen.